QUTTY BOLSYN MEREKEŃ!
Kóktem sezim syılaǵan,
Sharapty sol quı, maǵan.
Qutty bolsyn merekeń
Aınalaıyn syıly adam!
Basty meniń tilegim -
Kúlmes kezde kúle bil.
Basqa bárin jeńesiń,
Sen bıiksiń, bilemin.
Qol jetpeıtin baǵymsyń,
Qurban caǵan janym shyn.
Artyq ketsem, keshirgin,
Tilek búgin aǵylsyn.
Shirkin-aı, sol saǵym kún,
Kórmesem seni saǵyndym.
Júregiń netken keń edi,
Sımvolyndaı sabyrdyń.
Kóńil degen – shyny, aına
Teńelsin bir kún myń aıǵa.
Qaryzdarmyn qashan da
Syılaǵan seni qudaıǵa.
MATA BOLYP MASKAŃA JARALMADYM
Kúnniń kórkin ádemi tań ashady,
Búgin kórdim taǵy sol tamashany.
Qyzyl kıseń, qyzǵaldaq, qyr gúlisiń,
Aq pen qara – bári de jarasady.
Kóbi bilmes júrekte jaram baryn,
Daýa sharap boıǵa da taralǵanyn.
Nege ǵana men seniń ıegińde
Mata bolyp maskańa jaralmadym?!
JÚREGIM EMES FOTOAPPARAT
Bolsa-daǵy Almaty muńshyl qala,
Bul kúnderdi bermespin myń jylǵa da.
Betiń basyp kúlimdep sen turasyń,
Syr sherteıik, qaıtesiń qymsynba da.
Seni kórsem umytam bárin jalǵan,
Óziń – dertim, daýam da, ánim salǵan.
Duǵa syndy esimiń, ataı qalsam,
Kúrsingende qınalyp janym qalǵan.
Tolqyp ketem turǵanda saǵan qarap,
Táp-tátti bir sábısiń botaqan aq.
Kúlgen árbir sátińdi túsiretin,
Emes, átteń, júregim fotoapparat!
ÓMIRIMNIŃ PAROLI
Quıyp qoıǵan tal músin,
Netken sulý bolmysyń?!
Qylyǵyńa tánti etken
Táp-tátti sen balmysyń?!
Shárbatpysyń shól basar,
Bulaqpysyń kólge ulasar?
Aýamysyń bir jutym,
Máńgi ómirge jalǵasar?
Júregim meniń jaraly,
Qýanysh, muńy bar áli.
Jalǵyz seniń esimiń -
Ómirimniń paroli…
VATSAPTAǴY ÚTIR
Úzbegen soń kúderdi,
Kún artynan kún erdi.
Saýsaqtaryń keshe bir
Útir basyp jiberdi.
Kóńildegi sol útir,
Ketpeı oıdan áli júr.
Tynys ashar bir belgi
Júregimmen jymy bir.
Kóp núkte emes, bul – útir,
Lep ákeler jyly bir.
Saraıyńdy ashatyn
Bastaýyndaı shyn ómir.
Joǵaltyp keıde jaqsy atty,
Bolamyn saǵan mas qatty.
Demeý qylyp qaraımyn
Telefondy, vatsapty.
Telefonym - tumarym,
Úndemesten uǵar ún.
Vatsappenen jetkizer
Júregimniń juparyn.
BIIK ShYŃNYŃ ATAÝY
Jazylmaǵan dastanym,
Sen syıladyń basqa kún.
Dıdaryńdy kútkende
Ýaqyt jalqaý qas-qaǵym.
Seni oılaý - syrlastyq,
Seni kútý - bir mastyq.
Bizdi osylaı jaratqan
Alys jaqyn, muńdas ǵyp.
Kórmeı qalsam osy udaı,
Tún - joldasym, dosym - aı.
Sýretińmen sóılesip
Otyramyn osylaı.
Sen ózgeshe, basqasyń,
Bıik taýsyń, basqa shyń.
Shirkin, seni kórgende
Toqtatsa ýaqyt taspasyn!
Múlde bólek maqamyń,
Oıǵa tereń batamyn.
Saǵan arnap qoıamyn
Bıik shyńnyń ataýyn.
