Qazaqstandyq kásipker, meenat, «TAS GROUP» kompanııalar tobynyń negizin qalaýshy Dýlat Tastekeı “qazaq tilin bilmeıtin adamdy óz kompanııasyna jumysqa qabyldamaıtynyn” aıtty, dep habarlaıdy “Adyrna” ulttyq portaly.
Bul týraly kásipker óz Instagram paraqshasynda bólisti.
“Bizdiń kompanııada qazaq tilin bilmeıtin adam jumysqa alynbaıdy. Bizde mynadaı túsinik bar: biz sóılep otqan adamnan qazaq tilin 100% talap etemiz. Amerıkaǵa, basqa memleketterge baryp, aǵylshyn tilin qısyq sóıleseń, saǵan eshkim kúlmeıdi, sen jaqsy sóılep tursyń dep, maqtap, arqańnan qaǵyp qoıady. Biz ózimizdiń tilimizdi ary qaraı damytý úshin osy qasıetti de ustanýymyz kerek. Shynyn aıtaıyn, bizdiń Qostanaıdaǵy, Petropavldaǵy keıbir qyzmetkerlerimiz qazaqshaǵa sýdaı aǵyp turmasa da, óz oıyn jetkizip, qarapaıym qyzmet túrin kórsete alatyndaı deńgeıde. Degenmen ádebı tilde shyǵarma jazyp, óleń shyǵaratyn deńgeıdegi qazaq tili joq”, - dep aıtty kásipker.
Sondaı-aq Dýlat Tastekeı ana tilimizdi úırenýi úshin qyzmetkerlerine arnaıy qazaq tili kýrsyn uıymdastyrǵanyn da atap ótti.
“Qazaq tilin bilý kerek degen buıryq, shart 2020 jyldan bastap kirdi. Oǵan deıin bizge jumysqa turǵan basqa ult ókilderi bar, ózimizdiń qarakózder bar – biz olarǵa tegin qazaq tili kýrsyn uıymdastyryp, olardy jyldan-jylǵa úıretip jatyrmyz”, - dep kásipker aǵynan jaryldy.
“Adyrna” ulttyq portaly
