QR Premer-Mınıstri
B.Á. Saǵyntaevtyń nazaryna!
Qytaıdyń saıası qysymy Shyńjańdaǵy qazaqty qoıyp, Qazaqstan Respýblıkasyna kóship kelgen qandastarymyzǵa da jetti.
Arǵy betten óz betimen kóship kelgen etnıkalyq qazaqtar Qazaqstan Respýblıkasynnyń azamattyǵyn alǵan soń, Qytaıdyń burynǵy Tólqujatyn Qazaqstandaǵy Qytaı Elshiligine aparyp tapsyryp beretin.
Qytaı Elshiligi Qytaı Halyq Respýblıkasyń «Azamattyq týraly» zańynyń «Shetelge qonystanǵan QHR azamaty óz erkimen shetel azamattyǵyn qabyldasa, sol kúnnen bastap, QHR azamattyǵynan avtomatty túrde shyqqan bolyp esepteledi»-degen 9-tarmaǵyna («第九条 定居外国的中国公民，自愿加入或取得外国国籍的，即自动丧失中国国籍») silteme jasaı otyryp, Qazaqstan azamattyǵyn alǵan ondaı azamattarǵa Qytaı Eliniń azamattyǵynan shyqqany, qujattaryn tapsyryp alǵany týraly anyqtama (SPRAVKA) beretin de, Qytaı Tólqujatynyń shetin qıyp, ishki betterine «Kúshin joıdy» degen tańba basyp tastaıtyn. Qytaı Elshiligi kúni keshege deıin, tipti osy 2018-jyldyń naýryz aıyna deıin osy tártippen jumys júrgizip turǵan.
Ne túlen túrtkeni belgisiz, Shyǵystaǵy kórshimizdiń Elshiligi bir aıdan beri osy qaǵıdatynan jalt berip, kelgen eliniń azamattyǵynan shyǵýǵa ótinish aıtyp kelgen qandastarymyzdyń qujatyn qabyldamaıtyn «óner» shyǵaryp jatyr.
Qazaqstan Respýblıkasynyń Syrtqy ister mınıstrligine bergen jaýapqa qaraǵanda, Elshilik endi «QHR azamattarynyń shegaradan kirý/shyǵýyn basqarý erejesiniń erejesiniń 7-tarmaǵyna» súıene qalypty. Al, bul «EREJENI» jer-kókten izdep tappadyq.
Negizi, qalyptasqan tártip boıynsha, «Ereje», «Qaǵıda», «Buıryq», tipti «Jarlyq»... degenderińiz memlekettiń ZAŃYNA súıenip jasalmaýshy ma edi. Memleket Zań qabyldaǵanda halyqaralyq sharttar men kelisimderge qurmet etýi tıis.
Biz aryǵa – halyqaralyq sharttar men kelisimderge barmaı-aq, Qytaı Halyq Respýblıkasynyń kúni keshege deıin atqaryp kelgen «Azamattyq týraly» Zańyn alaıyq. Bul Zań 1980 jyly 10 qyrkúıekte Qytaı Halyq Respýblıkasynyń búkil memlekettik 5 - kezekti Halyq quryltaıynyń 3-Jalpy májilisinde maquldanǵan. Sodan beri de qyryq jylǵa taıaý ýaqyt ótipti. Múmkin, keıbir tarmaqtaryna azdap ózgertýler men tolyqtyrýlar engizilgen shyǵar. A, biraq, onyń 9-tarmaǵy dál qazirge deıin din aman. Beker obaly káne, Halyq quryltaıy bir áribine qol tıgizen joq, sol kúıinde qoldanysta tur.
Sondaı-aq, 2006 jylǵy 19 sáýirde Qytaı Halyq Respýblıkasynyń 10 kezekti Búkil memlekettik Halyq Quryltaıy Turaqty komıtetiniń 21 Joralar májilisinde maquldanyp, sol kezdegi QHR Tóraǵasy Hý Jyntaýdyń №50 Buıryǵymen bekitilip, 2007 jylǵy 1 qańtardan bastap atqarylýǵa berilgen Qytaı Halyq Respýblıkasynyń «TÓLQUJAT TÝRALY» Zańy da áli qoldanysta tur.
Sol «Tólqujat týraly» Zańynyń 13-tarmaǵynda mynadaı sanattaǵy azamattarǵa Tólqujat berilmeıtini (shetelge shyǵýǵa tıym salynatyny) ashyq jazylǵan.
