Qyzylordalyq ardagerler Qyrymbek Köşerbaevty öz-özın jarnamalady dep aiyptady, dep habarlaidy “Adyrna” ūlttyq portaly Ulysmedia.kz-ke sıltep
“Ardagerler dauysy” qoǧamdyq bırlestıgı Qyzylorda oblysynyŋ prokurory Rizabek Ojarov pen qazırgı oblys äkımı Nūrlybek Nälıbaevqa resmi hat joldap, Alseit jäne Syrdariia köpırlerıne ornatylǧan märmär taqtalardyŋ zaŋdylyǧyn tekserudı sūrady. Būl taqtalarda atalmyş nysandardyŋ “Qyrymbek Köşerbaevtyŋ basşylyǧymen salynǧany” jazylǧan.
Ardagerler būl ärekettı memlekettık qyzmetkerdıŋ etikasyna qaişy dep baǧalap, ony aşyq türde öz-özın jarnamalau dep atady. Olar sondai-aq milliardtaǧan teŋgege salynǧan, bıraq aiaqtalmai qalǧan ūzaq merzımdı qūrylys nysandaryna da osyndai taqtaişalardy qoiudy ūsyndy.
Veterandardyŋ mälımdemesınen:
“Memlekettık ǧimarattarǧa eskertkış taqta ornatuǧa qatysty audan nemese oblys deŋgeiınde arnaiy şeşım bar ma? Būryn-soŋdy mūndai jaǧdaidy körmegen edık. Memlekettık qarjyǧa salynǧan nysandarǧa äkımderdıŋ öz esımın jazuy zaŋǧa qaişy emes pe? Eger olar jeke qarajattaryna salsa, tüsınemız. Al būl – äkımnıŋ tıkelei mındetı. Mūndai äreket memlekettık qyzmetkerdıŋ etikalyq deŋgeiıne köleŋke tüsıredı jäne būl sözsız özın-özı jarnamalau retınde qabyldanady”, – delıngen hatta.
Eske sala keteiık, Qyrymbek Köşerbaev Qyzylorda oblysyn 2013 jyldan 2019 jylǧa deiın basqarǧan.
Ūqsas jaŋalyqtar
