Almatyda «Bılım beru jüiesınıŋ özektı mäselelerı» taqyrybynda bılım basqarmasynyŋ keŋeitılgen otyrysy öttı. Jiynǧa qala äkımınıŋ orynbasary Abzal Nükenov töraǧalyq ettı. Otyrycqa Prokuratura, bılım sapasyn qamtamasyz etu departamentınıŋ, sanitariialyq-epidemiologiialyq baqylau qyzmetınıŋ, polisiia jäne tötenşe jaǧdailar departamentterınıŋ ökılderı, sondai-aq memlekettık jäne jekemenşık mektepterdıŋ, mektep-internattardyŋ, qosymşa bılım beru ūiymdarynyŋ basşylary qatysty.
Mäjılıs barysynda bılım beru ūiymdarynda zaŋdylyq pen qauıpsızdıktı qamtamasyz etuge jauapty salalyq vedomstvolardyŋ baiandamalary tyŋdaldy. Qatysuşylarǧa baqylau-qadaǧalau şaralarynyŋ qorytyndylary, bılım sapasynyŋ syrtqy baǧalauynyŋ nätijelerı, profilaktikalyq jäne tärbielık jūmystardyŋ jai-küiı, sanitarlyq jäne ört qauıpsızdıgı normalarynyŋ saqtaluy turaly esepter ūsynyldy. Sonymen qatar oqu üderısıne jürgızılgen keşendı monitoringtıŋ qorytyndylary tanystyryldy. Jekelegen mektepterdıŋ basşylary anyqtalǧan zaŋ būzuşylyqtar boiynşa tüsınıkteme berıp, olardy joiu maqsatynda qabyldanǧan şaralar turaly baiandady.
Belgılı bolǧandai, bügıngı taŋda elımızde «Zaŋ jäne tärtıp» qaǧidatyna erekşe män berılıp otyr. Osyǧan bailanysty Abzal Nükenovtyŋ aituynşa, «balalarǧa adaldyqty, qoǧamdyq ömırdıŋ normalary men erejelerın mektep qabyrǧasynan bastap darytu qajet».
Sondai-aq qala äkımınıŋ orynbasary inkliuzivtı bılım berudı damytudyŋ maŋyzdylyǧyna toqtalyp, bılım beru ūiymdarynda ädıstemelık jäne kadrlyq qamtamasyz etu jūmystaryn küşeitudı ūsyndy. Abzal Nükenov pedagogtardy, onyŋ ışınde äsırese jekemenşık mektepterdıŋ mūǧalımderın oqytu üderısıne barynşa jauapkerşılıkpen qarap, sapaly bılım berudı qamtamasyz etuge şaqyrdy.
Qala äkımınıŋ orynbasary qūramyna audan äkımderınıŋ orynbasarlary, mektep ökılderı, iuvenaldy polisiia qyzmetkerlerı, äleumettık qyzmetter ökılderı kıretın jūmys tobyn qūrudy ūsyndy. Atalǧan top mektepterdegı qauıpsızdık mäselelerı boiynşa aldyn alu baǧytynda jūmys ıstep, qalalyq qūrylymdar arasyndaǧy kommunikasiiany jolǧa qoiumen ainalysatyn bolady.
Keŋes qorytyndysyn şyǧara kele, Abzal Nükenov oquşylar arasynda tärbie jūmysyna jäne azamattyq qūndylyqtardy qalyptastyruǧa baǧyttalǧan şaralarǧa erekşe köŋıl böludıŋ qajettıgın atap öttı. «Memleket balalardyŋ bılım aluyna barlyq jaǧdai jasap otyr. Bız üşın eŋ bastysy – jüzege asyrylyp jatqan baǧdarlamalardyŋ naqty nätije beruın qamtamasyz etu. Mektep direktorlarynyŋ moinynda ülken jauapkerşılık tūr, sondyqtan öz jūmystaryna syn közben qarap, tuyndaǧan mäselelerdı der kezınde şeşudı sūraimyn», – dedı ol.
Otyrysta öskeleŋ ūrpaqty «Taza Qazaqstan» jalpyūlttyq ekojobasyna keŋınen tartu mäselesıne airyqşa köŋıl bölındı. Osyǧan orai Almaty qalasy äkımınıŋ orynbasary qaladaǧy barlyq mektepterde «Taza mektep – taza qoǧam» bastamasyn engızudı tapsyrdy. Jobanyŋ negızgı maqsaty – balalardyŋ ekologiialyq mädenietın qalyptastyru, qorşaǧan ortanyŋ tazalyǧyna jeke jauapkerşılık sezımın arttyru, är adamnyŋ ädıl ärı ekologiialyq tūraqty qoǧam qūrudaǧy rölın tüsındıru.
«Orta tazalyǧy», «sana tazalyǧy» jäne «qol tazalyǧy» – būl özara tūtasqan üş maqsat, jäne olar öskeleŋ ūrpaqty tärbieleudıŋ basty qaǧidattaryna ainaluy tiıs, – dedı ol.
Sonymen qatar, basym baǧyttardyŋ qatarynda qarjylyq tärtıp, memlekettık satyp aludyŋ aşyqtyǧy, zaŋdylyq pen qūqyqtyq tärtıptı saqtau mäselelerı de atap ötıldı. Jasöspırımder arasynda zaŋ būzuşylyqtyŋ aldyn alu da negızgı taqyryptardyŋ bırı boldy. Būl rette pedagogtar men psihologtardyŋ bırlesken jūmysynyŋ maŋyzy erekşe ekenı atap ötıldı. Qala äkımınıŋ orynbasary köterılgen mäselelerdı şeşu üşın naqty ıs-şaralardy qamtityn jol kartasyn äzırleudı ūsyndy jäne Almatynyŋ bılım beru salasyndaǧy köşbasşy retındegı ornyn saqtap qalu qajettıgın erekşe qadap aitty.
A. Nükenov, sonymen bırge, balalarda syni oilau daǧdylaryn qalyptastyru jäne ideologiialyq qūndylyqtardy nyǧaitu qajettıgıne nazar audardy. Onyŋ aituynşa, «Adal azamat» baǧdarlamasy jauapkerşılıgı joǧary azamatty tärbieleude maŋyzdy röl atqarady.
Öz kezegınde Almaty qalalyq Bılım basqarmasynyŋ basşysy Sairan Saifedenov tärbie üderısı ata-analardyŋ belsendı qatysuyn talap etetının tılge tiek ettı. «Bala otbasynda ne körse, sony boiyna sıŋıredı. Mektep öz funksiialaryn oryndaidy, alaida memleket ata-ananyŋ ornyn basa almaidy. Ortaq küş-jıger ǧana denı sau, bılımdı ärı şyǧarmaşyl ūrpaq tärbieleuge mümkındık beredı», – dedı ol.
Jiyn qorytyndysy boiynşa bılım beru üderısınıŋ sapasyn arttyruǧa, vedomstvoaralyq özara ıs-qimyldy küşeituge, balalar üşın qauıpsız ärı jaily orta qalyptastyruǧa baǧyttalǧan naqty şaralardy közdeitın rezoliusiia qabyldandy.
