جاڭاوزەن: گاز باعاسىنىڭ قىمباتتاۋىنا نارازى حالىق جولدى جاۋىپ تاستادى

3443
Adyrna.kz Telegram

كەشە 2 قاڭتار كۇنى جاڭاوزەن قالاسىنىڭ تۇرعىندارى الاڭعا شىعىپ، وبلىستاعى گازدىڭ باعاسى 120 تەڭگەگە قىمباتتاپ كەتكەنىنە بايلانىستى نارازىلىقتارىن بىلدىرگەن. ولار ەڭ تومەنگى باعانى جالاقى مولشەرىنە سايكەس 60 تەڭگەگە دەيىن تومەندەتۋدى تالاپ ەتۋدە. الەۋمەتتىك جەلىلەردە نارازىلىق بىلدىرۋشىلەر ۇيلەرىنە قايتپاي، ءتۇنى بويى الاڭدا تۇرعانى جايلى اقپاراتتار تاراۋدا، دەپ حابارلايدى  "ادىرنا" ۇلتتىق پورتالى stan.kz-كە سىلتەمە جاساپ.

ميتينگ جاڭاوزەن

تولقۋدىڭ باسى

جاڭاوزەندە تۇرعىندار گاز باعاسىن تومەندەتۋدى تالاپ ەتىپ، ءتۇننىڭ ءبىر ۋاعىنا دەيىن كوشەدە جۇرسە، كۇندىزگى ۋاقىتتا بيلىكتى تالاپ-تىلەكتەرىن ورىنداۋعا شاقىرىپ، قالانىڭ باستى كوشەسىن جاۋىپ تاستادى. تولقۋ قالادا سۇيىتىلعان كولىك گازى 31 جەلتوقساندا 100 تەڭگەگە جانە 1 قاڭتاردا 120 تەڭگەگە كوتەرىلگەننەن كەيىن باستالعان.

العاشىندا گاز باعاسىن تومەندەتۋدى تالاپ ەتكەن جۇزدەگەن ادام كوشەگە شىققان. ولاردىڭ اراسىندا كولىگى بار تۇرعىندار مەن كولىگى جوق ادامدار دا بار.

جينالعاندار ۆيدەوۇندەۋ ءتۇسىرىپ ماڭعىستاۋ وبلىسى اكىمى نۇرلان نوعاەۆقا، جاڭاوزەن قالاسى اكىمى ماقسات يباعاروۆقا ۇندەۋ جاساپ، تەز ارادا گاز باعاسىن 50 تەڭگەگە ءتۇسىرۋدى جانە گاز تاپشىلىعىن بولدىرماۋدى تالاپ ەتتى.

"گازدى ءوزىمىز وندىرەمىز. سول جەرلەردە كوبىسىمىزدىڭ اعايىن-تۋىستارىمىز جۇمىس ىستەيدى. سولار ءوندىرىپ وتىرعان گازدىڭ وزىمىزگە جەتپەۋى اقىلعا قونبايدى. الدىمەن ءوز حالقىن قامتاماسىز ەتپەي جاتىپ، رەسەيگە شىعارىلماسىن. گازدىڭ دا باعاسى ەلدىڭ جالاقىسىنا ساي بولسىن. باعاسىن 50 تەڭگەدەن اسىرماسىن", - دەيدى جينالعانداردىڭ ءبىرى.

 

الەۋمەتتىك جەلىلەردە تارالعان ۆيدەولاردان ميتينگكە جينالۋشىلاردى ءتارتىپ ساقشىلارى باقىلاپ تۇرعانىن كورۋگە بولادى.

كۋاگەرلەر جاڭاوزەندە ينتەرنەتكە بۇعات سالىنعانىن ايتادى. جينالعاندار وزدەرى قويعان تالاپتى تەز ورىنداۋدى تالاپ ەتىپ، ورتالىق كوشەلەردىڭ ءبىرىن جاۋىپ تاستاعان. جينالعاندار ەشقايدا تارامايتىنىن ايتىپ، وبلىس بيلىگى ماسەلەنى شەشە الماسا نۇر-سۇلتاننان ارنايى ادام كەلۋىن جەتكىزگەن.

