بۇگىن قازاق تەاتر جانە كينو ونەرى ورنى تولماس اۋىر قازاعا ۇشىرادى. قازاق ساحناسىنىڭ ابىزى، كسرو حالىق ءارتىسى، قازاقستاننىڭ ەڭبەك ەرى، كينو جانە تەاتر ءارتىسى، رەجيسسەر، تەاترىمىزدىڭ نەگىزىن قالاۋشى كوركەمدىك جەتەكشىمىز، اياۋلى ۇستازىمىز ءاسانالى ءاشىمۇلى ومىردەن ءوتتى. بۇل تۋرالى ءاشىموۆ تەاترى جازدى، دەپ حابارلايديا “ادىرنا”.
“بۇل — ءبىر ادامنىڭ عانا ەمەس، تۇتاس ءبىر ءداۋىردىڭ قوشتاسۋى.
ءاسانالى ءاشىمۇلى — قازاق ونەرىنىڭ بيىگىن الەمگە تانىتقان، ساحنا مەن ەكراندا ۇلتتىق رۋحتى اسقاقتاتا بىلگەن بىرەگەي تۇلعا ەدى. ونىڭ ءار ءرولى — تاريح، ءار بەينەسى — تاعدىر، ءار ءسوزى — مەكتەپ بولدى. ول ونەرگە ادالدىقتىڭ، ساحناعا تازالىقپەن قىزمەت ەتۋدىڭ، ۇلت رۋحىن قورعاۋدىڭ ۇلگىسىن كورسەتتى.
ۇستاز رەتىندە تالاي بۋىنعا باعىت-باعدار بەرىپ، ونەردىڭ جاۋاپكەرشىلىگىن، اكتەرلىك ماماندىقتىڭ قاسيەتىن شاكىرتتەرىنىڭ جۇرەگىنە سىڭىرە ءبىلدى. تەاتردىڭ ىرگەسىن قالاپ، شىعارماشىلىق جولىن ايقىنداپ، ۇلتتىق مادەنيەتتىڭ شامشىراعىنا اينالدىردى. ونىڭ ەڭبەگىمەن قازاق تەاترى مەن كينوسى جاڭا بەلەسكە كوتەرىلدى.
بۇگىن قازاق تەاتر ونەرى قارا جامىلدى. ساحنا ءۇنسىز قالعانداي، زالدىڭ اۋاسى اۋىر تارتقانداي. بىراق ءاسانالى ءاشىمۇلىنىڭ ونەرى، رۋحى، اماناتى — ماڭگى ءتىرى. ول حالىقتىڭ جۇرەگىندە، كورەرمەننىڭ جادىندا، ساحنا تورىندە ءومىر سۇرە بەرەدى.
جاتقان جەرىڭىز جارىق، توپىراعىڭىز تورقا بولسىن، ۇلى تۇلعا. قازاق ەلى ءسىزدى ەشقاشان ۇمىتپايدى”، - دەپ جازدى تەاتر.
