Atyshýly aqyn Baltabek Nurǵalıev bul joly tuńǵysh prezıdentke «Uly dalanyń monology» atty arnaý jazdy, dep habarlaıdy "Adyrna" ulttyq portaly.
"Tań atpaıyn dese de, Kún qoımaıdy» halyq danalyǵy. Biz – Uly Dalanyń balalarymyz. Elbasy", - dep jazdy aqyn Baltabek óziniń feısbýk paraqshasynda. Oqımyn degen jurtqa mine:
Elbasy
Uly Dala – ulan-baıtaq Dalamyn!
Tálim ettim Tarıhtyń mol sabaǵyn.
Janaryma qamshy tıdi qansha ret,
Jylaı-jylaı, aǵa jazdap janarym!..
Men – Dalamyn – eljiretken aspandy,
Men – Dalamyn – tolǵandyrǵan asqardy.
Bodandyqtyń jaryp ótip túnegin,
Kúnim shyǵyp, ǵajap ǵumyr bastaldy!
Jan qýandy, júregime jyr qonyp,
Ultyn súıgen ujdany zor ul kórip.
Tań-Bostandyq atqanyna kýámyn,
Nazarbaev Nursultanym Kún bolyp!
Qaısar halqym Qazaǵyma senem men,
Bul álemde Qazaq barda – men ólmen.
Qazaǵymnyń Tańy boldy Bostandyq,
Kún qoımady, Tań atpaıyn degenmen!
Álem kórdi Qazaǵymnyń aıbaryn,
Tuńǵysh márte Prezıdentin saılaýyn.
Nursultanym kósh bastady jarqyrap,
Berekemniń bıik tigip baıraǵyn!
Nursultanym dáýletti qyp kóshimdi,
Memlekettik mereıimdi ósirdi.
Jappaı qyryp joıatuǵyn qarýdy,
Taratpaýǵa qabyldady sheshimdi!
Bostandyq bar! Esh sebep joq úrkinge!
Bostandyq bar! Endi, tilim, irkilme!
Bólinbeıdi Bostandyq pen Elbasy,
Tań men Kúnniń bólinýi múmkin be?!
Nuryn shashyp, saýyn aıtyp bar mańǵa,
Elbasym kep Elordany salǵanda,
Álem tanyp Keńdigi men Eldigin,
Dúıim qazaq qol jetkizdi armanǵa!
Elbasym bar – jeńisterge bastaǵan,
Men erkinmin, endi kimnen jasqanam?!
Yntymaqtan yrys jasap keledi
Saryarqada asqaq turǵan astanam!
Elim kýá! Uly Dala atandym!
Qushaǵym keń, qasıetti Otanmyn!
Týym meniń kók aspandaı kórinip,
Jelbirep tur tóbesinde jahannyń!
Aqıqatqa aınaldy ǵoı armanym,
Órkendedim, gúl-gúl jaınap jan-jaǵym!
Qazaǵymnyń máńgi bolsyn Eldigi,
Jasaı bersin Bostandyǵym – Tań-Baǵym!
Táýelsiz bop, kótergenbiz Tý alǵash,
Jańalyqqa júrek qalaı qýanbas?..
Eldigimiz Elbasymen qalandy,
Er eńbegin eshkim joqqa shyǵarmas.
Degeni ras: "Qazaqstanym gúldesin!",
Oılap ylǵı memlekettiń múddesin.
Otyz jylda sińirdi ǵoı zor eńbek,
Myǵym etip elimizdiń irgesin!
Jansózim bul, júrektegi jazýym,
Júrekterge jetsin meniń áz únim.
Uly Dala – mendik esim erekshe,
Esim bergen Elbasyǵa razymyn!, - dep jazdy Baltabek Nurǵalıev óz Facebook paraqshasynda.
"Adyrna" ulttyq portaly