2 قاڭتار تۇستەن كەيىن جاڭاوزەندەگى حالىق نارازىلىعى ءالى دە جالعاسىپ جينالعانداردى ماڭعىستاۋ ءوڭىرىنىڭ وزگە دە اۋداندارى قولداعان. قاراقيا اۋدانىنداعى جەتىباي كەنتى مەن قۇرىق اۋىلىندا، تۇپقاراعان اۋدانى اقشۇقىر اۋىلىندا تۇرعىندار جينالىپ، قازاقستان پرەزيدەنتى قاسىم-جومارت توقاەۆقا، وبلىس اكىمى نۇرلان نوعاەۆ پەن اۋدان اكىمدەرىنە ۆيدەوۇندەۋ جولدادى. وندا تۇرعىندارعا ساتىلاتىن سۇيىتىلعان گاز باعاسىن 50-60 تەڭگەدەن اسىرماۋدى تالاپ ەتكەن.

بيلىكتىڭ جاۋابى

وقيعاعا بايلانىستى وبلىس اكىمدىگى مەن قازاقستاننىڭ ەنەرگەتيكا مينيسترلىگى تۇسىنىكتەمە بەردى. بيلىك وڭىردەگى كولىكتەردىڭ اۋقىمدى بولىگى وتىن رەتىندە پايدالاناتىن گاز نارىقتا قالىپتاسقان جاعدايعا جانە سۇرانىستىڭ كوبەيۋىنە بايلانىستى قىمباتتادى دەپ ءتۇسىندىردى.


مينيسترلىكتىڭ مالىمدەۋىنشە، ەلدە جىل سايىن سۇيىتىلعان گاز تۇتىنۋ ارتىپ وتىرادى، ال ءوندىرىس كولەمىن وتكەن جىلدارداعىدان وزگەرمەگەن.

"نارىق مەحانيزمدەرى باسەكەلەستىكتى دامىتۋعا وڭ اسەر ەتەدى. ەلەكترون ساۋدا-ساتتىققا كوشكەنگە دەيىن سۇيىتىلعان گاز وزىندىك قۇنىنان ارزان باعامەن ساتىلعاندىقتان وندىرۋشىلەر شىعىن شەگىپ كەلدى", - دەيدى مينيسترلىك.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى بەردىبەك قارتباەۆتىڭ سوزىنشە، 1973 جىلدان بەرى جۇمىس ىستەپ تۇرعان زاۋىتتىڭ قۇرال-جابدىعىنىڭ توزۋى 90 پايىزعا جەتكەن.

"ەگەر شۇعىل شارا قابىلدانباسا، بولاشاقتا زاۋىت توقتاپ، تيىسىنشە، سۇيىتىلعان گاز قات بولۋى مۇمكىن. جاڭا زاۋىت سالۋ جوسپارى بار، ونى ىسكە اسىرۋ ءۇشىن ءتيىستى شارالار اتقارىلۋى ءتيىس، سولاردىڭ ءبىرى – سۇيىتىلعان گاز نارىقتاعى سۇرانىسقا ساي باعامەن ساتىلۋى كەرەك", - دەيدى قارتباەۆ.

تۇنگى جاڭاوزەن

ماڭعىستاۋ وبلىسى جاڭاوزەن قالاسى تۇرعىندارىنىڭ گاز باعاسى قىمباتتاۋىنا بايلانىستى نارازىلىق اكتسيالارى تۇنگى ۋاقىتتا دا جالعاستى.

جەرگىلىكتى بيلىك وكىلدەرى مەن پروكۋراتۋرا ازاماتتاردى تاراۋعا شاقىرعانىنا قاراماستان، نارازى توپ تالاپتارى ورىندالمايىنشا الاڭنان كەتپەيتىنىن جەتكىزگەن.

