شىمكەنتتە قوعامدىق كولىكتەر قالىپتى رەجيمدە جۇمىس ىستەپ جاتىر

4976
Adyrna.kz Telegram

شىمكەنتتە ەنگىزىلگەن توتەنشە جاعدايعا قاراماستان قوعامدىق كولىكتەردىڭ جۇمىسى توقتاعان جوق. بۇگىنگى تاڭدا جولاۋشىلار دىتتەگەن جەرلەرىنە كەدەرگىسىز جەتۋدە. اۆتوبۋستار شتاتتىق رەجيمدە تاڭعى ساعات 7.00-دەن كەشكە 21.00-گە دەيىن بارلىق باعىتتا قىزمەت كورسەتۋدە. ينتەرنەت بايلانىسىنىڭ شەكتەلۋىنە وراي العاشقىدا جولاقى تەك قولما-قول جۇزەگە اسىرىلعانىمەن، قازىر جولاۋشىلار ەلەكتروندىق تولەممەن تولەۋگە مۇمكىندىك الدى.

قاقتىعىس كەزىندە اسكەريلەر مەن قۇقىق قورعاۋ ورگاندارىنا كومەك رەتىندە اۆتوبۋستار جەتكىزىپ بەرىلدى. بۇلىكشىلەر اكىمدىك ماڭايىنداعى 3 اۆتوبۋستى تاس-تالقان ەتكەن. قازىر مەكەمە باسشىلارى شىعىنداردى ەسەپتەپ، ءتيىستى ۇسىنىستارىن ازىرلەۋدە. ال ورىن العان جاپپاي تارتىپسىزدىك ارەكەتتەرىنەن سوڭ قوعامدىق كولىكتەر 6 قاڭتار كۇنى ۋاقىتشا باعىتتارعا شىققان جوق.
«ت BUS» كومپانياسى ديرەكتورىنىڭ ورىنباسارى ابدىبەك ۇكىباەۆ قالا حالقىنىڭ دەنى بۇگىندە ەلەكتروندى تولەم جۇيەسىنە جاپپاي كوشكەنىن ايتادى. الايدا، ينتەرنەتتىڭ جوقتىعىنان ىسكە قوسىلماي تۇرعان قۇرىلعىلار جولاۋشىلاردىڭ قاتىناۋىنا ەشقانداي كەدەرگى بولىپ وتىرعان جوق.
ايتا كەتەيىك، شاھاردا 78 باعىتتا اۆتوبۋس قاتىنايدى. كۇن سايىن بەلگىلەنگەن كەستە بويىنشا 1 مىڭعا جۋىق قوعامدىق كولىك جولعا شىعادى.

پىكىرلەر