دەپۋتات اسحات ايماعامبەتوۆ جۇمىس ىستەيتىن زەينەتكەرلەردى ەڭبەك مينيسترلىگىنىڭ مەملەكەتتىك زەينەتاقىدان ايىرۋ تۋرالى ۇسىنىسىن سىنعا الدى، دەپ حابارلايدى «ادىرنا» ۇلتتىق پورتالى.
ونىڭ ايتۋىنشا، بۇل يدەيا بيۋدجەتتى وڭتايلاندىرۋدىڭ ءادىل جولدارىن ىزدەۋدىڭ ورنىنا حالىقتىڭ ەڭ وسال توپتارىنىڭ ءبىرى ەسەبىنەن مەملەكەتتىك شىعىندار ماسەلەسىن شەشۋگە تىرىسۋ سياقتى كورىنەدى.
«ادامدار ەڭ از قارسىلىق بىلدىرەتىن جەردە ۇنەمدەۋ جولدارىن ىزدەيتىن سياقتى. الدىمەن ونكولوگيالىق ناۋقاستاردى ەمدەۋدى قارجىلاندىرۋدى قىسقارتۋ تۋرالى ۇسىنىستار بولدى، سودان كەيىن حوسپيستەر مەن اۋىر ناۋقاستاردى قولداۋعا، ال قازىر جۇمىس ىستەيتىن زەينەتكەرلەرگە قاتىستى ۇسىنىستار پايدا بولدى. زەينەتكەرلەردىڭ كوپشىلىگى ءوز قالاۋى بويىنشا ەمەس، قاجەتتىلىك بويىنشا جۇمىسىن جالعاستىرۋدا، ويتكەنى ولاردىڭ تابىسى نەگىزگى قاجەتتىلىكتەرگە جەتپەيدى. بيۋدجەتتى ۇنەمدەۋ قاجەت، بىراق ءبىلىم بەرۋ، دەنساۋلىق ساقتاۋ، زەينەتاقىلار، جاردەماقىلار جانە ازاماتتاردىڭ جالاقىلارىنا قول سۇعۋعا بولمايدى» - دەپ جازدى اسحات ايماعانبەتوۆ ينستاگرام الەۋمەتتىك جەلىسىندە.
ەڭبەك ءمينيسترى سۆەتلانا جاقىپوۆا بۇل ۇسىنىستىڭ تەك تالقىلانىپ جاتقانىن، جاقىن ارادا جۇزەگە اسىرىلمايتىنىن ءتۇسىندىردى.
دەگەنمەن، دەپۋتات بۇل يدەيانىڭ كونستيتۋتسيالىق جانە ادىلەتتىلىك پرينتسيپتەرىنە قايشى كەلەتىنىن العا تارتتى. سونداي-اق، ول قوعامدا تۇسىنىسپەۋشىلىكتەر مەن شامادان تىس مازاسىزدىقتى بولدىرماۋ ءۇشىن وسىنداي سەزىمتال ماسەلەلەر بويىنشا ارىپتەستەرىنىڭ سالماقتى تۇردە سويلەگەنىن قالايتىنىن ايتتى.