GÚL ShAShAǴY – KEKILIŃ
Qaraımyn da júzińnen kúndi kórem,
Qalaı ǵana jaratqan gúldi degem…
Qaraǵanda qýanyshqa bóleıtuǵyn
Óziń – gúlsiń náp-názik úlbiregen.
Japyraǵyń ár taly bir-bir átir,
Mas qylatyn hosh ıis myń kún ańqyr.
Sony júrek máńgilik jyr qylatyn,
Bar álemdi esinen tandyrar bir.
Tabıǵat ta, adam da eljiregen,
Bıyl mine, kóktemsiz jer jibigen.
Kúndiz-túni ketpeıdi kóz aldymnan
Gúl shashaǵy - kekiliń jelbiregen.
[caption id="attachment_106165" align="alignnone" width="1024"]
foto avtory: Qýanyshbek Qarı[/caption]
JANARYŃ SENIŃ BIR MUHIT
Janartaý - seniń kózderiń,
Kózińe qaraý ózi de muń.
Órtep jandy barady,
Aıta almaımyn sózben myń.
Tuńǵıyqsyń, tereńsiń,
Júrekke jalǵyz Sen emsiń.
Qonaǵyń bolam kúnde men
Esik ashyq degensiń.
Kórmesem seni sansyrap,
Jan qalady jalǵyzsyrap.
Janaryńnyń móldiri
Júrektegi shamshyraq.
Bilmegem munyń syryn da,
Kórmegem mundaı buryn da.
Janaryń seniń – bir muhıt
Ashylmaǵan ǵylymda.
SÁÝLEM
Keýde toly bir sezim aıta almaıtyn,
Tolqyn syndy jutylyp qaıta almaıtyn.
Júrekke bir, kóringen tasqa da bir
Atyń jazyp taýda bir aıqaılaıtyn.
Kúıde júrmin kóp boldy osyndaı bir,
Kórgenim men sezgenim qosylmaı júr.
Orta jasqa kelgende jas baladaı
Órekpigen kóńil-kúı, tosyn jaı bul!
Qol jetpeıtin armansyń, qylyqty qyz,
Esten ketpes ótken sol qyzyqty kúz.
Júrmiz áli ortada saqtap qalaı
Shekten aspas qyzyl tús syzyqty biz?!
Amalyń joq, taǵdyrǵa baǵynasyń,
Jansaraıyń nurlanyp saǵynasyń.
Endi ǵana túsingen tárizdimin
“Sáýlem” degen bir sózdiń maǵynasyn.
JAN BEREMIN OILANBAI
Taǵy da mine, tań atty,
Taýysyp tózim, taǵatty.
Kekilińdi kóretin
Kútip mınýt, saǵatty.
Baqytty sekýnd, qaıdasyń,
Qandaı bir meken-jaıdasyń?
Jarq etshi bir aldymnan,
Juldyzdy sát jaınasyn!
Ketsem janyp ot bolyp,
Táńir joldas aqqa anyq.
Ózińdi kórgen mınýtym -
Ǵasyrym meniń jap-jaryq!
Jelbirese kekiliń,
Basyp kóńil tetigin.
Jan beremin oılanbaı
Jolyńda qurban endi kim?!
ÁR SEKÝNDIM - ÓZIŃSIŃ
Ketpeısiń esh oıymnan,
Qanmenen tarap boıymnan.
Jaratqanda osylaı
Táńirdiń isi qoıylǵan.
Zyryldap ýaqyt, kelmes kún,
Súıe almas mendeı seni eshkim.
Aıyǵarda mastyǵym
Jas kúnim bop kezdestiń.
Buryn qaıda bolǵansyń,
Baǵy bop kimniń qonǵansyń?
Janymnyń árbir tynysy
Sálem bop saǵan joldansyn.
Sýretińe qaraımyn,
Shalyp bir basyn ár oıdyń.
Esimińmen ataımyn
Árbir kúnin ár aıdyń.
Imandaı saǵan sózim shyn,
Ár sekýndym – ózińsiń!
Tynys alsam bir sensiz
Úzdigip demim úzilsin!
QOLYŃ SÚIDIM
Jalǵyzsyrap janym seni ańsaıdy,
Baýyr basyp birge ótkizdik qansha aıdy.
Jylytatyn júregim bar tońsa aıdy,
Biraq endi kezip júrmin taý, saıdy.
Kórgim kelmeı kúndiz kún men túnde aıdy,
Torlap aldy táýlikterdi muń-qaıǵy.