(Eger, shetelge shyǵý úshin ótinish bildirgen azamat:
1) Qytaı Halyq Respýblıkasynyń azamaty emes bolsa;
2) Óziniń kim ekendigin dáleldeı almasa;
3) Qujat alý barysynda jalǵan qujat jasap, alaıaqtyq istese;
4) Sottalyp, jazasyn óteýde bolsa;
5) Sottyń tolyq sheshimi shyqpaǵan isti adamdar bolsa;
6) Qylmystyq iske qatysy bar dep, jaýapqa tartylǵan kúmándi adam bolsa;
7) Memlekttik quzyrly mekemelerde qyzmet atqarǵan, shetelge shyqqan soń memleket qaýipsizdigine qater tóndiredi, zor shyǵyn keltiredi dep eseptelse, oǵan Tólqujat rásimdemeıdi)
Demek, qazirgi tańda Qazaqstan Respýblıkasyna qonys aýdaryp, azamattyq alyp jatqan qandastarymyz osy jeti ólshenip, bir kesilgen jeti túrli sózgiden ótip kelgen. Olardyń endi Qytaı Eline qaıta baryp, «Qazaqstan azamattyǵyn alýyna bolady!»-dep, ruqsat alýyna esh negiz joq. Jáne, ondaı anyqtama Qazaqstan Respýblıkasynyń Zańynda da talap etilmeıdi.
Qytaı Halyq Respýblıkasynyń joǵarydaǵy biz ataǵan zańdary tek qazaqtar úshin ǵana emes, búkil qytaıdaǵy 56 ult, onyń ishinde úlesi 97 paıyzdy ustaıtyn qytaı ultynyń múddesin kózdep jasalǵan. Qytaı memleketi óz azamattarynyń alys-jaqyn shetelderge shyǵýyna jáne onda turaqtap qalýyna óte múddeli.
Sondyqtan, qazirgi tańda, Qytaı Halyq Respýblıkasynyń «Azamattyq týraly» Zańyn AQSh-qa nemese Evropa elderine shyǵyp, turaqty tirkeýge turyp, azamattyq alyp jatqan ulty qytaı azamattarǵa sol memleketterdegi Qytaı Elshilikteriniń qalaı qoldanylyp jatqanyn anyqtaý bizdiń Serikjan Biláshulyna («Jarqyn-7»-ge) túk te qıyn emes.
Qysqasy, Qazaqstan azamattyǵyn alyp, Qytaı azamattyǵynan shyǵýǵa ótinish aıtyp kelgen qandastarymyzdyń qujatyn qabyldamaı, «Burynǵy kelgen ornyńnan ruqsat ákel, tirkeýden shyǵyp kel!»-deý – Qytaı Halyq Respýblıkasynyń Qazaqstandaǵy Respýblıkasyndaǵy Tótenshe jáne ókiletti elshisi ChJan Hanhýeıdyń qasaqana jasap otyrǵan saıası qysymy!
Keshe ǵana «Qytaı úshin Qazaqstan - dos, baýyrlas memleket. Biz eshqashan Qazaqstannyń múddesin, qazaq halqynyń ulttyq sezimin kemsitpeımiz. Yntymaqtastyq artqan saıyn túıtkilderdiń de kóbeıe túsetini belgili. Eń bastysy olardy sheshý. Sondyqtan, bul máseleni retteı alatynymyzǵa senińizder»-dep, zyryldaǵan ChJan Hanhýeı myrza shyn mánindegi bilikti elshi bolsa, arǵy bettegi qazaqtardy qoıa turyp, aldymen osy máseleni sheshýi, óz sózin isimen dáleldeýi kerek qoı!
Qytaıdyń qysymy jalǵyz bul ǵana emes, endi olar Qytaıdan kelip, Elimizdiń Joǵary oqý oryndarynda bilim alyp jatqan ulty qazaq stýdentterge de azýyz sala bastady. Olardan da «Jas muǵajyr» («Jas hýaıao») jasaýǵa kiristi. Kózimizdi baqyraıtyp qoıyp, Aı men Kúnniń amanynda Qytaı Elshiliginiń eki qyzmetkeri baıtaq Qazaqstandy emin-erkin aralap, Joǵary oqý oryndarynyń esigin silkip ashyp, óz úgit-násıhattaryn emin-erkin júrgizip jatyr. Mine, Taraz, Túrkistan, Astana, Óskemende kezdesýler ótkizip úlgirdi. «Abai.kz» aqparattyq portaly bastaǵan BAQ-tyń dabyl qaqqany bolmasa, quzyrly oryndardan «Áı!»-degen aja, «Qoı!» degen qoja bolǵan joq!
