اقش پرەزيدەنتى دونالد ترامپ ۋكراينالىق ارىپتەسى ۆلاديمير زەلەنسكيدىڭ ءالى كۇنگە دەيىن بەيبىت كەلىسىم جوباسىمەن تانىسپاعانىنا كوڭىلى قالعانىن مالىمدەدى. ول بۇل تۋرالى دجون كەننەدي اتىنداعى ورىنداۋشىلىق ونەر ورتالىعىندا وتكەن ءراسىم بارىسىندا ايتتى، دەپ حابارلايدى «ادىرنا» ءتىلشىسى lenta.ru-عا سىلتەمە جاساپ.
«زەلەنسكيدىڭ ءالى بۇل ۇسىنىستى وقىماعانى مەنىڭ كوڭىلىمدى قالدىردى»، – دەدى امەريكالىق كوشباسشى.
ونىڭ ايتۋىنشا، ۋكراينا پرەزيدەنتىنىڭ اينالاسىنداعى ادامدار ۆاشينگتون ۇسىنعان جوسپارعا ايرىقشا ريزا بولعان. الايدا زەلەنسكيدىڭ ونى ۇناتىپ-ۇناتپاعانى ازىرگە بەلگىسىز.
2 جەلتوقساندا زەلەنسكي كيەۆ پەن ۆاشينگتون 20 تارماقتان تۇراتىن بەيبىت جوسپار ازىرلەگەنىن ايتقان ەدى. ونىڭ سوزىنشە، ۋكراينا مەن اقش امەريكالىق تاراپ ۇسىنعان باستاپقى «جول كارتاسىن» قايتا قاراپ، ونى 20 تارماققا بەيىمدەگەن. زەلەنسكي جەنەۆاداعى كەلىسسوزدەر بارىسىندا 28 تارماقتان تۇرعان باستاپقى ءتىزىم قىسقارتىلىپ، وتكەن دەمالىس كۇندەرى فلوريدادا ناقتىلانعانىن اتاپ ءوتتى.
سونداي-اق ول «كەيبىر تارماقتار ءالى دە قوسىمشا پىسىقتاۋدى قاجەت ەتەدى» دەپ مالىمدەدى. زەلەنسكي بۇل قۇجاتتى ۋكراينادا بەيبىتشىلىك ورناتۋ جولىنداعى «ەڭ كۇردەلى، بىراق ەڭ ءۇمىت كۇتتىرەتىن كەزەڭدەردىڭ ءبىرى» دەپ سيپاتتادى.
