اقتوبە وبلىسىندا تارتىپسىزدىكتەر سالدارىنان 50-دەن استام ادام مەديتسينالىق كومەك العان

1900
Adyrna.kz Telegram

قازىرگى تاڭدا اقتوبە وبلىسىندا احۋال تۇراقتى. وبلىستا كەشكى ساعات 23.00-دەن تاڭعى 7.00-گە دەيىن كومەندانتتىق ساعات ەنگىزىلدى. وبلىس اۋماعىنداعى بارلىق اۆتوجولدارعا 10 بلوك-بەكەت قويىلدى. قازىر بلوك-بەكەتتەردە پوليتسيا جانە قورعانىس قىزمەتكەرلەرى جۇمىس ىستەپ تۇر دەپ حابارلايدى "ادىرنا" ۇلتتىق پورتالىنىڭ ءتىلشىسى.

كىرىپ-شىعىپ جاتقان جولاۋشىلاردان تىيىم سالىنعان زاتتاردىڭ بار-جوعى تەكسەرىلۋدە. ال بلوك-بەكەتتەردە تىنىشتىقتى ساقتاپ تۇرعان اسكەريلەرگە جەرگىلىكتى اتقارۋشى ورگاندار ىستىق تاماق جەتكىزۋدە.

ايتا كەتۋ كەرەك، بۇعان دەيىن اقتوبەدە كومەندانتتىق ساعات ءتارتىبىن بۇزعان 400-گە جۋىق، شەرۋ كەزىندە تارتىپسىزدىك ۇيىمداستىرعان 11 ادام ۇستالسا، وتكەن تاۋلىكتە 89 تۇرعىن پوليتسيا بولىمىنە جەتكىزىلگەن. ولاردىڭ ىشىندە 32 ادامعا اكىمشىلىك جازا قولدانىلعان.

جالپى اقتوبە قالاسىندا بولعان تارتىپسىزدىك سالدارىنان 14 پوليتسەي زارداپ شەككەن. ونىڭ ەكەۋى بۇگىندە اۋرۋحانادا جاتىر.

جەدەل مەديتسينالىق جاردەم اۋرۋحاناسىنىڭ باس دارىگەرى ساكەن قاپانوۆتىڭ ايتۋىنشا، اتالعان اۋرۋحاناعا مەديتسينالىق كومەك الۋعا 50-دەن استام ادام جۇگىنگەن. ونىڭ 15-ءى اۋرۋحاناعا جاتقىزىلعان. ولاردىڭ قاتارىندا اسكەريلەر مەن پوليتسيا قىزمەتكەرلەرى بار.

جالپى وبلىس بويىنشا تارتىپسىزدىكتەر كەزىندە دەنساۋلىعىنا زاقىم كەلگەن ازاماتتار تۋرالى  ناقتى اقپارات جوق.

 

"ادىرنا" ۇلتتىق پورتالى.

پىكىرلەر