توقاەۆتىڭ تاپسىرماسى

قازاقستان پرەزيدەنتى قاسىم-جومارت توقاەۆ جاڭاوزەندەگى حالىق نارازىلىعىنا بايلانىستى ۇكىمەتكە تاپسىرما بەردى.

پرەزيدەنت بۇل جايىندا تۇنگى ساعات 3-تە Twitter پاراقشاسىندا جازعان.

"ۇكىمەتكە جاڭاوزەندەگى جاعدايدى ەكونوميكالىق تۇرعىدان تەكسەرىپ، قۇقىقتىق جاعىنان تەز ارادا قاراستىرۋدى تاپسىردىم. شەرۋگە شىققاندار قوعامدىق ءتارتىپتى بۇزباۋى ءتيىس", - دەپ جازدى پرەزيدەنت.


كەيىنىرەك ول ازاماتتاردىڭ جەرگىلىكتى جانە ورتالىق بيلىك ورگاندارىنا ءوز تالاپتارىن اشىق ايتۋعا قۇقىعى بار، بىراق بۇل زاڭعا، اتاپ ايتقاندا، بەيبىت جينالىستار تۋرالى زاڭعا سايكەس جاسالۋى كەرەكتىگىن اتاپ وتكەن.

جاڭاوزەندەگى جاعداي قوعام نازارىندا

جاڭاوزەندەگى گاز باعاسىنىڭ قىمباتتاۋىنا بايلانىستى حالىقتىڭ نارازىلىعىنا قوعام بەلسەندىلەرى ءوز پىكىرلەرىن بىلدىرگەن. ساياساتكەر ءامىرجان قوسان بۇل وقيعانى سىرتقى كۇشتەر ءوز مۇددەسىنە پايدالانىپ كەتپەۋ قاجەتتىگىن ەسكەرتەدى.

"مينيسترلىكتىڭ قايداعى ءبىر جالپاقسوز پرەسس-رەليزى جەتكىلىكسىز - ۇكىمەت باسشىلارى بۇگىن سول جاققا بارىپ، اشىنعان جۇرتپەن اشىق تا بۇكپەسىز سويلەسۋى قاجەت! جاراتقان يەم قازاقتى قاندى قىرعىننان ساقتاسىن! ءوز باسىم وسى وقيعانى ارام ويلى ىشكى جانە سىرتقى كۇشتەر ءوز مۇددەسىنە پايدالانىپ كەتپەسە دەپ تىلەيمىن", - دەپ جازادى ول Facebook پاراقشاسىندا.

قوعام قايراتكەرى مۇحتار تايجان جاڭاوزەن حالقىنىڭ كوشەگە سەبەپسىز شىقپايتىنىنا توقتالعان.

"جاڭاوزەن حالقى كوشەگە جاي سەبەپسىز شىقپايدى. شىقتى ما ياعني وعان ناقتى سەبەپ بار. ەلدە ازىق-تۇلىكتىڭ باعالارى شىنىمەن اسپانعا ۇشىپ كەتكەن، ال جالاقى از، ءتىپتى جۇمىسسىزدىق باسىم. ءسوزدىڭ قىسقاسى بىزگە قاعيدا تۇرعىدا جاڭا پرەمەر-مينيستر كەرەك، ۇكىمەتتىڭ ەكونوميكالىق ساياساتى مۇلدەم وزگەرۋ كەرەك", - دەيدى تايجان.

زاڭگەر ابزال قۇسپان "مۇنايدىڭ، گازدىڭ بايلىعى - حالىقتىڭ بايلىعى"- دەگەندى ءسوز جۇزىندە دە، ءىس جۇزىندە دە دالەلدەگەن جاڭاوزەندىكتەر ەكەنىن ايتا كەلىپ، حالىقتىڭ جاڭاوزەنمەن بىرگە ەكەنىن جەتكىزگەن.

"ادىرنا" ۇلتتىق پورتالى

پىكىرلەر