Kóz jasymen jýyp tańǵy áınekti
Kóńil qaıta kúrsinispen býlaıdy.
Jan qoıarǵa jer tappadym sendelip,
Sandyraqtap birdeńe aıttym sherlenip.
Tún kúzettim, shoshyndym da qalǵysam,
Qutqarmasań bolmaıtyndaı sen kelip.
Umyta alman nazaryńdy sol kúngi,
Umyta alman sol kúndegi salqyndy.
Surap alyp qolyń súıdim sol sátte,
Janym qus bop ushatyndaı talpyndy.
ATAP ÓTEM KÚLKIŃDI
Umytpaspyn bul kúndi,
Júrek taǵy bulqyndy.
Ashyq jarqyn jymıǵan
Atap ótem kúlkińdi.
Sebezgilep shýaq tym,
Bul kúlkińdi unattym.
Tuńǵysh seni kórgendeı,
Kúlkiń kórip qulappyn.
Jańarǵandaı bul júrek,
Ketti qatty eljirep.
Myzǵymaımyn men endi
Dese-daǵy sel júred.
Táńir, saǵan myń alǵys,
Kúninde myna munar qys.
Qoınyma syımaı qýanysh
Bolǵandaı sirá, synaldy is.
Qudaıdyń bul sheberi,
Kúlkiń – kúnniń jelegi.
Búgingi bul kúlkińdi
Atap ótkim keledi.
SENIŃ KÓShEŃ
Óziń kórgen saıabaq,
Tań nurymen boıamaq.
Óziń júrgen kósheni
Únsiz kelem aıalap.
Kóńildi shattyq jaılasyn,
Ótse de jyldar, qaı ǵasyr.
El uıqyda, men oıaý,
Qaıdasyń, óziń, qaıdasyń?
Kósheńnen seniń kúnde ótem,
Ótemin keıde túnde men.
Ózińniń basqan izińniń
Sýretin salam kúnde men.
Bóleksiń tym basqadan,
Qyzara ma bosqa adam?!
Óziń júrgen kósheniń
Iti de úrgen dos maǵan!
SENIŃ KÚLKIŃ
Tandyrar esten bir tynbaı,
Kúlkińdi-aı, seniń kúlkińdi-aı!
Shydaıdy qalaı toqtamaı
Búlkildek júrek bulqynbaı.
Kúlkiń-aı seniń shirkin-aı,
Dámin bir tatsa bir kún-aı.
Shyryn ba eken táp-tátti
Búldirgen álde qulpynaı?!.
Tap-taza taýdyń bulaǵy,
Janyńnyń jarqyn bul áni.
Aı da, kún de bir saǵan
Ǵashyq bolyp turady.
Rııasyz kúlkiń bal-sheker,
Jaratqan qudaı jan sheber.
Kúlkińdi qushyp súıer em
Aımalaýǵa bolsa eger.
ÓMIR TÁTTI
Torǵyn-elik taǵdyrym,
Osylaı este qal búgin.
Sener-senbes kúıdemin,
Ótkerip sezim jańbyryn.
Qońyraýdaı kúmis ún,
Júregimniń Kúnisiń.
Sen bolmasań qaıter em,
Ómir súrem kim úshin?
Ǵajap seniń kúlgeniń,
Baǵalanar gúlge myń.
Qaraǵanyń – qazyna
Ǵajap kúnim bul meniń!
Joǵaltar tipti gúl esin
Kórgende seni, bilesiń?!
Atyńdy aıtam myń márte
Ómirden qymbat bul esim!
Senimen ótken sátterim
Estelik - kóńil dápterim.
Qylyǵyndaı erkeniń
Ómir netken tátti ediń?!
ANASYNYŃ QÝYRShAǴY
Kúlkiń-aı, seniń kúlkiń-aı,
Ońnan týar sol kúni aı.
Kúlkińdi estip juldyz da
Jymyńdamas tolqymaı.
Náp-názik netken jan ediń,
Daýsyń shýaq, ádemi ún!?
Janaryń – nurdyń uıasy,
Ertegi – jan álemiń.
Tóńiregiń gúl shoǵy,
Ómirdiń qyzyq bul shaǵy.
Cúıkimdisiń sen netken,
Anasynyń qýyrshaǵy!?
Kóshpendi QONYS,
"Adyrna" ulttyq portaly
