ەلباسىمىزدىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ىنتىماق پەن بىرلىككە شاقىرار ءداستۇرلى مەيرام – امال مەرەكەسى تۇڭعىش رەت رەسپۋبليكالىق دەڭگەيدە اتالىپ ءوتتى.
ءماشھۇر-ءجۇسىپ (پاۆلودار), اباي-شاكارىم (شقو), قورقىت اتا (قىزىلوردا), قوجا-احمەت ياسساۋي (وقو), اقمەشىت (وقو), سارايشىق (اتىراۋ), بەكەت اتا (ماڭعىستاۋ) كەسەنەلەرىنىڭ جانە ۇلىتاۋ كەشەنى (قاراعاندى) شىراقشىلارىنىڭ قاتىسۋىمەن، ەلىمىزدىڭ ءار ايماعىنان كەلگەن 3 ءجۇزدىڭ ۇرپاقتارى مەن رەسمي دەلەگاتسيا وتپان تاۋدىڭ باۋىرىندا باس قوسىپ، بىرلىك وتىن جاقتى.
ىنتىماق پەن بەرەكەنىڭ، تۇراقتىلىق پەن تاتۋلىقتىڭ بەلگىسىنە اينالعان بىرلىك وتىن جاعۋ تاريحي ساتىندە وبلىس اكىمى ەرالى توعجانوۆ اتالمىش مەيرامنىڭ ءمان-ماعىناسىنا توقتالىپ، حالىقتى امال مەرەكەسىمەن قۇتتىقتادى.
«ەلباسىمىز «بولاشاققا باعدار: رۋحاني جاڭعىرۋ» باعدارلامالىق ماقالاسىندا «ۇلتتىق سالت-داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس. ابايدىڭ دانالىعى، اۋەزوۆتىڭ عۇلامالىعى، جامبىلدىڭ جىرلارى مەن قۇرمانعازىنىڭ كۇيلەرى، عاسىرلار قويناۋىنان جەتكەن بابالار ءۇنى – بۇلار ءبىزدىڭ رۋحاني مادەنيەتىمىزدىڭ ءبىر پاراسى عانا» دەگەن. قازانى وتتان، ازاماتى اتتان تۇسپەگەن قازاق ەلىنىڭ وركەنيەتى مەن تاريحى ماڭعىستاۋدا ءار جۋساننىڭ ءتۇبى مەن بەتەگەسىنىڭ بيىگىندە سايراپ جاتىر. بۇل قاسيەتى ءسۇت بەتىندەگى قايماقتاي بۇزىلماعان كيەلى ماڭعىستاۋدىڭ شىرايى. قازاقستاننىڭ ەشبىر وڭىرىندە تويلانبايتىن بىرلىكتىڭ بەلگىسىنە، تاتۋلىقتىڭ تاڭباسىنا اينالعان قاستەرلى مەرەكەدە كەڭ قۇشاقتار ايقارا اشىلىپ، ءتوس توعىستىرىپ، الىس-جاقىن كورىسىپ، بار وكپە-ناز كەشىرىلەدى. تەگىن ۇمىتپاۋ تەكتىلىكتىڭ بەلگىسى. 2 كۇنگە جالعاساتىن وسىناۋ يگى ءىس-شارانىڭ باسى-قاسىندا جۇرگەن بارشا ازاماتتارعا، قۇنانورىس ۇرپاقتارىنا العىس ايتامىن. امالدان امالعا امان-ەسەن جەتە بەرەيىك، اعايىن!».
2008 جىلدان بەرى امال مەرەكەسىن بارلىق ءسان-سالتاناتپەن وتپان تاۋدىڭ باسىندا تويلاۋ ۇردىسكە اينالدى. «امال -2018» مادەني كوپشىلىك شاراسىنىڭ ماقساتى – حالىق بىرلىگىن جانە تۇتاستىعىن نىعايتۋ، ۇلتتىق سالت-ءداستۇردى دارىپتەۋ.
2 كۇنگە جالعاسقان باعدارلامادا «امال مەرەكەسى – رۋحاني جاڭعىرۋىمىزدىڭ جارشىسى» اتتى دوڭگەلەك ۇستەل ۇيىمداستىرىلىپ، «ارمىسىڭ، امال!» اتتى وبلىس جىرشىلارىنىڭ قاتىسۋىمەن جىر كەشى ءوتتى. قاتىسۋشىلار اۋدارىسپاق، قۇنان جارىس جانە الامان بايگە سىندى قازاقتىڭ ۇلتتىق ويىندارىنان باق سىناستى.
60-تان استام كيىز ءۇي تىگىلىپ، 200-دەن استام ونەرپاز ونەر كورسەتتى. ۇلتتىق سپورتتىق ويىنداردان جارىستار ءوتىپ، الامان بايگە ۇيىمداستىرىلىپ، جۇلدەلەرگە باعالى سىيلىقتار مەن اقشالاي سىياقى بەرىلدى. مەرەكەلىك شارادا «شاشۋ بوپ جىرىم شاشىلسىن» رەسپۋبليكالىق جىر مەكتەپتەرى وكىلدەرى (جەتىسۋ، ارقا، باتىس، التاي-تارباعاتاي مەكتەپتەرى) مەن «مەن قازاقپىن» مەگا جوباسى جۇلدەگەرلەرىنىڭ قالا، اۋدان ونەرپازدارى كونتسەرتتىك باعدارلاماسى ۇسىندى. «امال-2018» اياسىندا «ايالى اعاش – سايالى» تال وتىرعىزۋ اكتسياسى ءوتتى.
جالپى قاتىسۋشىلار سانى 5000 ادامدى قۇرايتىن بۇل شارادا قازاق دالاسىنىڭ ونەرى، سالت-ءداستۇرى، ۇلتتىق بولمىستى بەينەلەيتىن قويىلىمدار قويىلىپ، ءان-كۇيدەن، جىر-تەرمەدەن شاشۋ شاشىلىپ، قولونەر جانە ءتۇرلى تاقىرىپتاعى كورمەلەر جۇرتشىلىققا تانىستىرىلدى.
