Joǵary oqý oryndarynda bilim alatyn stýdent qyzdardyń jeke derekteri tarap ketti, dep habardaıdy "Adyrna" tilshisi.
Bul jaǵdaıǵa qatysty Ǵylym jáne joǵary bilim mınıstri Saıasat Nurbek pikir bildirdi.
WhatsApp qosymshasynda 190 adamnan turatyn tutas topqa stýdentter tizimi bar 4 qujat jiberilgen. Ol qujatta stýdentterdiń jeke derekteri, JSN, uıaly telefon nómirleri, aty-jónderi men jeke medıınalyq málimetter de taraǵan.
Qujatta arnaıy qyzyl túspen belgilengen stýdentter mindetti flıýorografııalyq baqylaýdan ótýi kerek bolǵan.
Topqa kelgen tizimderde stýdentter týraly tym jeke aqparattar da bolǵan. Onda qyzdardyń "qyz", qaısysy "qyz emes" ekeni týraly aqparat ta bolǵany aıtylýda.
"Bul jerde tikeleı zań buzýshylyq bolǵandyqtan másele baqylaýǵa alyndy. Kináliler qoldanystaǵy zańnama aıasynda jazalanady. Jeke derekterdi qorǵaý týraly zań bar. Bul ákimshilik quqyq buzýshylyq týraly másele bolyp otyr", - dedi mınıstr Saıasat Nurbek.
Mınıstr bul derekti taraýyna sebep jaýaptylardyń salǵyrttyǵy ekenin aıtty.
"Moıyndaý kerek, bul máseleni zańmen qatańyraq retteý kerek. Jalpy, bul mádenı másele. Ýnıversıtette mundaı faktilerdiń bar ekeni qynjyltady. Jeke derekter óte qupııa aqparat bolyp tabylatyny týraly qatań zańnamalyq talap bolmaıynsha, mádenıet ózgermeıdi", - dep túsindirdi ol.
