اتىراۋلىق بەلسەندى، قۇقىق قورعاۋشى اسەل نۇرعازيەۆا ومىردەن ءوتتى. بۇل تۋرالى جۋرناليست ءارى قوعام قايراتكەرى گۇلجان ەرعاليەۆا جازدى، دەپ حابارلايدى “ادىرنا”.
«سەن قۇيىن سەكىلدى ءومىر ءسۇردىڭ – قارقىندى، اشىق، ادال ادام ەدىڭ. ەشكىمنەن دە، ەشتەڭەدەن دە قورىقپادىڭ. سەن ادام قۇقىقتارى ءۇشىن شىنايى كۇرەسكەر ەدىڭ» دەپ جازدى گۇلجان ەرعاليەۆا.
اسەل نۇرعازيەۆا ۇزاققا سوزىلعان اۋرۋدان كەيىن استانادا بۇگىن تاڭەرتەڭ كوز جۇمدى. ول 47 جاستا ەدى. ول قۇقىق قورعاۋ سالاسىنداعى بەلسەندى قىزمەتىمەن، سونىڭ ىشىندە 2011 جىلعى جاڭاوزەن وقيعالارىنا بايلانىستى ىستەر بويىنشا زارداپ شەككەندەردى قورعاعان كەزدە كەڭىنەن تانىمال بولدى.
2012 جىلى اسەل نۇرعازيەۆا اقتاۋدا ۇستالىپ، اكىمشىلىك جاۋاپكەرشىلىككە تارتىلدى. سول كەزدە سوت وعان قوعامدىق ءتارتىپتى بۇزعانى جانە پوليتسيا تالاپتارىنا باعىنباعانى ءۇشىن 12 تاۋلىك اكىمشىلىك قاماۋعا الۋدى تاعايىندادى. بۇل وقيعا قازاقستاندىق جانە حالىقارالىق قۇقىق قورعاۋ ۇيىمدارىنىڭ رەاكتسياسى مەن سىنىن تۋدىردى، ولار بۇل وقيعانى ازاماتتىق بەلسەندىگە قىسىم رەتىندە باعالادى.
2016 جىلى اسەل نۇرعازيەۆا اتىراۋدا وتكەن جەر ماسەلەسىنە قاتىستى ميتينگىلەردىڭ باستاماشىلارىنىڭ ءبىرى بولدى. اكتسيا قاتىسۋشىلارى ۇستالعاننان كەيىن، ول ولاردى قورعاۋ ءۇشىن قوعامدىق كوميتەت قۇرۋعا اتسالىسىپ، بەلسەندىلەردىڭ قۇقىقتارىنىڭ ساقتالۋىن تاباندىلىقپەن تالاپ ەتتى.
ارىپتەسى، قۇقىق قورعاۋشى توعجان قيزاتوۆانىڭ ايتۋىنشا، اسەل نۇرعازيەۆا ەڭبەك جولىن پروكۋراتۋرا ورگاندارىندا باستاعان، الايدا كوپ ۇزاماي قۇقىق قورعاۋ سالاسىنا اۋىسقان. جاڭاوزەن وقيعالارى بويىنشا سوت پروتسەستەرىندە ەقىۇ اتىنان باقىلاۋشى بولىپ جۇمىس ىستەي ءجۇرىپ، ول جاي عانا مونيتورينگ جاساۋمەن شەكتەلمەي، ادام قۇقىقتارىن بەلسەندى قورعاۋعا كوشكەن.
ارىپتەستەرى اسەل نۇرعازيەۆانىڭ ادىلەتسىزدىككە ءاردايىم وتكىر جاۋاپ بەرە بىلگەنىن، بەيجاي قالا المايتىنىن جانە ءالسىز ءارى وسال جانداردىڭ قۇقىقتارىن دايەكتى تۇردە قورعاعانىن ايتادى.
