استانا. قازاقپارات - بيىل ورالدا كۇي اتاسى قۇرمانعازىنىڭ 195 جىلدىعىنا وراي «دومبىرا كۇنىن» وتكىزۋ جوسپارلانىپ وتىر. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە وبلىس اكىمى التاي كولگىنوۆ ءمالىم ەتتى، دەپ حابارلايدى «قازاقپارات» ءتىلشىسى.
ءوڭىر باسشىسىنىڭ ايتۋىنشا، ۇلتتىق ءداستۇردى ساقتاۋ، قايتا جاڭعىرتۋ ماقساتىندا وبلىستا كەشەندى جۇمىستار اتقارىلۋدا. ۇلتىمىزدىڭ ۇلى مۇراسى - دومبىرا ءۇنىن جاستاردىڭ بويىنا ءسىڭىرۋ ماقساتىندا بارلىق مەكتەپتەردە ءۇزىلىس كەزىندە قازاق كومپوزيتورلارىنىڭ كۇيلەرىن ويناتۋ قولعا الىندى. وعان قوسا مەكتەپتەردە دومبىرا ۇيىرمەلەرى كەڭەيتىلۋدە. سونىمەن قاتار وبلىس، اۋدان ورتالىقتارىنىڭ كوپشىلىك جينالاتىن ورىندارىندا مۋزىكا مەكتەپتەرىنىڭ ۇلت اسپاپتار وركەسترلەرى دەمالىس كۇندەرى ونەر كورسەتۋدە.
الداعى ۋاقىتتا بوكەي ورداسى تاريحي-مۋزەي كەشەنىنىڭ قۇرامىنا كىرەتىن داۋلەتكەرەي شىعايۇلىنىڭ كەسەنەسى قالپىنا كەلتىرىلەتىن بولادى.
«جالپى، «قاسيەتتى قازاقستان» تىزىمىنە وبلىستان 7 ءىرى نىسان كىرسە، سونىڭ ءبىرى - وسى بوكەي ورداسى تاريحي-مۋزەي كەشەنى. وعان الىس-جاقىن ەلدەردەن كەلەتىن تۋريستەردىڭ دە قىزىعۋشىلىعى ايرىقشا. بوكەي حاندىعىنىڭ نەگىزىن 1801 جىلى بوكەي حاننىڭ قالاعانى بەلگىلى. ودان كەيىن بوكەيدىڭ ۇلى جاڭگىر حاندىق قۇرعان. وسى جەردە قازاق دالاسىنداعى ەڭ العاشقى مەكتەپ (1841 جىلى), قازىناشىلىق ءۇيى، باسپاحانا اشىلعان جانە 60-تان استام تاريحي-مادەني ەسكەرتكىشتەر ساقتالعان. وبلىس ورتالىعىنان شالعاي جەردە، 600 شاقىرىم قاشىقتىقتا ورنالاسقان كەشەندە ءتۋريزمدى دامىتۋ ماقساتىندا كىشى اۆياتسيانى، جەرگىلىكتى اۋە جەلىلەرىن دامىتۋدى قولعا الۋدامىز. قازىرگى تاڭدا تەحنيكالىق-ەكونوميكالىق نەگىزدەمە جاساۋعا قارجى ءبولىندى. وسىعان سايكەس بۇرىن بولعان اۋە ايلاقتارى قايتا قالپىنا كەلتىرىلەتىن بولادى»، - دەدى التاي كولگىنوۆ.
