سولتۇستىك قازاقستان وبلىسىندا ۇلى وتان سوعىسىنىڭ سوڭعى ارداگەرى فەدور ۆاسيلەۆيچ ششەگلوۆ 98 جاسىندا دۇنيەدەن ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى وبلىس اكىمى عاۋەز نۇرمۇحامبەتوۆ 2026 جىلعى 6 قاڭتاردا مالىمدەدى.
وبلىس اكىمىنىڭ ايتۋىنشا، فەدور ششەگلوۆتىڭ 99 جاسقا تولۋىنا ساناۋلى كۇندەر عانا قالعان. ول 17 جاسىندا مايدانعا اتتانىپ، 371-اتقىشتار ديۆيزياسىنىڭ قۇرامىندا سوعىستىڭ سوڭىنا دەيىن ەرلىكپەن شايقاسقان.
اكىم ارداگەر تۋرالى ەستەلىگىمەن ءبولىستى.
«ول مەنى ءاردايىم جىلى جۇزبەن قارسى الىپ، اسكەري قىزمەتى، جاۋىنگەرلىك ەرلىكتەرى جانە حالىق جادىندا ماڭگى قالاتىن سول اۋىر، بىراق قاھارماندىققا تولى كۇندەر تۋرالى ەستەلىكتەرىمەن بولىسەتىن. ونىڭ اڭگىمەلەرى ومىرلىك دانالىققا، رۋحتىڭ مىقتىلىعىنا جانە وتانعا دەگەن شەكسىز سۇيىسپەنشىلىككە تولى ەدى. ءبىز ءۇشىن، وبلىس تۇرعىندارى ءۇشىن فەدور ۆاسيلەۆيچ ءاردايىم ەرلىك پەن قايسارلىقتىڭ سيمۆولى بولىپ قالا بەرەدى. ءبىز ونىڭ جارقىن بەينەسىن ساقتاپ، ونى بالالارىمىز بەن نەمەرەلەرىمىزگە جەتكىزەمىز. مارقۇمنىڭ تۋعان-تۋىستارى مەن جاقىندارىنا شىنايى كوڭىل ايتامىن. فەدور ۆاسيلەۆيچتىڭ رۋحى پەيىشتە شالقىسىن!» – دەپ تۇيىندەدى وبلىس اكىمى.
