"Qaraqalpaq - ózbek qatynasyn ýkraın - orys qatynasymen salystyrýǵa kelmeıdi. "Qoldaımyz" dep úmittendirip, ózi de az sandy qaraqalpaqtardy arandatyp alasyzdar... Bul másele tek BUU sheńberinde sheshilýi tıis". Bul pikirdi belgili ustaz, tarıhshy Ómir Shynybekuly Adyrna.kz tilshisine bergen suhbatynda aıtty.
"Bylaı tartsań ógiz óledi, olaı tartsań arba synady" degen osy. "Qaraqalpaqtarǵa kómekteseıik" dep jatqan qyzýqandy aǵaıyndar azdap sabyrǵa kelsin... Qaraqalpaq - ózbek qatynasyn ýkraın - orys qatynasymen salystyrýǵa kelmeıdi. "Qoldaımyz" dep úmittendirip, ózi de az sandy qaraqalpaqtardy arandatyp alasyzdar... Qolyńa qarý alyp baryp, aman qaıtsań ózimizdiń sotpen sottalasyń", - deıdi tarıhshy.
Ómir Shynybekulynyń aıtýynsha, Ýkraınaǵa kómektesken Batys qaraqalpaq úshin basyn aýyrtpaıdy.
"Sondyqtan, bul másele tek BUU sheńberinde sheshilýi tıis. Tikeleı teketireske tússe, "Kóp qorqytady, tereń batyrady" degendeı ózbekter qaraqalpaqty jýsatyp salady. LNR, DNR degenderdi moıyndamaıtynyn ashyq aıtqan Qazaqstan bıligi bul máselede tolyq neıtralıtet saqtaıtyny belgili...", - deıdi Ómir Shynybekuly.
Tarıhshy qazaqstandyq áleýmettik jeli belsendileri qyzýqandy qaraqalpaq jastarynyń artyna jel úrlep, ushyndyra bermegeni jón deıdi...
"Bul eń aldymen qaraqalpaq halqy úshin paıdaly... Iá, azdap saýaty bar adam retinde qaraqalpaq halqynyń qalaýyn túsinem... Biraq óz basym onyń alańda emes, kelissózder ústelinde sheshilgenin qalaımyn! Biraq qalaı bolǵanda da bul janjal Qarabaqtaǵy soǵystan keıin bastary birige bastaǵan túrki halyqtarynyń yntymaǵyna syzat túsiretin boldy...", - dep pikirin bildirdi tarıhshy Ómir Shynybekuly.
Zarına ÁShIRBEK,
"Adyrna" ulttyq portaly
