اقش پەن ءيزرايلدىڭ يرانعا قارسى سوعىسى «الداعى 2–3 اپتا ىشىندە» اياقتالۋى مۇمكىن. بۇل تۋرالى اق ءۇي باسشىسى دونالد ترامپ 1 ساۋىرگە قاراعان ءتۇنى اق ۇيدە جۋرناليستەرمەن سويلەسۋ بارىسىندا مالىمدەدى، دەپ حابارلايدى «ادىرنا» ءتىلشىسى.
ترامپتىڭ ايتۋىنشا، تەگەرانمەن كەلىسىم جاسالماسا دا، يرانعا قارسى شابۋىلدار توقتاتىلادى.
«ولاردىڭ رەجيمى وزگەردى. بۇل جوسپارىمدا بولعان ەمەس. مەن ولاردىڭ يادرولىق قارۋعا قول جەتكىزۋىنە جول بەرمەۋدى قالادىم جانە بۇل ماقسات ورىندالدى. ءبىز جۇمىستى اياقتاپ جاتىرمىز. مەنىڭ ويىمشا، بۇل ەكى اپتاعا سوزىلادى، مۇمكىن، تاعى بىرنەشە كۇنگە ۇزارار. بىراق ءبىز ولاردىڭ قولىنداعىنىڭ ءبارىن جويعىمىز كەلەدى»، — دەدى اق ءۇي باسشىسى.
اقش پرەزيدەنتى كەلىسىمگە قول جەتكىزىلسە، سوعىس بۇدان دا ەرتەرەك اياقتالۋى مۇمكىن ەكەنىن ايتتى. ونىڭ سوزىنشە، يران بيلىگى دا مۇنى «قالايدى». الايدا ترامپتىڭ پىكىرىنشە، كەلىسىمنىڭ جاسالۋى نەمەسە جاسالماۋى ايتارلىقتاي ماڭىزدى ەمەس.
ونىڭ ايتۋىنشا، امەريكالىق جانە يزرايلدىك شابۋىلدار باستالعاننان كەيىن يران ۇيىمداستىرعان ورمۋز بۇعازى ارقىلى، اسىرەسە ەۋروپالىق كەمەلەر ءۇشىن ەنگىزىلگەن بلوكادا باسقا ەلدەردىڭ ماسەلەسى بولۋى ءتيىس.
«ەگەر فرانتسيا نەمەسە كەز كەلگەن باسقا ەل مۇناي نە گاز العىسى كەلسە، ولار ورمۋز بۇعازى ارقىلى ءوتىپ، ءوز ماسەلەسىن ءوزى شەشسىن. بۇعازداعى جاعداي بىزگە قاتىسى جوق»، — دەدى ول.
اقش پرەزيدەنتى تاياۋ شىعىستاعى سوعىس پەن ورمۋز بۇعازىنىڭ جابىلۋىنا بايلانىستى مۇناي باعاسىنىڭ 50%-عا كۇرت وسۋىنە دە پىكىر ءبىلدىردى. ترامپتىڭ ايتۋىنشا، اقش يرانعا جاسالاتىن شابۋىلداردى «وتە جاقىن ارادا» توقتاتقان سوڭ باعالار كۇرت تومەندەيدى.