«Sender óte baqyttysyńdar! Senderdi Qytaı úkimeti osyndaı baqytqa ıe etti. Shetelde oqytyp, qamqorlyq jasady. Qytaı úkimeti senderden úlken úmit kútedi. Sender elge qaıtyp, jumys isteýge boryshtysyńdar. Qytaı úkimeti ózderińdi qaıda júrseńder de qorǵaıdy. Almaty jáne Astanada Qytaı elshilikteri bar. Ol senderdiń úıleriń. Sender kez kelgen ýaqytta osy úılerińe baryp, kómek ala alasyńdar. Qytaıshalaryń qalaı? Meniń baıqaýymsha, sender qytaıshany umytyp qalǵan sııaqtysyńdar. Qytaı tilin eshqashan umytpańdar jáne ony birinshi orynǵa qoıyp úırenińder. Sebebi, sender elge qaıtqanda joǵarǵy jalaqymen jumys isteısińder!»-depti bir kezdesýinde Qytaı Elshileri qanas stýdentterge.
Birinshiden, mundaı quqyqty olarǵa kim berdi?!
Ekinshiden, joǵaryda atalǵan JOO-nyń rektorlary qaıda qarap otyr?!!
Úshinshiden, Qazaqstan Respýblıkasynyń Bilim jáne ǵylym mınıstri nege bul máseleni óz baqylaýyna almaıdy?!!!
Suraq kóp...
Estýimizshe, Qytaı Elshiligi Qytaıdan kelgen stýdentterdiń bir bólimin Elshilikke jıi shaqyryp, «jemdep» qoıǵan kórinedi. Kezdesýler men jınalystardy uıymdastyratyn sol top eken. Telefon shalyp, jaǵdaı uǵysaıyn deseń, «... meni ne úshin izdedińiz? Qytaıdan kelgen stýdentterdi posolstvo aldyńǵy kúnderi bizge kıno kórsetip, tamaqtandyrdy. Al endi sizdiń meni izdegen sebebińizdi bilmedim. Men osy ret sharanyń qashan, qaıda bolatynyn ǵana jetkizdim...»-dep, taq-taq etedi bir qyzymyz. Sóıtip, Elimizdiń JOO-da oqyp jatqan qandas stýdentter «otanshyldar» jáne «qytaıshyldar» bolyp ekige bólinip alǵan.
Aıtpaqshy, Qazaqstandaǵy Qytaı Elshiligi bas bolyp, Qytaıdan kelgen stýdentterdiń uıymyn qurmaqshy kórinedi. Bugin «Uıym» qurǵan Qytaı, erteń Qytaı komýnıstik partııasynyń Qazaqstandaǵy ıacheıkalaryn quram demesine kim kepil?!
Negizi, shetel elshileri stýdenttermen kezdesý ótkizý úshin QR Syrtqy ister mınıstrliginiń kelisimin, odan qala berdi JOO restorynyń ruqsatyn alýy kerek qoı!
Eger, Elshilik qyzmetkerleri stýdentterdi jınalysqa shaqyrsa, ol stýdentter ózi oqyp jatqan oqý ornynyń basshylyǵyna málimdeýi shart!
Qudaıǵa shúkir, Qazaqstan Respýblıkasy – quqyqtyq memleket! Elimizdiń «Kóshi-qon týraly», «Azamattyq týraly» Zańnamalarynda sheteldegi qandastarymyzdyń Atajurtyna oralýyna, turaqtap qalýyna barynsha jeńildik qarastyrylǵan. Ásirese, sheteldegi qazaq jastarynyń Otanyna kelip, bilim alýyna tolyq shart-jaǵdaı jasalǵan.
Atap aıtar bolsaq, Qazaqstan Respýblıkasynyń «Bilim týraly» Zańynyń 66-babynda «1. Qazaqstan Respýblıkasynyń azamattary bolyp tabylmaıtyn ulty qazaq adamdardyń Qazaqstan Respýblıkasynda bilim alýǵa quqyǵy bar. 2. Memleket shet eldegi qazaq dıasporasynyń bilim alý qajettilikterin qanaǵattandyrýǵa járdemdesedi. 3. Shet eldegi qazaq dıasporasy úshin bilim berý uıymdaryn qurý jáne oǵan qarjylyq-materıaldyq kómek kórsetý halyqaralyq sharttarda belgilengen tártippen júzege asyrylady»-dep jazylǵan.
