زامانبەك نۇرقادىلوۆتىڭ ءبىرىنشى ايەلى قايتىس بولدى. بۇل تۋرالى ونىڭ قىزى قۇرالاي نۇرقادىلوۆا Instagram-پاراقشاسىندا جازدى، دەپ حابارلايدى “ادىرنا” ۇلتتىق پورتالى.
"بۇگىن تۇندە ەلىمىز ءۇشىن ماڭىزدى تۇلعا ومىردەن ءوتتى. ول – زامانبەك نۇرقادىلوۆتىڭ قالىپتاسۋ جىلدارىندا سەرىگى بولعان ايەل. ساياساتتا اقىلدى، ءبىلىمدى جانە ساۋاتتى نۇربيكە ىلىمبايقىزى. سونىمەن قاتار وتە قاراپايىم جانە زيالى جان ەدى. ول تۋرالى كوپ ايتۋعا بولادى", – دەپ جازدى قۇرالاي نۇرقادىلوۆا.
ونىڭ ايتۋىنشا، اناسى كەڭەس وداعى كەزىندەگى جانە ودان كەيىنگى ەلدىڭ جاعدايى تۋرالى كوپ نارسە ايتا الاتىن ەدى. كوپتەگەن جاس ساياساتكەرلەر ونىڭ قولداۋىمەن العا جىلجىعان. ول بارلىق تاريحي وقيعالاردى جاقسى بىلەتىن جانە ولاردى وتە قىزىق جەتكىزە الاتىن.
"مەنىڭ انامنىڭ دانالىعىنا ونى تانيتىن ءاربىر ادام ءتانتى بولاتىن. يماندى بول، اناشىم، قولىمنان كەلگەننىڭ ءبارىن جاسادىم!", – دەدى قۇرالاي نۇرقادىلوۆا.
نۇربيكە نۇرقادىلوۆا 79 جاسىندا ومىردەن ءوتتى.
ايتا كەتەيىك، زامانبەك نۇرقادىلوۆ – قازاقستاننىڭ مەملەكەت جانە قوعام قايراتكەرى، قازاقستاننىڭ پرەزيدەنتى بولعان نۇرسۇلتان نازارباەۆتى اشىق سىناپ، ونى "بيلىكتى زاڭسىز يەمدەنىپ، جەمقورلىق جاسادى" دەپ ايىپتاعان ساياساتكەر.
زامانبەك نۇرقادىلوۆ تە قاراشا ايىندا ومىردەن وتكەن ەدى. 2005 جىلى 12 قاراشادا ءوزىن-ءوزى ءۇش رەت اتتى دەپ حابارلانعان.
