Ýkraınaǵa Reseı basyp kirgeli ekinshi aıǵa jaqyndady. Kıevke Batystyq tarap barynsha qoldaý bildirýde. Qarjylaı jáne qarý túrindegi qoldaýdyń deńgeıi artty. Ásirese Donbass úshin bolatyn aqtyq shaıqasqa arnap jańa qarý túrleri kelýde. Endeshe búginde Ýkraına soǵysy dese, eske túsetin qarýlarǵa bir sholý jasasaq.
NLAW - Ulybrıtanııa Ýkraınaǵa jetkizip jatqan tankke qarsy júıe. Shvedter óndiretin bul zymyrannyń basym bóligi Ulybrıtanııada. Shveııanyń Saab Bofors Dynamics kompanııasy bastapqyda oılap tapqan bul qarý, keıin Ulybrıtanııada jappaı óndiriske endi. Salmaǵy 12,5 kelini quraıtyn jáne atys júıesin iske qosý úshin bar bolǵany 2-3 sekýndty qajet etetin bul qarý zamanaýı urysta jeńil, tankke qarsy taptyrmaıtyn zymyran kesheniniń biri desek te bolady. NLAW zymyranyn 20 metrden bastap 800 metrdegi nysanaǵa deıin atqylaı berýge bolady. Tek qana tank emes, sonymen birge áskerı kólik, avtobýs, tipti jaqyn qashyqtyqtaǵy tikushaqty da atýǵa yńǵaıly. Zymyranynyń qýattylyǵy sonsha, qalyńdyǵy 500 mm brondy tesip ótedi. Bul tanktiń aman qalýy ekitalaı degen sóz. Naryqtaǵy quny dollarǵa shaqqanda 25 myń jasyl aqshany quraıdy degen aqparat bar. Ulybrıtanııanyń Kıevke osy ýaqytqa deıin naqty qansha NLAW jetkizgeni belgisiz, alaıda derekter 2000-nan astam deıdi.
(Sýret fakty.com.ua saıtynan)
Javelin - tankke qarsy jeńil zymyran kesheni. Ýkraına soǵysy Javelinnyń dańqyn asqaqtatty. Derekter boıynsha 100 zymyrannyń 89 nysanaǵa dál tıgen. Demek, tıimdilik týra 89% degen sóz. Bul joǵary kórsetkish, sebebi kóptegen júıelerdiń tıimdiligi 40-60 paıyz arasynda aýytqyp turady. Ereksheligi sonda, zymyrany tóbeden túsip, tanktiń eń osal tusynan soqqy jasaıdy. Sonymen birge áskerı býnkerlerdi de joıýǵa qabiletti. Zymyrandy 2 shaqyrym jerden baǵyttaýǵa bolatyndyqtan, atalmysh keshendi qoldanýshy sarbaz ózin qaýipsizdikte sezinedi desek te bolady. Ýkraınaǵa Javelin tankke qarsy keshenin jetkizýshi AQSh ekenin aıtýǵa tıispiz. Búginde Kıevke qansha Javelin bergeni belgimiz, ol áskerı qupııa sanalady.
(Sýret pravda.com.ua saıtynan)
Stinger. Bul qarý kópshilikke ejelden tanys. Keńes-Aýǵan soǵysyn kórgen ár azamat atalmysh qarýdy jatqa biledi. Keńestik tikushaqtarǵa tynyshtyq bermegen Stinger búginde Reseı tikushaqtarynyń qorqynyshyna aınaldy. AQShtyń tikeleı ruqsaty boıynsha Stingerdi Kıevke Lıtva, Latvııa, Estonııa jetkizýde. Vashıngton jarııalaǵan sońǵy qorǵanys paketterine baılanysty Stingerdi endi tikeleı AQSh ózi tasymaldaı bastady. Jeńil, kóterýge yńǵaıly zenıttik zymyran kesheni retinde Stingerdi álemde 30-dan astam el satyp alǵan. Stinger 4 shaqyrym bıiktikte 8 shaqyrymdaǵy nysanaǵa tıetin qabiletke ıe.
