اباي وبلىسىندا بەستەرەك اۋىلىندا 19 تامىزدا ورىن العان جول اپاتى بويىنشا سوت پروتسەسى باستالدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
وقيعا سالدارىنان 2–7 جاس ارالىعىنداعى ءتورت بالا قازا تاپقان ەدى.
55 جاستاعى جۇرگىزۋشى قىلمىستىق كودەكستىڭ 345-بابىنىڭ 4-بولىگى بويىنشا – «كولىك باسقارۋ ەرەجەلەرىن بۇزىپ، ابايسىزدا ەكى نەمەسە ودان كوپ ادامنىڭ ولىمىنە اكەپ سوققان» – ايىپپەن جاۋاپقا تارتىلادى. پروكۋرور ءادىلجان شاراپيەۆتىڭ ايتۋىنشا، ايىپتالۋشى 2013 جىلدان بەرى «گەنەراليزاتسيالانعان ەپيلەپسيا جانە ەپيلەپسيالىق سيندروم» دياگنوزىمەن ەسەپتە تۇرعان. بۇل دياگنوز كولىك جۇرگىزۋگە تىيىم سالىنعان مەديتسينالىق كورسەتكىشتەردىڭ قاتارىندا.
سوت دەرەكتەرىنە قاراعاندا، 19 تامىزدا جۇرگىزۋشى جۇبايىمەن بىرگە بەستەرەك اۋىلىنان ۇرجارعا قاراي جولعا شىققان. ەپيلەپسيالىق ۇستامانىڭ سالدارىنان ءرولدى باسقارا الماعان. ول ءرولدى جولدىڭ سول جاعىنا بۇرىپ، تۇرعىن ءۇيدىڭ قورشاۋىنا كىرىپ كەتكەن. سول اۋلادا ويناپ جۇرگەن التى بالا زارداپ شەكتى. سالدارىنان ەكى بالا وقيعا ورنىندا، بىرەۋى جولدا، تاعى ءبىرى قىركۇيەكتىڭ سوڭىندا سەمەي وبلىستىق بالالار اۋرۋحاناسىندا كوز جۇمدى. قالعان ەكى بالا ءتۇرلى جاراقات الدى.
جابىرلەنۋشىلەر سوتتا ەڭ قاتاڭ جازانى تالاپ ەتتى. تاڭشولپان كارىموۆا ءۇش قىزىنان ايىرىلعانىن ايتىپ، ايىپتالۋشىعا عانا ەمەس، سونداي ادامعا جۇرگىزۋشى كۋالىگىن بەرگەندەردى دە جاۋاپقا تارتۋ كەرەك ەكەنىن اتاپ ءوتتى.
