ەۋروپالىق پارلامەنتتىڭ پرەزيدەنتى روبەرتا مەتسولا يراننىڭ ديپلوماتيالىق جانە وزگە دە رەسمي وكىلدەرىنىڭ ەۋروپالىق پارلامەنت عيماراتتارىنا كىرۋىنە تولىق تىيىم سالىنعانىن جاريالادى. بۇل تۋرالى Sky News جازدى، دەپ حابارلايدى "ادىرنا".
مەتسولانىڭ ايتۋىنشا، شەشىم يران حالقىنىڭ قۇقىقتارى مەن بوستاندىقتارى ءۇشىن جۇرگىزىپ جاتقان كۇرەسىنە قولداۋ ءبىلدىرۋ ماقساتىندا قابىلدانعان. ول ەۋروپالىق پارلامەنتتىڭ بيلىكتى كۇش قولدانۋ، رەپرەسسيا جانە ادام ءولتىرۋ ارقىلى ساقتاپ وتىرعان رەجيمدى زاڭداستىرۋعا جول بەرمەيتىنىن اتاپ ءوتتى.
«يراننىڭ باتىل حالقى ءوز قۇقىقتارى مەن ەركىندىكتەرىن قورعاۋدى جالعاستىرىپ جاتقاندا، ءبىز مۇنداي رەجيممەن كەز كەلگەن رەسمي قاتىناستى شەكتەۋگە ءتيىسپىز»، – دەدى روبەرتا مەتسولا.
اتالعان تىيىم يرانداعى سوڭعى ايلاردا كۇشەيگەن جاپپاي نارازىلىقتار مەن ادام قۇقىقتارىنىڭ بۇزىلۋىنا بايلانىستى قابىلداندى. ەۋروپالىق وداق وكىلدەرى يران بيلىگىنىڭ نارازىلىقتاردى كۇشپەن باسۋىنا الاڭداۋشىلىق ءبىلدىرىپ كەلەدى.
بۇل شەشىم ەۋروپالىق پارلامەنتتىڭ ادام قۇقىقتارىن قورعاۋ مەن دەموكراتيالىق قۇندىلىقتاردى قولداۋعا باعىتتالعان ساياسي ۇستانىمىن تاعى ءبىر مارتە ايقىنداي ءتۇستى.
ەسكە سالايىق، اقش-تا ورنالاسقان HRANA قۇقىق قورعاۋ ۇيىمىنىڭ دەرەگىنشە، يرانداعى تارتىپسىزدىكتەر بارىسىندا 500-دەن استام ادام قازا تاۋىپ، 10 600-دەن استام ادام ۇستالعان.
يرانداعى شەرۋلەر 2025 جىلعى 28 جەلتوقساندا باستالدى. سول كۇنى تەگەرانداعى دۇكەن يەلەرى ەكونوميكالىق جاعدايدىڭ ناشارلاۋىنا قارسى نارازىلىق رەتىندە ساۋدا ورىندارىن جاپتى. كەيىن اكتسيالارعا باسقا دا ءىرى قالالاردىڭ تۇرعىندارى قوسىلدى.
30 جەلتوقسان، سەيسەنبى كۇنى، نارازىلىق بىلدىرۋشىلەر مەن پوليتسيا اراسىنداعى العاشقى قاقتىعىستار تىركەلىپ، كۇش قۇرىلىمدارىنىڭ كوزدەن جاس اعىزاتىن گاز قولدانعانى حابارلاندى. كوپ ۇزاماي اكتسيالار ساياسي سيپات الىپ، كەيبىر قاتىسۋشىلار يراننىڭ رۋحاني كوشباسشىسى ءالي حامەنەيگە قاتىستى بولۋى مۇمكىن «ديكتاتورعا ءولىم!» دەگەن ۇراندار ايتا باستادى. نارازىلىققا شىققاندار ساياسي رەجيمنىڭ اۋىسۋىن جانە بيلىككە پەحلەۆيدىڭ كەلۋىن تالاپ ەتۋدە.
يران ەكونوميكاسى 40 پايىزدىق ينفلياتسيادان جانە باتىس ەلدەرىنىڭ سانكتسيالارىنان قاتتى زارداپ شەگىپ وتىر.
2 قاڭتار كۇنى اقش پرەزيدەنتى Truth Social جەلىسىندە ەگەر كۇش قۇرىلىمدارى اۋىر ەكونوميكالىق جاعداي مەن جوعارى ينفلياتسياعا قارسى شىققان بەيبىت شەرۋشىلەرگە وق اتسا، اقش ارالاساتىنىن ەسكەرتكەن.
كەيىنىرەك بەيبىت شەرۋلەر تارتىپسىزدىكتەرگە ۇلاستى. تەگەران مەرى اليرەزا زاكاني 9 قاڭتارعا قاراعان ءتۇنى وتكەن اكتسيالار كەزىندە 50-دەن استام بانك پەن بىرنەشە مەملەكەتتىك مەكەمە ورتەلىپ، 30-دان استام مەشىت وتقا ورانعانىن مالىمدەدى.
