مينيسترلىك 622 ءتىس ەمحاناسىن تەكسەرىپ جاتىر. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا مالىمدەدى، دەپ حابارلايدى "ادىرنا".
وعان سەبەپ – سوڭعى ۋاقىتتا بالالارعا ءبىر سەانستا كوپتەگەن تىستەردى جالپى انەستەزيامەن ەمدەۋ جاعدايلارىنىڭ كوبەيۋى.
ءمينيستردىڭ ايتۋىنشا، جالپى ناركوز – بالالار ءۇشىن وتە جاۋاپتى پروتسەدۋرا جانە ول تەك ناقتى مەديتسينالىق كورسەتكىشتەر بويىنشا، بىلىكتى انەستەزيولوگتىڭ قاتىسۋىمەن، قاجەتتى جابدىقتار بولعاندا جانە انەستەزيولوگيالىق كومەكتىڭ بارلىق ستاندارتتارى ساقتالعان جاعدايدا عانا قولدانىلۋى ءتيىس.
مينيسترلىكتىڭ دەرەگىنشە، تەكسەرىلىپ جاتقان 622 نىساننىڭ ىشىندە:
- 290 تەكسەرۋ تىركەلگەن،
- 135-ءى اياقتالعان،
- 103-ءى جالعاسۋدا،
- 52 ەمحانا ءىس جۇزىندە جۇمىس ىستەمەيتىنى انىقتالعان،
- تاعى 26-سى — تىركەۋ ساتىسىندا.
ولاردىڭ ىشىندە 34 ۇيىم گوبمپ/اممك (وسمس) اياسىندا قىزمەت كورسەتەدى، ال 282 ءتىس ەمحاناسى تەك اقىلى تۇردە جۇمىس ىستەيدى.
تەكسەرىستەر باس پروكۋراتۋرانىڭ تالابى بويىنشا باستالعان.