Odan syrt, Qazaqstan Respýblıkasy Úkimetiniń 2012 jylǵy 28 aqpandaǵy №264 Qaýlysynda mektep taýysqana talapkerler tehnıkalyq jáne kásiptik, orta bilimnen keıingi jáne joǵary bilimniń bilim berý baǵdarlamalaryn iske asyratyn bilim berý uıymdaryna oqýǵa túsý kezinde «4) Qazaqstan Respýblıkasynyń azamattary bolyp tabylmaıtyn ulty qazaq adamdar úshin – 2 paıyz;» jeńildik beriledi. Bul jeńildik ótken jyly Dúnıejúzi qazaqtarynyń besinshi quryltaıynda Elbasymyzdyń pármenimen 4 paıyzǵa kóbeıtildi.
Ol az deseńiz, «Halyqtyń kóshi-qony týraly» Zańynyń 5-taraýy túgelimen bilim alý maqsatynda kóship kelýshilerge arnalyp, etnıkalyq qazaq jastarynyń oqýǵa túsý sharttary, quqyqtary men mindetteri, vıza alý, azamattyqqa qabyldaý tártibi taıǵa basqan tańbadaı ashyq jazylǵan. Tipti, atalǵan Zańnyń 33-babynda oqýǵa túskennen keıin olardyń JOO jataqhanalaryna jaı jáne turaqty tirkeýge turyp, azamattyq alýyna da tolyq múmkindik jaratyp bergen Ult Kóshbasshysy Nursultan Ábishuly Nazarbaev!
Bir sózben aıtqanda, «Halyqtyń kóshi-qony týraly» zańy boıynsha Kóship kelýshilerdiń Qazaqstan Respýblıkasynda: 1) eger Konstıtýııada, zańdarda jáne halyqaralyq sharttarda ózgeshe kózdelmese, Qazaqstan Respýblıkasynyń azamattary úshin belgilengen quqyqtar men bostandyqtardy paıdalanýǵa; 2) Qazaqstan Respýblıkasynyń zańnamasynda belgilengen tártippen bilim, medıınalyq jáne áleýmettik kómek alýǵa; 3) Qazaqstan Respýblıkasynyń kóship kelýshilerdiń bolýy úshin ashyq aýmaǵy boıynsha erkin júrip-turýǵa; 4) Qazaqstan Respýblıkasynyń zańnamasynda belgilengen tártippen turǵylyqty jerin erkin tańdaýǵa; 5) ózine tıesili múliktik quqyqtaryn jáne múliktik emes jeke quqyqtaryn qorǵaý úshin sotqa jáne memlekettik organdarǵa júginýge; 6) osy qyzmet túrleri aqysyz negizde kórsetiletin oralmandardy jáne olardyń otbasy múshelerin qospaǵanda, oralmandardy beıimdeý jáne yqpaldastyrý ortalyqtarynda aqyly beıimdeý jáne yqpaldastyrý qyzmetterin alýǵa quqyǵy bar.
Al, osynyń bárin júzege asyrý úshin Qazaqstan Úkimeti ár jyly arnaıy qomaqty qarjy bóledi. Qyzmetker ornalastyrady...
Osy jerde stýdent ini-qaryndastaryma bir máseleni qadam aıtqym keledi. Asa mártebeli Elbasymyz Nursultan Nazarbaevtyń «Qaıda júrse de, qazaqtyń tarıhı otany bireý ǵana. Ol – Qazaqstan!»-degen sózin boıynda bir tamshy qazaq qany bar azamat esten shyǵarmaýy tıis! Shetelden kelip, joǵaryda aıtylǵan shart-jaǵdaı aıasynda bilim alyp jatqan qazaq jastary, meıli qaı memleketten kelse de, ózderin shetel azamaty sezinbeýi kerek! Esesine, Zańda berilgen quqyqtaryn tolyq paıdalanyp, Qazaqstan Respýblıkasynyń azamattyǵyn alýǵa asyqqany durys! Olar sonda ǵana artta qalǵan ata-anasyn, týys-týǵanyn Atajurtqa shaqyryp, basyn qosa alady (http://abai.kz/post/68502 ).