(Sýret vpk.name saıtynan)
"Bayraktar" drony kópshilikke Qarabaq soǵysynan tanys. Basqynshy Armenııa áskerine túrkııalyq soqqy jasaýshy drondar qyrǵıdaı tıip, tynyshtyq bermedi. Búginde Ýkraına aspanyn kúzetip turǵan bul dúleı qarýdy jetkizýshi árıne Ankara. Reseı tipti Kıevke dron satqany úshin Ankara burtıyp qalǵany bar. Degenmen "bul memlekettik emes, jeke ónerkásip kesheniniń kelisimi" dep Ankara ol suraqty jyly japty. Bayraktar soqqy jasaýshy drony 24 saǵat áýede qalyqtap, 150 shaqyrymǵa deıin usha alady. Al 5 shaqyrymdaǵy bıiktikten 8 shaqyrymdaǵy nysanany joıýǵa qabiletti. Úshinshi býyny shyqqan atalmysh dronnyń quny 70 mln dollar. Jeke satylmaıdy jáne bir júıede 6 dron men ony basqarý ortalyǵy jáne zymyrandary birge jetkiziledi. Ýkraınada sońǵy derek boıynsha 24 ekinshi býynda Bayraktar soqqy jasaýshy drondary bar.
(Sýret gazeta.ru saıtynan)
"Starstreak" áýe qorǵanys júıesi. Ulybrıtanııanyń tól týyndysy sanalatyn zenıttik zymyran keshenin London Kıevke jaqynda berdi. Borıs Djonsonnyń Ulybrıtanııaǵa saparynan keıin, taǵy da qosymsha Starstreak zenıttik zymyrandaryn jetkizetini belgili boldy. Starstreak zymyrany óte jyldam, keı aqparat boıynsha dybystan úsh ese jyldamdyqqa ıe. 7 shaqyrymdaǵy nysanaǵa dál tıetin bul zenıttik zymyran kesheniniń zymyrany úsh tisti naızaǵa uqsas. Ulybrıtanııa Ýkraınaǵa qanshy zenıttik zymyran jetkizgenin ashyq jarııalamady.
(Sýret inosmi.ru saıtynan)
"Stýgna" tankke qarsy zymyran kesheni. Ýkraınanyń tól týyndysy. 2011 jyldan bastap Ýkraına qorǵanys mınıstrligi Stýgna tankke qarsy zymyran keshenimen jappaı qarýlana bastady. Sıpattamasyna nazar aýdaratyn bolsaq, 5 shaqyrymdaǵy nysanaǵa týra tıedi, alaıda nysanany 6500 metr qashyqtyqtan anyqtaýǵa múmkindik beredi. Demek, zymyran keshenin qoldanýshy sarbazǵa aıtarlyqtaı qaýip tónbeıdi degen sóz. Osy ýaqytqa deıin Ýkraına 300 dana Stýgna shyǵardy degen de aqparattar bar.
:no_upscale()/imgs/2022/03/09/22/5289055/447bdae5f39c0a43711cd00a4d89bb370ece919b.jpg)
(Sýret ferra.ru saıtynan)
"Neptýn" kemege qarsy zymyranyn Ýkraına ózi jasap shyqqan. Reseılik "Máskeý" kreıserin sý astyna jibergennen keıin atalmysh zymyran "tanymaldyqqa" ıe boldy. 2014 jyly Ýkraına áskerı flotynyń jartysynan aıyrylǵannan keıin (Reseı tartyp aldy), kemege qarsy zymyrandarǵa kóbirek kóńil bólý strategııasyn qolǵa aldy. Neptýn zymyrany 2020 jyly qoldanysqa berildi. 280 shaqyrym jerdegi nysanany joıýǵa qabiletti bul zymyran Reseıdiń eń iri kreıseriniń biri "Máskeýdi" sý túbine jiberdi.
Ýkraınaǵa ózge de qarýlar tolassyz jetkizilýde. Olar jaıly kelesi sholýymyzda oqı alasyzdar.
Ashat QASENǴALI,
"Adyrna" ulttyq portaly
