Úshinshi megapolıste joldardy jóndeý jáne qalpyna keltirý jumystary jalǵasýda. Buǵan jaýapty qalalyq jolaýshylar kóligi jáne avtomobıl joldary basqarmasy ókilderiniń málimetinshe, birinshi kezekte, magıstraldi kóshelerdi kútip-ustaý jumystary oryndalýda. Keshendi jospar aıasynda aýa raıynyń qolaıly sátterinde aǵymdaǵy jóndeý júrgizilip, oı-shuńqyrlar jamalǵan.
– Búgingi tańǵa deıin merdiger mekemeler óz mindetterin tıisti kestemen oryndaýda. Jalpy kólemi 14 000 metr kvadrat kólemdegi jol jabyny qalpyna keltirildi. Ol jumystar aıaqtalǵan soń, ekinshi kezekte, eldimekenderdegi ishki oram kóshelerin aǵymdaǵy jóndeý júrgiziledi. Ol jumystar maýsym aıynan bastalady dep josparlanýda, – deıdi basqarma basshysy Erjan Joldasov.
Jóndelip jatqan magıstraldi kóshelerdiń jalpy sany – 41. Onyń ishinde eń kóbi qalanyń ortalyq aýdany sanalatyn Ál-Farabı aýdanynda ornalasqan – 19 kóshe. Buǵan qosa Abaı aýdany boıynsha – 9 kóshe, Eńbekshi aýdanynda – 8, al Qarataý aýdanynda 5 kóshe jóndeldi.
Jaýapty mamandardyń aıtýynsha, qaladaǵy joldardy kútip-ustaý maqsatynda aǵymdaǵy jóndeýmen qatar kúrdeli jóndeý jumystary da jalǵasady.
"Adyrna" ulttyq portaly
