Qoǵam qaıratkeri ári kásipker Arman Shoraev belgili medıa menedjer Armanjan Baıtasovtyń Baitassov LIVE Youtube arnasyna bergen suhbatynda qazaqtardy "ultshyldar" dep kinálaıtyndarǵa jaýap berdi. Bul týraly "Adyrna" ulttyq portaly jazady.
"Olar bizde ultshyldar bar deıdi. Keshirińiz, Reseı azamattyǵyn alý úshin siz orys tilinen emtıhan tapsyrýyńyz kerek. Qazaqstanda mundaı joq qoı. Áli kúnge deıin bul talap qoıylmady. Sonymen bizdiń qaısymyz kóbirek ultshyl ekenbiz? Latvııada da Latvııa azamatynyń jáne azamattyǵy joq adamnyń tólqujaty bar. Iaǵnı, Latvııa azamaty ataný úshin latysh tilinen emtıhan tapsyrý qajet. Eger Latvııanyń tarıhyn bilmeseń, Latvııa azamatynyń tólqujatyn ala almaısyń. Bizde ondaı joq. Sondyqtan, meniń oıymsha, bul aıyptaýlardyń bári negizsiz", - dedi Arman Shoraev.
Onyń aıtýynsha, elimizdegi barlyq etnos ókilderin tek qazaq tili biriktiredi.
"Bizdi tek óte ádemi, kórkem ári baı til - qazaq tili ǵana biriktire alady. Meniń ishimde bir emes eki adam bar. Men qazaq tilin jetik bilemin, tarıhymdy tanımyn jáne onymen maqtanamyn. Elimizde turatyn kez kelgen adam, kez kelgen ult ókili ony úırene alady dep oılaımyn. Eger ol qazaq tilin jetik meńgerse, qazaq bul kisini eń qurmetti oryndarǵa otyrǵyzatyn bolady. Oǵan eń dámdi degen taǵamdardy usynyp, syı kórsetedi. Sondyqtan, men bul jerde artyqshylyqtardan basqa, eshqandaı kemshilik kórip turǵanym joq", - dep málimdedi qoǵam qaıratkeri.
"Adyrna" ulttyq portaly
