رەسەي تمد ەلدەرىن ستراتەگيالىق سەرىكتەس سانايدى. بۇل تۋرالى بۇگىن رەسەي پرەزيدەنتى ۆلاديمير پۋتين ماسكەۋدە دوستاستىق ەلدەرى باسشىلارىنىڭ سامميتىندە ايتتى، دەپ حابارلايدى “ادىرنا” ۇلتتىق پورتالى.
پۋتين تمد ەلدەرىن دوس سانايتىنىن ايتتى.
ء"بىز ءۇشىن تمد ەلدەرى – ءبىزدىڭ ەڭ جاقىن كورشىمىز، دوسىمىز، ستراتەگيالىق سەرىكتەسىمىز. ءبىز ىنتىماقتاستىقتى جان-جاقتى نىعايتۋعا بەيىلدىمىز، رەسەيدىڭ 2024 جىلعى توراعالىق تۇجىرىمداماسى وسىعان باعىتتالعان", - دەدى ول.
سونىمەن قاتار، رەسەي پرەزيدەنتى دوستاستىقتاعى ارىپتەستەرىنە بىرلەسكەن جوبالار مەن ءىس-شارالارعا بەلسەندى قاتىسقانى ءۇشىن العىسىن ءبىلدىردى.
"ارينە، ءبىز ەكونوميكالىق ماسەلەلەرگە جانە تمد ەلدەرىندەگى ساۋدا-ينۆەستيتسيالىق ىنتىماقتاستىقتى ودان ءارى كەڭەيتۋ پەرسپەكتيۆالارىنا ۇلكەن كوڭىل بولەمىز", - دەپ تولىقتىردى پۋتين.
پۋتين ەلدەردە "ونەركاسىپ، اۋىل شارۋاشىلىعى، قارجى جانە ينفراقۇرىلىم سالالارىندا جاڭا، ءىرى، ءوزارا ءتيىمدى جوبالاردى ىسكە قوسۋعا بارلىق مۇمكىندىك بار" دەپ سەنىم ءبىلدىردى.
