Búgin, 14 naýryzda Almaty qalasynda kórnekti tarıhshy ǵalym, Memlekettik syılyqtyń ıegeri, QR UǴA akademıgi, tarıh ǵylymynyń doktory, professor Keńes Nurpeıisulynyń turǵan úıine ornatylǵan eskertkish taqtanyń saltanatty ashylý rásimi ótti.
Almaty qalasynyń ákimshiligi uıymdastyrǵan saltanatty is-sharaǵa zııaly qaýym ókilderi, qaıratkerdiń týǵan týystary, qalanyń joǵarǵy oqý oryndary ustazdary men stýdentteri qatysyp, ǵulama ǵalymnyń ómiri men ǵylymı qyzmeti týraly ózderiniń tamasha estelikterin bólisti.
Keńes Nurpeıisuly Nurpeıis 1935 jyldyń 15 naýryzynda Almaty oblysy Kegen aýdanynyń (qazirgi Raıymbek aýdanynyń) Saty degen shaǵyn aýylynda dúnıege kelgen. 1942-1945 jyldar aralyǵynda Almaty oblysy Raıymbek aýdanynyń Qarabulaq aýylyndaǵy balalar úıinde oqyp, tárbıelenedi. 1952-1957 jyldar aralyǵynda Kırov atyndaǵy Qaz MUÝ-niń (qazirgi ál-Farabı atyndaǵy QazUÝ) tarıh fakýltetin oqyp bitiredi.
1957-1958 jyldar aralyǵynda Qaz MUÝ-diń tarıh fakýltetinde oqytýshy bolyp jumys istegen. 1980 jyly professor ataǵyn alǵan. Eki jyldan keıin elimizdiń tarıhy týraly jetpisinshi jyldardyń aıaǵynda jaryq kórgen bestomdyq "Qazaq SSR tarıhy - kóne zamannan búginge deıingi" atty ujymdyq eńbektiń avtorlarymen birge Qazaq SSR Memlekettik syılyǵynyń ıegeri ataǵyn alady. Al 1989 jyly Qazaqstan Ulttyq Ǵylym akademııasynyń korrespondent- múshesi bolyp saılandy.
Ǵalymǵa Qazaqstan Respýblıkasy Prezıdentiniń Jarlyǵymen "Qazaqstan Respýblıkasynyń ǵylymy men tehnıkasyna eńbek sińirgen qaıratkeri" qurmetti ataǵy berilgen. 2001 jyly ǵylym qaıratkeri nomınaııasy boıynsha "Altyn adam" ataǵynyń ıegeri boldy. 2003 jyly Qazaqstan Respýblıkasynyń Ulttyq ǵylym akademııa-synyń akademıgi bolyp saılandy.
"Parasat" ordenimen marapattalǵan. Keńes Nurpeıisuly 2007 jyldyń 9 jeltoqsanynda 73 jasqa qaraǵan shaǵynda uzaqqa sozylǵan aýyr naýqastan qaıtys boldy.
tengrinews.kz
