ساۋد ارابياسىندا وتكەن One Water سامميتىندە قازاقستان رەسپۋبليكاسىنىڭ سۋ رەسۋرستارى جانە يرريگاتسيا مينيسترلىگى، فرانتسيانىڭ دامۋ اگەنتتىگى (AFD) جانە فرانتسيانىڭ گەولوگيا جانە تاۋ-كەن زەرتتەۋلەرى بيۋروسى (BRGM) ۇشجاقتى ىنتىماقتاستىق تۋرالى كەلىسىمگە قول قويدى، دەپ حابارلايدى "ادىرنا" ۇلتتىق پورتالى قر سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنە سىلتەمە جاساپ.
سامميتكە قازاقستان پرەزيدەنتى قاسىم-جومارت توقاەۆ پەن فرانتسيا پرەزيدەنتى ەممانۋەل ماكرون قاتىستى.
بۇل قۇجاتتىڭ ماقساتى – بالقاش كولىن ساقتاۋ سالاسىنداعى ىنتىماقتاستىقتى دامىتۋ. قر سۋ رەسۋرستارى جانە يرريگاتسيا مينيسترلىگىنىڭ اتىنان كەلىسىمگە قول قويۋ راسىمىنە ءبىرىنشى ۆيتسە-مينيستر بولات بەكنياز قاتىستى.
كەلىسىم اياسىندا بالقاش كولىنىڭ سۋ رەسۋرستارىن باسقارۋدى دامىتۋ ءۇشىن سۋ رەسۋرستارى جانە يرريگاتسيا مينيسترلىگىنە 1,35 ميلليون ەۋرو كولەمىندە گرانت بولىنەدى.
فرانتسۋز تاراپى بالقاش كولىنىڭ باسسەينىنە اۋقىمدى زەرتتەۋ جۇرگىزىپ، ونىڭ ناتيجەلەرى بويىنشا 2040 جىلعا دەيىنگى ۇزاق مەرزىمدى باس جوسپار ازىرلەيدى. بۇل جوسپار ىشكى سۋ رەسۋرستارىن ساقتاۋ شارالارىن قامتيدى.
سونىمەن قاتار، مينيسترلىك BRGM ۇيىمىمەن سۋ رەسۋرستارى سالاسىنداعى ءوزارا تۇسىنىستىك تۋرالى مەموراندۋمعا قول قويدى. قۇجات وسى سالاداعى ەكىجاقتى ىنتىماقتاستىقتى دامىتۋعا باعىتتالعان.
— AFD جانە BRGM ۇيىمدارىمەن ۇشجاقتى كەلىسىم بالقاش كولىنىڭ باسسەينىندەگى سۋ رەسۋرستارىن زەرتتەۋ مەن تۇراقتى باسقارۋعا باعىتتالعان. قۇجات سۋ ساپاسىن ولشەۋ مەن تالداۋ، كليماتتىق جانە انتروپوگەندىك اسەرلەردى مودەلدەۋ، سونداي-اق 2040 جىلعا دەيىنگى سۋ بالانسىنىڭ بولجامىن قامتيدى. زەرتتەۋ ناتيجەسىندە وزەندەردى تازارتۋ، توپىراقتىڭ دەگراداتسياسى مەن سۋدىڭ لاستانۋىن بولدىرماۋ، بالىق شارۋاشىلىعى مەن ەكولوگيالىق ءتۋريزمدى دامىتۋ، سونداي-اق كولدى قورعاۋعا ارنالعان نورماتيۆتىك-قۇقىقتىق بازا قۇرۋ بويىنشا شارالار جۇزەگە اسىرىلادى، – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
