بۇگىن، 14 ناۋرىزدا الماتى قالاسىندا كورنەكتى تاريحشى عالىم، مەملەكەتتىك سىيلىقتىڭ يەگەرى، قر ۇعا اكادەميگى، تاريح عىلىمىنىڭ دوكتورى، پروفەسسور كەڭەس نۇرپەيىسۇلىنىڭ تۇرعان ۇيىنە ورناتىلعان ەسكەرتكىش تاقتانىڭ سالتاناتتى اشىلۋ ءراسىمى ءوتتى.
الماتى قالاسىنىڭ اكىمشىلىگى ۇيىمداستىرعان سالتاناتتى ءىس-شاراعا زيالى قاۋىم وكىلدەرى، قايراتكەردىڭ تۋعان تۋىستارى، قالانىڭ جوعارعى وقۋ ورىندارى ۇستازدارى مەن ستۋدەنتتەرى قاتىسىپ، عۇلاما عالىمنىڭ ءومىرى مەن عىلىمي قىزمەتى تۋرالى وزدەرىنىڭ تاماشا ەستەلىكتەرىن ءبولىستى.
كەڭەس نۇرپەيىسۇلى نۇرپەيىس 1935 جىلدىڭ 15 ناۋرىزىندا الماتى وبلىسى كەگەن اۋدانىنىڭ (قازىرگى رايىمبەك اۋدانىنىڭ) ساتى دەگەن شاعىن اۋىلىندا دۇنيەگە كەلگەن. 1942-1945 جىلدار ارالىعىندا الماتى وبلىسى رايىمبەك اۋدانىنىڭ قارابۇلاق اۋىلىنداعى بالالار ۇيىندە وقىپ، تاربيەلەنەدى. 1952-1957 جىلدار ارالىعىندا كيروۆ اتىنداعى قاز مۇۋ-ءنىڭ (قازىرگى ءال-فارابي اتىنداعى قازۇۋ) تاريح فاكۋلتەتىن وقىپ بىتىرەدى.
1957-1958 جىلدار ارالىعىندا قاز مۇۋ-ءدىڭ تاريح فاكۋلتەتىندە وقىتۋشى بولىپ جۇمىس ىستەگەن. 1980 جىلى پروفەسسور اتاعىن العان. ەكى جىلدان كەيىن ەلىمىزدىڭ تاريحى تۋرالى جەتپىسىنشى جىلداردىڭ اياعىندا جارىق كورگەن بەستومدىق "قازاق سسر تاريحى - كونە زاماننان بۇگىنگە دەيىنگى" اتتى ۇجىمدىق ەڭبەكتىڭ اۆتورلارىمەن بىرگە قازاق سسر مەملەكەتتىك سىيلىعىنىڭ يەگەرى اتاعىن الادى. ال 1989 جىلى قازاقستان ۇلتتىق عىلىم اكادەمياسىنىڭ كوررەسپوندەنت- مۇشەسى بولىپ سايلاندى.
عالىمعا قازاقستان رەسپۋبليكاسى پرەزيدەنتىنىڭ جارلىعىمەن "قازاقستان رەسپۋبليكاسىنىڭ عىلىمى مەن تەحنيكاسىنا ەڭبەك سىڭىرگەن قايراتكەرى" قۇرمەتتى اتاعى بەرىلگەن. 2001 جىلى عىلىم قايراتكەرى نوميناتسياسى بويىنشا "التىن ادام" اتاعىنىڭ يەگەرى بولدى. 2003 جىلى قازاقستان رەسپۋبليكاسىنىڭ ۇلتتىق عىلىم اكادەميا-سىنىڭ اكادەميگى بولىپ سايلاندى.
"پاراسات" وردەنىمەن ماراپاتتالعان. كەڭەس نۇرپەيىسۇلى 2007 جىلدىڭ 9 جەلتوقسانىندا 73 جاسقا قاراعان شاعىندا ۇزاققا سوزىلعان اۋىر ناۋقاستان قايتىس بولدى.
tengrinews.kz
