KazTAG باس ديرەكتورى اسەت ماتاەۆ پەن باس رەداكتور ءامىر قاسەنوۆ Freedom Finance كومپانياسىنىڭ شاعىمى نەگىزىندە قىلمىستىق ىسكە كۇدىكتى دەپ تانىلدى. بۇل تۋرالى قازتاگ باسىلىمى جازدى، دەپ حابارلايدى “ادىرنا”.
كومپانيا رەسەيلىك ميللياردەر تيمۋر تۋرلوۆقا تيەسىلى. شاعىم قازتاگ جاريالاعان ماتەريالداردا الاياقتىق سحەمالاردان جاپا شەككەندەردىڭ سوزدەرى كەلتىرىلگەنىنە بايلانىستى تۇسكەن.
ادۆوكاتتاردىڭ ايتۋىنشا، ماتاەۆ پەن قاسەنوۆ بەلگىلەنگەن راسىمدەر ساقتالماي، ءوز قاتىسۋىنسىز كۇدىكتى دەپ تانىلعان. رەداكتسيا قىلمىستىق ءىس جونىندە 20 قاراشادا عانا بىلگەن، ال ءىس 18 تامىزدا قوزعالعان. وسى ۋاقىت ارالىعىندا پوليتسيا بىرنەشە ساراپتاما جۇرگىزىپ، رەداكتسيانى ول تۋرالى حاباردار ەتپەگەن.
ادۆوكات ەرلان ماكەنوۆ تەرگەۋ ورگاندارى قپك تالاپتارىن بۇزىپ، ساراپتاما تاعايىندالعانى تۋرالى رەداكتسيانى دەر كەزىندە تانىستىرماعانىن اتاپ ءوتتى. ونىڭ سوزىنشە، بۇل فاكت حاتتامالارمەن راستالعان.
21 قاراشادا تەرگەۋشى زامانبەك تازابەكوۆ ادۆوكاتپەن اڭگىمە بارىسىندا سۇراقتاردىڭ «جوعارى جاقتاعى ادامداردان» كەلىپ جاتقانىن بايقاماي ايتىپ قويعان. ال نەگە ساراپتامالار تۋرالى قاۋلىلار رەداكتسياعا ۋاقىتىندا بەرىلمەگەنى سۇرالعاندا، ول: «ماعان باسشىلىق سولاي تاپسىردى»، — دەپ جاۋاپ بەرگەن.
KazTAG رەداكتسياسى Freedom Finance-كە قاتىستى جاريالانىمدار جابىرلەنۋشىلەردىڭ — گۇلميرا يساەۆا، جاننا قاپاروۆا، كارينا گايفۋلينانىڭ جانە ادۆوكات سۆەتلانا ورالباەۆانىڭ سوزدەرىنە نەگىزدەلگەنىن ايتتى.
جابىرلەنۋشىلەر 2025 جىلعى 3 ساۋىردە رەداكتسياعا حابارلاسىپ، باسقا باق-تا دا، مەملەكەتتىك ورگانداردا دا ءوز داۋىستارى ەستىلمەگەنىن جەتكىزگەن. ولار ءوز ۋاجدەرىن دالەلدەۋ ءۇشىن قۇجاتتار مەن eOtinish تالوندارىن ۇسىنعان. Freedom Finance كومپانياسىنىڭ ءباسپاسوز قىزمەتىنە جولدانعان سۇراۋلاردىڭ بارلىعى جاۋاپسىز قالعان.
رەداكتسيا بۇل ءىستى قازاقستانداعى الداعى سايلاۋلار الدىندا باسپاسوزگە قىسىم كورسەتۋ ارەكەتى دەپ باعالايدى. سونىمەن قاتار KazTAG پرەزيدەنت اكىمشىلىگى ازىرلەگەن دەلىنەتىن «سەنىمسىز تۇلعالار تىزىمىنە» سىلتەمە جاسايدى. تىزىمدە ونداعان جۋرناليست، ساياساتتانۋشى، قۇقىق قورعاۋشى جانە مادەنيەت قايراتكەرى بار.
KazTAG بۇرىنعى فيليال ديرەكتورى رۋسلان كاكەنوۆپەن بولعان اڭگىمە بايانداماسىن جاريالادى. وندا Freedom Finance ارقىلى سانكتسيالاردى اينالىپ ءوتۋ ماقساتىندا قازاقستان مەن رەسەي اراسىندا ونداعان ميلليون دوللار كولەمىندە قاراجات اۋدارۋ سحەمالارى قولدانىلعانى ايتىلعان. كاكەنوۆ بۇل سحەما 2023 جىلى ىسكە اسقانىن مالىمدەگەن.
KazTAG بۇل ماتەريالدى اقش جانە ەو ەلشىلىكتەرىنە، سونداي-اق اررفر، ۇلتتىق بانك جانە ۇلتتىق ەكونوميكا مينيسترلىگىنە جولداعانىن حابارلادى.
اسەت ماتاەۆ پەن ءامىر قاسەنوۆ الماتى پوليتسيا دەپارتامەنتىنە 9 جەلتوقسان كۇنگى 11:00 جانە 17:00-گە شاقىرىلعان.
