Air Astana اۋە كومپانياسىنىڭ ۇشاقتارى يراننىڭ اۋە كەڭىستىگىن اينالىپ ۇشاتىن بولادى، دەپ حابارلايدى «ادىرنا» ءتىلشىسى.
«Air Astana يران اۋە كەڭىستىگىنىڭ جابىلۋىنا بايلانىستى كەيبىر تۇراقتى جانە چارتەرلىك رەيستەرىنىڭ مارشرۋتتىق جولدارىنىڭ وزگەرىستەرى تۋرالى حاباردار ەتەدى. شارم-ەل-شەيح، دۋباي، دوحا جانە مەديناعا رەيستەر يران اۋە كەڭىستىگىن اينالىپ ۇشادى»،-دەلىنگەن حابارلامادا.
كومپانيا جاعدايدى مۇقيات باقىلايتىنىن اتاپ ءوتتى.
«جولاۋشىلاردان رەيستەردىڭ مارتەبەسىن تەكسەرۋدى سۇرايمىز، سەبەبى رەيستەر كەستەسىندە وزگەرتۋلەر بولادى»،-دەپ تولىقتىردى Air Astana.
بۇعان دەيىن يراننىڭ ازاماتتىق ۇشاقتار ءۇشىن ءوز اۋە كەڭىستىگىن جابۋ تۋرالى رەسمي حابارلاما تاراتقانىن جازعان بولاتىنبىز.
ايتا كەتەيىك، يران بيلىگى اقش ەل ىشىندەگى ۇكىمەتكە قارسى نارازىلىقتاردى قولداۋعا ارەكەت ەتسە، اۋقىمدى اسكەري جاۋاپ بەرۋگە دايىن ەكەنىن ەسكەرتكەن ەدى.
