بۇگىن شىمكەنت قالاسىنىڭ اكىمى مۇرات ايتەنوۆ ەڭبەكشى اۋدانىنا قاراستى قاراباستاۋ تۇرعىن الابىنا ارنايى بارىپ، ينجەنەرلىك جۇيەلەرمەن قامتۋ، جول جوندەۋ، اباتتاندىرۋ بويىنشا اتقارىلعان جۇمىستاردى قاداعالادى.
قالانىڭ بەس جىلدىق دامۋ جوسپارىنا سايكەس، ەلدى مەكەندەردى ينجەنەرلىك جەلىلەرمەن قامتۋدىڭ جول كارتاسى بەكىتىلگەن. قالا شاعىن اۋداندارى مەن تۇرعىن الاپتارىندا ايقىندالعان وزەكتى ماسەلەلەر وسى مەجەگە سايكەس كەزەڭ-كەزەڭىمەن شەشىلەتىن بولادى.
بيىلعى جىلى تۇرعىن الاپتىڭ جاڭاقۇرىلىس اۋماعىندا قونىستانعان ءبىر جارىم مىڭعا جۋىق ابونەنتتى ساپالى اۋىز سۋمەن قامتۋدىڭ جوبالاۋ-سمەتالىق قۇجاتتارى ازىرلەنىپ، مەملەكەتتىك ساراپتامادان وتكىزىلۋدە. تارتىپكە سايكەس، قاجەتتى قۇجاتتار توپتاماسى ازىرلەنگەننەن كەيىن نىسان قۇرىلىسىنا قارجى باعىتتالىپ، جاڭا سۋ قۇبىرلارى تارتىلاتىن بولادى.
ەلدى مەكەندەگى ەلەكتر جەلىلەرىن جاڭارتۋ باعىتىندا بيىلعى جىلى «وڭتۇستىك جارىق ترانزيت» جشس-ءنىڭ ينۆەستيتسيالىق باعدارلاماسى اياسىندا قۇرىلىس-مونتاجداۋ جۇمىستارى جۇرگىزىلدى. جوبا بويىنشا 19 شاقىرىم ەلەكتر جەلىلەرى تارتىلىپ، 800-گە جۋىق باعان مەن 5 ترانسفورماتورلىق بەكەتتەر اۋىستىرىلعان. جاڭاقۇرىلىس اۋماعىندا 750 ابونەنتتى بيۋدجەت ەسەبىنەن ساپالى ەلەكتر جەلىسىمەن قامتۋ جۇمىستارى اتقارىلدى. ناتيجەسىندە، ەلدى مەكەندەگى 1350 جاڭا ابونەنت ساپالى ەلەكتر قۋاتىمەن قامتىلدى.
تابيعي گاز جۇيەلەرىن تارتۋ بويىنشا كەلەسى جىلى ءتيىستى جوبالىق-سمەتالىق قۇجاتتار ازىرلەنەتىن بولادى.
جول ينفراقۇرىلىمى سالاسىندا جاڭاقۇرىلىس اۋماعىنداعى 26 كوشەدە تاس توسەۋ جۇمىستارى جۇرگىزىلگەن. وسى اۋماقتا اشىق ۇلگىدەگى زاماناۋي سپورت الاڭشاسى تۇرعىندار يگىلىگىنە بەرىلگەن.
قالا اكىمى اتالعان جۇمىستاردىڭ بارلىعى تۇرعىنداردىڭ يگىلىگى ءۇشىن اتقارىلىپ جاتقانىن اتاپ ءوتتى. ەلدى مەكەندەردە ازاماتتار ءۇشىن لايىقتى ءومىر ساپاسىن قامتاماسىز ەتۋ باعىتىندا اۋقىمدى جۇمىستار جوسپارلى تۇردە جۇزەگە اسىپ، ەلدى مەكەندەگى وزەكتى ماسەلەلەر رەتىمەن شەشىلەتىندىگىن ايتتى.
شىمكەنت قالاسى اكىمدىگىنىڭ ءباسپاسوز قىزمەتى
