Keshe 2 qańtar kúni Jańaózen qalasynyń turǵyndary alańǵa shyǵyp, oblystaǵy gazdyń baǵasy 120 teńgege qymbattap ketkenine baılanysty narazylyqtaryn bildirgen. Olar eń tómengi baǵany jalaqy mólsherine sáıkes 60 teńgege deıin tómendetýdi talap etýde. Áleýmettik jelilerde narazylyq bildirýshiler úılerine qaıtpaı, túni boıy alańda turǵany jaıly aqparattar taraýda, dep habarlaıdy "Adyrna" ulttyq portaly stan.kz-ke silteme jasap.
Tolqýdyń basy
Jańaózende turǵyndar gaz baǵasyn tómendetýdi talap etip, túnniń bir ýaǵyna deıin kóshede júrse, kúndizgi ýaqytta bılikti talap-tilekterin oryndaýǵa shaqyryp, qalanyń basty kóshesin jaýyp tastady. Tolqý qalada suıytylǵan kólik gazy 31 jeltoqsanda 100 teńgege jáne 1 qańtarda 120 teńgege kóterilgennen keıin bastalǵan.
Alǵashynda gaz baǵasyn tómendetýdi talap etken júzdegen adam kóshege shyqqan. Olardyń arasynda kóligi bar turǵyndar men kóligi joq adamdar da bar.
Jınalǵandar vıdeoúndeý túsirip Mańǵystaý oblysy ákimi Nurlan Noǵaevqa, Jańaózen qalasy ákimi Maqsat Ibaǵarovqa úndeý jasap, tez arada gaz baǵasyn 50 teńgege túsirýdi jáne gaz tapshylyǵyn boldyrmaýdy talap etti.
"Gazdy ózimiz óndiremiz. Sol jerlerde kóbisimizdiń aǵaıyn-týystarymyz jumys isteıdi. Solar óndirip otyrǵan gazdyń ózimizge jetpeýi aqylǵa qonbaıdy. Aldymen óz halqyn qamtamasyz etpeı jatyp, Reseıge shyǵarylmasyn. Gazdyń da baǵasy eldiń jalaqysyna saı bolsyn. Baǵasyn 50 teńgeden asyrmasyn", - deıdi jınalǵandardyń biri.
Áleýmettik jelilerde taralǵan vıdeolardan mıtıngke jınalýshylardy tártip saqshylary baqylap turǵanyn kórýge bolady.
Kýágerler Jańaózende ınternetke buǵat salynǵanyn aıtady. Jınalǵandar ózderi qoıǵan talapty tez oryndaýdy talap etip, ortalyq kóshelerdiń birin jaýyp tastaǵan. Jınalǵandar eshqaıda taramaıtynyn aıtyp, oblys bıligi máseleni sheshe almasa Nur-Sultannan arnaıy adam kelýin jetkizgen.
2 qańtar tústen keıin Jańaózendegi halyq narazylyǵy áli de jalǵasyp jınalǵandardy Mańǵystaý óńiriniń ózge de aýdandary qoldaǵan. Qaraqııa aýdanyndaǵy Jetibaı kenti men Quryq aýylynda, Túpqaraǵan aýdany Aqshuqyr aýylynda turǵyndar jınalyp, Qazaqstan prezıdenti Qasym-Jomart Toqaevqa, oblys ákimi Nurlan Noǵaev pen aýdan ákimderine vıdeoúndeý joldady. Onda turǵyndarǵa satylatyn suıytylǵan gaz baǵasyn 50-60 teńgeden asyrmaýdy talap etken.
Bıliktiń jaýaby
Oqıǵaǵa baılanysty oblys ákimdigi men Qazaqstannyń energetıka mınıstrligi túsinikteme berdi. Bılik óńirdegi kólikterdiń aýqymdy bóligi otyn retinde paıdalanatyn gaz naryqta qalyptasqan jaǵdaıǵa jáne suranystyń kóbeıýine baılanysty qymbattady dep túsindirdi.
Mınıstrliktiń málimdeýinshe, elde jyl saıyn suıytylǵan gaz tutyný artyp otyrady, al óndiris kólemin ótken jyldardaǵydan ózgermegen.
