شىمكەنتتە قالا اكىمىنىڭ توراعالىعىمەن وتكەن ونلاين-جينالىستا قر پرەزيدەنتىنىڭ 11 قاڭتاردا ەلىمىزدىڭ الەۋمەتتىك-ەكونوميكالىق دامۋى مەن ساياسي تۇراقتىلىعىن ساقتاۋ بويىنشا بەرگەن تاپسىرمالارىن جۇزەگە اسىرۋ بارىسى تالقىلاندى.
قالا اكىمى ءاربىر بەرىلگەن تاپسىرمانى جۇزەگە اسىرۋ ماقساتىندا جۇمىس جوسپارى مەن جۇيەلى ينديكاتورلار ازىرلەنىپ، ساپالى جانە بارىنشا جىلدام ورىندالۋ قاجەتتىگىن ايتتى.
ەلىمىزدىڭ جاڭا ەكونوميكالىق تۇعىرىن قالىپتاستىرۋ باعىتىندا وڭىردە اتقارىلاتىن جۇمىستار تۋرالى باسقارما باسشىلارى باياندادى.
الدىمەن ەكونوميكا باسقارماسىنىڭ باسشىسى جاپپاي تارتىپسىزدىك كەزىندەگى قيراعان عيماراتتار مەن مۇلىكتەردى جەدەل قالپىنا كەلتىرۋ، ەكونوميكانى ءارتاراپتاندىرۋ، حالىق تابىسىن ارتتىرۋ، ينفلياتسيا دەڭگەيىن تومەندەتۋ ماسەلەسىن قوزعادى.
قالا بيۋدجەتىنىڭ كىرىس جوسپارىن ارتتىرۋ، جەكەشەلەندىرۋ جۇمىستارى تۋرالى قارجى باسقارماسى ايتسا، كاسىپكەرلىك سالاسىن وركەندەتۋ، يندۋستريالدى-يننوۆاتسيالىق، شاعىن جانە ورتا كاسىپكەرلىكتى دامىتۋ ماسەلەلەرى تۋرالى كاسىپكەرلىك جانە يندۋستريالدى، يننوۆاتسيالىق دامۋ باسقارماسى باسشىسىنىڭ ورىنباسارى بايانداما وقىدى.
شىمكەنتتە اۋىل شارۋاشىلىق ونىمدەرىن وڭدەۋ كاسىپورىندارىن دامىتۋعا مۇمكىندىكتەر بار ەكەنىن العا تارتقان قالا اكىمى ازىق-تۇلىك تاۋارلارىنىڭ باعاسىن تۇراقتاندىرۋ بويىنشا اتقارىلىپ جاتقان جۇمىستار ەسەبىن تىڭدادى.
سونىمەن بىرگە، جيىندا تەحنيكالىق ماماندىقتارعا باسىمدىق بەرىپ، ينجەنەرلەر مەن ونەركاسىپشىلەردىڭ جاڭا بۋىنىن ءوسىرۋ، جۇمىسسىزدىق، ازاماتتىق ينستيتۋتتاردىڭ قىزمەتىن جۇيەلەندىرۋ، كوروناۆيرۋستىڭ تارالۋىنا جول بەرمەۋ ماسەلەسى ءسوز بولدى.
شاھار باسشىسى جيىندى قورىتىندىلاپ، ءتيىستى باسقارما باسشىلارىنا ناقتى تاپسىرمالار بەردى:
✔️شاعىن جانە ورتا بيزنەسكە مەملەكەتتىك قولداۋ شارالارىن كورسەتۋدىڭ اشىق جانە بارىنشا ءتيىمدى مەحانيزمىن ازىرلەۋ بويىنشا ۇسىنىس ەنگىزۋ،
✔️ينفلياتسياعا قارسى ارەكەت ەتۋ شارالارىنىڭ كەشەنىن ازىرلەۋ،
✔️كوكتەمگى دالا جۇمىستارىنا قاجەتتى اگرەگاتتارمەن، تۇقىممەن، تىڭايتقىشپەن قامتاماسىز ەتىپ، ەگىن ەگۋ ناۋقانى قاتاڭ باقىلاۋعا الۋ،
✔️سۋبسيديالاۋدىڭ قول جەتىمدىلىگى مەن اشىقتىعىن قامتاماسىز ەتۋ،
✔️ازىق-تۇلىك تاپشىلىعىنىڭ ماسەلەسىن تۇبەگەيلى شەشىپ، الەۋمەتتىك ماڭىزى بار تاۋارلار باعاسىن تۇراقتاندىرۋ جۇمىستارىن جۇرگىزۋ،
ء✔️بىلىم بەرۋ ۇيىمدارىنداعى كادر تاپشىلىعىن جويۋ،
✔️«جاستار پراكتيكاسى» جانە «العاشقى جۇمىس ورنى» باعدارلامالارى بويىنشا جۇمىسپەن قامتۋدى ۇيىمداستىرىپ،
ولاردىڭ ودان ءارى تۇراقتى جۇمىسپەن قامتىلۋىن باقىلاۋعا الۋ،
✔️كوروناۆيرۋس ينفەكتسياسىنىڭ الدىن الۋ، ەمدەۋ شارالارىن ءتيىمدى ۇيىمداستىرىپ، جاعدايدى قاتاڭ باقىلاۋعا الۋدى جۇكتەدى.
شىمكەنت قالاسى اكىمدىگىنىڭ ءباسپاسوز قىزمەتى
