Bügın, 28 qazanda prezident Qasym-Jomart Toqaev «Jaŋa tarihi kezeŋdegı Qazaqstannyŋ özektı mındetterı» atty Qazaqstan halqyna Joldauyn jariialap jatyr, dep habarlaidy «Adyrna» tılşısı.
«Būl joldaudyŋ mänı de, mazmūny da airyqşa. 25 qazanda ūlttyq merekemız – Respublika künın atap öttık. Osy künı Egemendık turaly deklarasiia qabyldandy. Bız derbes el bolu jolynda batyl qadam jasadyq. Köp ūzamai Täuelsızdık tuyn biıkke köterıp, eldıgımızdıŋ ırgesın bekıttık.
Mıne, biyl qasiettı Täuelsızdıgımızge 35 jyl tolyp jatyr. Būl tarihi mejenıŋ ūlt şejıresınde alatyn orny bölek.
Biyl nauryz aiynda halqymyz memlekettıgımızdıŋ negızgı tıregın – Konstitusiiamyzdy qabyldady. Būl tūtas elımız üşın tarihi män-maǧynasy tereŋ oqiǧa boldy. Konstitusiiany bırneşe ūrpaqtar arasyndaǧy qasterlı kelısım dep atauǧa bolady. Öitkenı Konstitusiiada Qazaqstannyŋ qazırgı bıtım-bolmysy men bolaşaqtaǧy beinesı naqty aiqyndaldy.
Jūrtymyz jarqyn bolaşaqqa bastaityn auqymdy jūmysty atqaruǧa belsendı türde kırıstı. El ömırındegı tarihi özgerısterdıŋ barlyǧy halyqtyŋ köz aldynda bolyp jatyr. Būl mäsele asa maŋyzdy bolsa da, köp söz aitudyŋ qajetı joq dep oilaimyn»,– dedı ol.
Prezident öz sözınde Qazaqstannyŋ täuelsızdıgı men egemendıgın qorǧauǧa qatysty bırqatar mäsele älı de tolyq şeşılmegenın atap öttı.
«Aşyǧyn aitsaq, bügınde täuelsızdıgımız ben egemendıgımızdı qorǧauǧa qatysty barlyq mäsele älı tolyqtai şeşımın tapqan joq. Būl – aldymyzda köptegen özektı mındet tūr degen söz. Jūmysty oidaǧydai oryndau üşın, eŋ aldymen, bükıl qoǧamymyz tatu boluy kerek. Bırlık pen kelısım bolmasa, eşqandai reforma jäne ılgerıleu bolmaityny aidan anyq», – dedı memleket basşysy.
Qasym-Jomart Toqaev qazırgı geosaiasi ahualdyŋ kürdelene tüskenıne nazar audaryp, jahandyq syn-qaterler jaǧdaiynda qoǧamda tärtıp pen jauapkerşılıktı küşeitu qajettıgın jetkızdı.
Prezidenttıŋ aituynşa, älem elderı arasyndaǧy özara senım daǧdarysy tereŋdep, halyqaralyq qūqyqtyŋ bedelı tömendegen. Sonymen qatar baqylausyz köşı-qon aǧyndarynyŋ artuy bırqatar europalyq memlekettıŋ qauıpsızdıgıne kerı äserın tigızgen.
«Bırıkken Ūlttar Ūiymynyŋ abyroi-bedelı ülken toqyrauǧa ūşyrady. Halyqaralyq qūqyqtyŋ qūndylyǧy tömendep kettı. Qysqasy, qazırgı älem būlyŋǧyr däuırge aiaq basty, onyŋ keleşegı qandai bolatyny turaly saiasatkerler men sarapşylar arasynda bırtūtas pıkır joq», – dedı prezident.
Memleket basşysy älemdegı qazırgı tūraqsyzdyq pen belgısızdık deŋgeiı būryn-soŋdy bolmaǧan sipat alǧanyn atap öttı.
«Küllı älem jūrtşylyǧy alasapyran kezeŋde ömır sürıp jatyr desek, artyq bolmas. Mūndai kürdelı, boljamsyz ahual «qyrǧi-qabaq soǧys» kezınde de bolmaǧan edı», – dedı Qasym-Jomart Toqaev.
