Aqmola oblysynda Qorǵaljyn aýdanynyń soty eks-ákim Janat Omarovqa qatysty qylmystyq isti toqtatyp, isti ákimshilikke aýystyrypty. Endigi segizinshi synyp oqýshysyn sabap tastaǵan ákim jazadan ońaı qutylyp ketýi yqtımal. Al istiń osylaı jumsarýyna sot saraptamasy sebep bolǵan kórinedi, dep habarlaıdy KTK arnasy.
Alaıda burynǵy ákimnen taıaq jedim degen Dıas Muqannyń anasy balasynyń jeńil jaraqat alǵany týraly saraptama qorytyndysyna sene alar emes. Dál osy sebepti qaıtadan saraptama taǵaıyndatyp, ákimdi jazalamaq nıette.
14 jastaǵy Dıas Muqannyń ata-anasynyń sózinshe, eks-ákim anasy men aýdan depýtattaryn araǵa salyp, jábirlenýshilerdi keshirim berýge májbúrlep júrgen kórinedi.
«Olar meniń balamdy oılamaıdy. Keshirimmen keldi. Alaıda balamdy emdetý, sol arqyly kómek berý týraly oılamady. Oılap otyrǵandary – tek Janat Omarovtyń jaǵdaıy. Soqqy saldarynan balam kemis bolyp qalsa, ne ister edi?» – deıdi Dıastyń ákesi Tólegen Kúlpeıisov.
Al aýdandyq sýdıanyń sózinshe, bul iske qatysty saraptama taǵaıyndalyp, onyń qorytyndysy shyqqandyqtan, Janat Omarovty qylmystyq jaýapqa tarýǵa aıtarlyqtaı sebep joq. Saraptama qorytyndysy boıynsha, Dıastyń alǵan jaraqaty jeńil. Istiń ákimshilikke aýystyrylýyna dál osy saraptama qorytyndysy sebep bolypty.
«Sot-medıınalyq saraptamanyń qorytyndysy shyqty. Onda jasóspirimniń densaýlyǵyna jeńil jaraqat keltirilgeni kórsetilgen. Sondyqtan Omarovty qylmystyq jaýapkershilikke tartýǵa negiz joq», – deıdi Qorǵaljyn aýdany sotynyń tóraǵasy Danııar Temirhanov.
Alaıda Dıastyń ata-anasy saraptama qorytyndysymen kelispeı otyr. Olardyń sózinshe, uldary aıǵa jýyq ýaqyt emdelse de, áli de tolyq saýyqpapty. Sondaı-aq, soqqy saldarynan únemi basy aýyratyn kórinedi. Osy sebepti olar istiń toqtatylǵanyna qarsy. Olar eks-ákimdi jazaǵa tartý úshin, qaıtadan saraptama taǵaıyndaýǵa ótinish bildirgen.
Dıastyń ata-anasynyń áreketin sýdıa qoldap, ekinshi ret saraptama taǵaıyndaǵan. Qaıtadan taǵaıyndalǵan saratama bir aıǵa jýyq jasalýy múmkin.
Qazirgi ýaqytta Dıas Muqan ınternatqa qaıta oralǵan. Alaıda kóp sabaqty jiberip alǵandyqtan, úlgerimine áserin tıgizbeı qoımapty.
Ekinshi qaıtara taǵaıyndalǵan saraptama nátıjesi ózgermese, burynǵy ákimge qatysty 35 myń teńge aıyppul nemese 15 táýlikke qamaý túrindegi ákimshilik jaza taǵaıyndalýy múmkin. Al saraptama qorytyndysy Dıastyń densaýlyǵyna aıtarlyqtaı zaqym kelgenin rastasa, Janat Omarov eki jylǵa deıin bas bostandyǵynan aıyrylýy yqtımal.
Esterińizge sala ketsek, Aqmola oblysynda 8-synyp oqýshysyn soqqyǵa jyqqan Qorǵaljyn aýyldyq okrýginiń ákimi Janat Omarovtyń ústinen is qozǵalǵan edi. Ol Tóleýbaev atyndaǵy orta mekteptiń oqýshysy Dıas Muqandy soqqyǵa jyǵyp, densaýlyǵyna zııan keltirgen.
__________________________________________________________________________________________________________________ Ktk.kz
