رەسپۋبليكا كۇنى قارساڭىندا الماتىدا جەدەل مەديتسينالىق جاردەم قىزمەتىنە 50 جاڭا ارنايى اۆتوكولىكتى تاپسىرۋ ءراسىمى ءوتتى. كولىكتەردىڭ كىلتىن قالا اكىمى دارحان ساتىبالدى تابىستادى.
اۆتوپارك قۇرامىنا س كلاستى 12 رەانيموبيل جانە ۆ كلاستى 38 اۆتوكولىك كىردى. بارلىق كولىكتەر زاماناۋي مەديتسينالىق قۇرىلعىلارمەن تولىق جابدىقتالعان جانە حالىقارالىق تالاپقا تولىق ساي كەلەدى. جوبا مەملەكەت قولداۋىمەن جۇزەگە استى.
قالا باسشىسى اۆتوپاركتىڭ جاڭارۋى الماتىداعى دەنساۋلىق ساقتاۋ جۇيەسىن مودەرنيزاتسيالاۋ اياسىنداعى ماڭىزدى قادام ەكەنىن اتاپ ءوتىپ، بۇل شارا شۇعىل مەديتسينالىق كومەكتىڭ ساپاسى مەن جەدەلدىگىن ارتتىرۋعا مۇمكىندىك بەرەتىنىن ايتتى.
«الماتى – ەلىمىزدەگى ەڭ ءىرى ءارى قارقىندى دامىپ كەلە جاتقان مەگاپوليس. مۇندا تۇرعىندارعا ۋاقىتىلى ءارى ساپالى مەديتسينالىق كومەك كورسەتۋ ەرەكشە ماڭىزدى. زاماناۋي جابدىقتالعان جاڭا اۆتوكولىكتەر دارىگەرلەر مەن جۇرگىزۋشىلەرگە سەنىمدى كومەكشى بولادى. سىزدەردىڭ ەڭبەكتەرىڭىزدىڭ ارقاسىندا كۇن سايىن مىڭداعان ادامنىڭ ءومىرى قۇتقارىلادى. ءبىز سىزدەردىڭ كاسىبيلىكتەرىڭىزدى جانە حالىققا ادال قىزمەتتەرىڭىزدى جوعارى باعالايمىز»، – دەدى دارحان ساتىبالدى.
بۇگىندە الماتى قالاسىنىڭ جەدەل مەديتسينالىق جاردەم قىزمەتى 14 بەكەت پەن 188 شۇعىل قىزمەت بريگاداسىنان تۇرادى. ديسپەتچەرلىك ورتالىق تاۋلىگىنە شامامەن 3 مىڭ قوڭىراۋ قابىلدايدى، ال بريگادالار كۇنىنە 2600-گە جۋىق شاقىرتۋعا شىعادى.
