ASTANA. QazAqparat - Bıyl Oralda kúı atasy Qurmanǵazynyń 195 jyldyǵyna oraı «Dombyra kúnin» ótkizý josparlanyp otyr. Bul týraly búgin Ortalyq kommýnıkaııalar qyzmetinde ótken brıfıngte oblys ákimi Altaı Kólginov málim etti, dep habarlaıdy «QazAqparat» tilshisi.
Óńir basshysynyń aıtýynsha, ulttyq dástúrdi saqtaý, qaıta jańǵyrtý maqsatynda oblysta keshendi jumystar atqarylýda. Ultymyzdyń uly murasy - dombyra únin jastardyń boıyna sińirý maqsatynda barlyq mektepterde úzilis kezinde qazaq kompozıtorlarynyń kúılerin oınatý qolǵa alyndy. Oǵan qosa mektepterde dombyra úıirmeleri keńeıtilýde. Sonymen qatar oblys, aýdan ortalyqtarynyń kópshilik jınalatyn oryndarynda mýzyka mektepteriniń ult aspaptar orkestrleri demalys kúnderi óner kórsetýde.
Aldaǵy ýaqytta Bókeı ordasy tarıhı-mýzeı kesheniniń quramyna kiretin Dáýletkereı Shyǵaıulynyń kesenesi qalpyna keltiriletin bolady.
«Jalpy, «Qasıetti Qazaqstan» tizimine oblystan 7 iri nysan kirse, sonyń biri - osy Bókeı ordasy tarıhı-mýzeı kesheni. Oǵan alys-jaqyn elderden keletin týrısterdiń de qyzyǵýshylyǵy aıryqsha. Bókeı handyǵynyń negizin 1801 jyly Bókeı hannyń qalaǵany belgili. Odan keıin Bókeıdiń uly Jáńgir handyq qurǵan. Osy jerde qazaq dalasyndaǵy eń alǵashqy mektep (1841 jyly), qazynashylyq úıi, baspahana ashylǵan jáne 60-tan astam tarıhı-mádenı eskertkishter saqtalǵan. Oblys ortalyǵynan shalǵaı jerde, 600 shaqyrym qashyqtyqta ornalasqan keshende týrızmdi damytý maqsatynda kishi avıaııany, jergilikti áýe jelilerin damytýdy qolǵa alýdamyz. Qazirgi tańda tehnıkalyq-ekonomıkalyq negizdeme jasaýǵa qarjy bólindi. Osyǵan sáıkes buryn bolǵan áýe aılaqtary qaıta qalpyna keltiriletin bolady», - dedi Altaı Kólginov.