Bul – ata-ana jáne Otan aldyndaǵy tarıhı mindet!
Áýelgi sózimizge oralsaq, Uly Dala Elinde oqyp jatqan qandas stýdentterimizdiń turmysyna, saıası ómirine Qytaı Halyq Respýblıkasynyń Qazaqstandaǵy Tótenshe jáne ókiletti Elshisi ChJan Hanhýeıdyń «alańdaýyna» eshbir negiz de, sebep te joq. Alańdamasyn!!!
Eger, taǵy qaıtalap aıtaıyn, «Qytaı úshin Qazaqstan - dos, baýyrlas memleket. Biz eshqashan Qazaqstannyń múddesin, qazaq halqynyń ulttyq sezimin kemsitpeımiz. Yntymaqtastyq artqan saıyn túıtkilderdiń de kóbeıe túsetini belgili. Eń bastysy olardy sheshý. Sondyqtan, bul máseleni retteı alatynymyzǵa senińizder!»-degeni shyn bolsa, ChJan Hanhýeı myrza aldymen demalys kezinde Qytaıǵa ketip, oqý ornyna orala almaı otyrǵan 78 stýdenttiń (Múmkin, odan da kóp) (http://abai.kz/post/69361 ) qaıta kelip, bilimin jalǵastyrýyna yqpal etsin! «Balańdy shetelden nege oqytasyń?!»-degen syltaýmen Lagerlerde azaptalyp jatqan olardyń ata-analaryn bosatsyn!! Qazaqstan azamattyǵyn alǵan stýdentterdi sendeltpeı, Qytaı azamattyǵynan shyǵarsyn!!!
Bolmasa, óziniń arynyń aldynda, taǵy qaıtalap aıtaıyn, el ishine jik túsirmeı, qandastarymyzdy sergeldeńge salmaı, tabanyn jaltyratsyen!!!
Endi Joǵary oqý oryndarynyń rektorlary men Bilim jáne ǵylym mınıstri Erlan Saǵadıev týraly bir-eki aýyz sóz.
Biz «Kóshi-qon – Ult Kóshbasshysy Nursultan Nazarbaevtyń EL táýelsizdigin jarıalaýdan buryn jolǵa qoıǵan TUŃǴYSh hám ULY saıasaty! Nursultan Ábishulynyń kemeńger tulǵa, kóregen basshy ekenin tórtkúl dúnıege birden tanytqan da – osy alysta júrgen aǵaıyndy Atajurtqa shaqyrý týraly shyǵarǵan BATYL ári TARIHI sheshimi!»-degen sózdi únemi aıtamyz. Ár maqalamyzda qaıtalap otyramyz. Mine, shyr-pyr bolyp búgin taǵy jazyp otyrmyz...
Ókinishke oraı, Elimizdiń kóshi-qon saıasatyn, Ult Kóshbasshysynyń osy Uly eńbegin Joǵary oqý oryndarynyń rektorlary men Bilim jáne ǵylym mınıstri Erlan Saǵadıev dál bulaı baǵalamaıdy da, túsinbeıdi de eken!
«Abai.kz» aqparattyq portaly Qytaıǵa ketip, qaıtpaı qalǵan 78 stýdenttiń tizimin jarııalady (http://abai.kz/post/69361 ).
Bul – osynda oqyp jatqan qaıyrymdy stýdentterdiń ózderi anyqtap usynǵan tizimdik. Al, resmı san odan da kóp....