"Naryq mehanızmderi básekelestikti damytýǵa oń áser etedi. Elektron saýda-sattyqqa kóshkenge deıin suıytylǵan gaz ózindik qunynan arzan baǵamen satylǵandyqtan óndirýshiler shyǵyn shegip keldi", - deıdi mınıstrlik.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Berdibek Qartbaevtyń sózinshe, 1973 jyldan beri jumys istep turǵan zaýyttyń qural-jabdyǵynyń tozýy 90 paıyzǵa jetken.
"Eger shuǵyl shara qabyldanbasa, bolashaqta zaýyt toqtap, tıisinshe, suıytylǵan gaz qat bolýy múmkin. Jańa zaýyt salý jospary bar, ony iske asyrý úshin tıisti sharalar atqarylýy tıis, solardyń biri – suıytylǵan gaz naryqtaǵy suranysqa saı baǵamen satylýy kerek", - deıdi Qartbaev.
Túngi Jańaózen
Mańǵystaý oblysy Jańaózen qalasy turǵyndarynyń gaz baǵasy qymbattaýyna baılanysty narazylyq akııalary túngi ýaqytta da jalǵasty.
Jergilikti bılik ókilderi men prokýratýra azamattardy taraýǵa shaqyrǵanyna qaramastan, narazy top talaptary oryndalmaıynsha alańnan ketpeıtinin jetkizgen.
Toqaevtyń tapsyrmasy
Qazaqstan prezıdenti Qasym-Jomart Toqaev Jańaózendegi halyq narazylyǵyna baılanysty úkimetke tapsyrma berdi.
Prezıdent bul jaıynda túngi saǵat 3-te Twitter paraqshasynda jazǵan.
"Úkimetke Jańaózendegi jaǵdaıdy ekonomıkalyq turǵydan tekserip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tıis", - dep jazdy prezıdent.
Keıinirek ol azamattardyń jergilikti jáne ortalyq bılik organdaryna óz talaptaryn ashyq aıtýǵa quqyǵy bar, biraq bul zańǵa, atap aıtqanda, beıbit jınalystar týraly zańǵa sáıkes jasalýy kerektigin atap ótken.
Jańaózendegi jaǵdaı qoǵam nazarynda
Jańaózendegi gaz baǵasynyń qymbattaýyna baılanysty halyqtyń narazylyǵyna qoǵam belsendileri óz pikirlerin bildirgen. Saıasatker Ámirjan Qosan bul oqıǵany syrtqy kúshter óz múddesine paıdalanyp ketpeý qajettigin eskertedi.
"Mınıstrliktiń qaıdaǵy bir jalpaqsóz press-relızi jetkiliksiz - úkimet basshylary búgin sol jaqqa baryp, ashynǵan jurtpen ashyq ta búkpesiz sóılesýi qajet! Jaratqan ıem qazaqty qandy qyrǵynnan saqtasyn! Óz basym osy oqıǵany aram oıly ishki jáne syrtqy kúshter óz múddesine paıdalanyp ketpese dep tileımin", - dep jazady ol Facebook paraqshasynda.
Qoǵam qaıratkeri Muhtar Taıjan Jańaózen halqynyń kóshege sebepsiz shyqpaıtynyna toqtalǵan.
"Jańaózen halqy kóshege jaı sebepsiz shyqpaıdy. Shyqty ma ıaǵnı oǵan naqty sebep bar. Elde azyq-túliktiń baǵalary shynymen aspanǵa ushyp ketken, al jalaqy az, tipti jumyssyzdyq basym. Sózdiń qysqasy bizge qaǵıda turǵyda jańa premer-mınıstr kerek, úkimettiń ekonomıkalyq saıasaty múldem ózgerý kerek", - deıdi Taıjan.
Zańger Abzal Quspan "munaıdyń, gazdyń baılyǵy - halyqtyń baılyǵy"- degendi sóz júzinde de, is júzinde de dáleldegen Jańaózendikter ekenin aıta kelip, halyqtyń Jańaózenmen birge ekenin jetkizgen.
"Adyrna" ulttyq portaly
