وڭتۇستىك كورەيانىڭ بيلىكتەگى "حالىق كۇشى" پارتياسىنىڭ ليدەرى حان دون حۋن پرەزيدەنت يۋن سوك يولدەن اسكەري جاعداي ەنگىزگەنى ءۇشىن وتستاۆكاعا كەتۋىن تالاپ ەتتى جانە مەملەكەتتىڭ باسشىسى ەل ءۇشىن ۇلكەن قاۋىپ ءتوندىرىپ وتىر دەپ مالىمدەدى. بۇل تۋرالى 6 جەلتوقسان كۇنى AFP اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اگەنتتىكتىڭ مالىمەتىنشە، بۇل پىكىر پرەزيدەنتتىڭ يمپيچمەنتىنە جەتكىلىكتى داۋىس جينالۋىنا ىقپال ەتەتىنى ءسوزسىز، ال داۋىس بەرۋ 7 جەلتوقساندا وتەدى.
AFP بۇعان دەيىن حان دون حۋن 5 جەلتوقسان كۇنى يمپيچمەنتتى توقتاتا الاتىنىن مالىمدەگەنىن ەسكە سالدى. الايدا بۇل شەشىمىنە مەملەكەت باسشىسى ءوز ارەكەتىنىڭ قاتەلىگىن مويىنداۋدان باس تارتۋى سەبەپ بولعان.
"جاڭا دەرەكتەردى ەسكەرە وتىرىپ، مەنىڭ ويىمشا، پرەزيدەنت يۋن سوك ءيولدىڭ قىزمەتىنەن شۇعىل تۇردە بوساتىلۋى قاجەت، سەبەبى بۇل وڭتۇستىك كورەيا رەسپۋبليكاسىن جانە ونىڭ حالقىن قورعاۋ ءۇشىن اسا ماڭىزدى", – دەدى پارتيا باسشىسى.
ول پرەزيدەنتتىڭ اسكەريلەرگە قاتىستى ەشقانداي شارا قولدانباعانىن اتاپ ءوتتى.
”ولار زاڭسىز ارالاسقان. ودان بولەك، پرەزيدەنت بۇل زاڭسىز اسكەري جاعدايدىڭ قاتە ەكەنىن مويىندامايدى", – دەدى حان دون حۋن.
ونىڭ پىكىرىنشە، پرەزيدەنت اسكەري جاعداي كەزىندە كونتربارلاۋ باستىعىنا بىرنەشە نەگىزگى ساياساتكەرلەردى "مەملەكەتكە قارسى ارەكەت ەتۋ" ايىبى بويىنشا تۇتقىنداۋدى بۇيىرعان.
"وسىلايشا، ەگەر پرەزيدەنت يۋن پرەزيدەنتتىك قىزمەتتى جالعاستىرسا، ەلدە قازىرگى توتەنشە جاعداي سياقتى ەكسترەمالدى ارەكەتتەر قايتالانۋى مۇمكىن. بۇل وڭتۇستىك كورەيا مەن ونىڭ ازاماتتارىنا ۇلكەن قاۋىپ توندىرەدى", – دەپ قوستى ول.
وڭتۇستىك كورەياداعى ەڭ ءىرى وپپوزيتسيالىق كۇش - "توبۋرو" دەموكراتيالىق پارتياسى 4 جەلتوقساندا پرەزيدەنتتى يمپيچمەنتكە ۇشىراتۋدى جوسپارلاپ وتىرعانىن مالىمدەدى. پارتيا پرەزيدەنتكە، قورعانىس جانە ىشكى ىستەر مينيسترلەرىنە، سونداي-اق "اسكەري جاعدايدى باسقارعان جانە پوليتسيا باسشىلارى سياقتى نەگىزگى اسكەري جانە پوليتسيا وكىلدەرىنە" كوتەرىلىس ايىبىن تاعايىندايتىنىن قوستى، دەپ حابارلادى AFP اگەنتتىگى.
وعان دەيىن يۋن سوك يول اسكەري جاعداي رەجيمىنىڭ ارەكەت ەتۋ مەرزىمى اياقتالعانىن جاريالاعان بولاتىن، بۇل رەجيمدى ءوزى بىرنەشە ساعات بۇرىن ەنگىزگەن.
ودان بۇرىن، ەل پارلامەنتى - ۇلتتىق اسسامبلەيا اسكەري جاعداي رەجيمىنە قارسى شىقتى. Reuters اگەنتتىگىنىڭ مالىمەتىنشە، 3 جەلتوقسان كەشكە، 300 دەپۋتاتتىڭ 190-ى پارلامەنت عيماراتىنا قورشاۋدى بۇزىپ ءوتىپ، اسكەري جاعداي رەجيمىن جويۋعا داۋىس بەرگەن.