Eger, ýnıversıtet rektorlary men mınıstr Prezıdenttiń kóshi-qon saıasatynyń tarıhı astaryn, strategııalyq mańyzyn tereń túsinse, alystan kelgen aǵaıyndy jan-júregimen súıse, qol astynda oqyp jatqan stýdentterine ıe bolatyn edi ǵoı;
Eger, ýnıversıtet rektorlary Prezıdenttiń kóshi-qon saıasatynyń tarıhı astaryn, strategııalyq mańyzyn tereń túsinse, alystan kelgen aǵaıyndy jan-júregimen súıse, Qytaıǵa ketip, qaıta oralmaı qalǵan stýdentteriniń aıtyp, Bilim jáne ǵylym mınıstrine dabyl qaǵatyn edi ǵoı;
Eger, Bilim jáne ǵylym mınıstri Prezıdenttiń kóshi-qon saıasatynyń tarıhı astaryn, strategııalyq mańyzyn tereń túsinse, alystan kelgen aǵaıyndy jan-júregimen súıse, qytaılyq áriptesterimen – Qytaı Halyq Respýblıkasynyń Bilim mınıstrimen sóılesip, suraý salar edi ǵoı;
Eger, ýnıversıtet rektorlary men mınıstr Prezıdenttiń kóshi-qon saıasatynyń tarıhı astaryn, strategııalyq mańyzyn tereń túsinse, alystan kelgen aǵaıyndy jan-júregimen súıse, Qytaı Elshisi ChJan Hanhýeıdyń eki qyzmetkeri bulaı bilgenin istemes edi ǵoı;
Eger, ýnıversıtet rektorlary men mınıstr Prezıdenttiń kóshi-qon saıasatynyń tarıhı astaryn, strategııalyq mańyzyn tereń túsinse, alystan kelgen aǵaıyndy jan-júregimen súıse, Qytaıdyń saıası qysymyn bile turyp, qol astynda oqyp jatqan sol stýdentteridi jibermeı, osynda qalýǵa kómekteser edi ǵoı;
Eger, ýnıversıtet rektorlary men mınıstr Prezıdenttiń kóshi-qon saıasatynyń tarıhı astaryn, strategııalyq mańyzyn tereń túsinse, alystan kelgen aǵaıyndy jan-júregimen súıse, qandas stýdentterge rektorlar júrgizetin Otanshyldyq tárbıeni Qytaı Elshisi ChJan Hanhýeıdyń eki qyzmetkeri júrgizbes edi ǵoı!!!
JOQ!
Olardyń bul máselmen múlde bas aýyrtqysy kelmeıdi eken!!!
Men sońǵy on jyldan beri Elbasymyzdyń kóshi-qon saıasatynyń qoldaýshysy bolyp kele jatqan azamatpyn. Arnaıy zań kásibin oqymasam da kóshi-qonǵa qatysty Zańdar men Qaýlylardy ıgerip aldym. Sol sebepti, jaqsy bilem, Qazaqstan Respýblıkasynyń «Bilim týraly» Zańynyń 66-babynda aıtylǵan «Memleket shet eldegi qazaq dıasporasynyń bilim alý qajettilikterin qanaǵattandyrýǵa járdemdesedi», «Shet eldegi qazaq dıasporasy úshin bilim berý uıymdaryn qurý jáne oǵan qarjylyq-materıaldyq kómek kórsetý halyqaralyq sharttarda belgilengen tártippen júzege asyrylady»-degen normalaryn atqarý bylaı tursyn, «Halyqtyń kóshi-qony týraly» Zanyń 33-babyndaǵy bilim alý maqsatynda kelgen stýdentterdiń «turaqty turýǵa jáne jeńildetilgen tártippen (tirkeý tártibimen) Qazaqstan Respýblıkasynyń azamattyǵyna qabyldaý týraly ótinishhat berýge quqyǵy bar»-degen normasyn birde-bir Joǵary oqý orny atqarmaı otyr.
Tek, Astanadaǵy L.N.Gýmılev atyndaǵy Eýrazııa ulttyq ýnıversıteti men S. Seıfýllın atyndaǵy qazaq agrotehnıkalyq ýnıversıteti ǵana bir-eki stýdentke qoldaýhat bergen boldy. Onyń ózi meniń aıǵaıymmen, «Nur Otan» partııasynyń yqpalymen áreń júzege asty.
Al, aqsaqal ýnıversıtet Ál-Farabı atyndaǵy QazUÝ-dan bastap, qalaǵan oqý oryndary, mine, Zań jobasy qoldanysqa engeli eki jylǵa taıady, bulk eter emes!
Baıqus stýdentter ózi turǵan qaladan bastap, alys aýdandar men oblystarǵa turaqty tirkeýge turyp, azamattyqqa qujat tapsyrýda...
Munyń bári tirkeý týraly zańǵa qaıshy!
Qanshama márte aıtyldy, jazyldy, ýnıversıtet rektorlary men mınıstr, eń quryǵanda, osy máseleni sheship berýge jaramaı otyr!
Quqyqtyq memleket quryp jatyrmyz dep, qulaǵyńdy tundyratyn rektorlar men mınıstrdiń áýselesi osy, aǵaıyn!
Aýyt Muqıbek
Astana
Abai.kz
