«اردوس-جۇرەك» مۇگەدەكتەر بىرلەستىگى» زتب مۇمكىندىگى شەكتەۋلى ادامدارعا ارنالعان «Ten Qogam» ءموبيلدى قوسىمشاسىن تانىستىردى. قوسىمشا قازاقستاننىڭ بارلىق وڭىرلەرىندەگى مۇگەدەكتىگى بار ادامدار ءۇشىن قۇقىقتار، جەڭىلدىكتەر، وقىتۋ، جۇمىسپەن قامتۋ جانە باسقا دا كوپتەگەن ماسەلەلەر تۋرالى وزەكتى جۇيەلەنگەن ناقتى اقپاراتقا قولجەتىمدىلىكتى قامتاماسىز ەتەدى. جوبانى «شەۆرون» كومپانياسىمەن سەرىكتەستىكتە ورتالىق ازيانىڭ ەۋرازيا قورى (واەق) ازىرلەگەن «Qolda 3.0» جەدەل كومەك باعدارلاماسى اياسىندا جۇزەگە اسىرۋدا. جۋىردا م.قوزىباەۆ اتىنداعى سولتۇستىك قازاقستان ۋنيۆەرسيتەتىندە «Ten Qogam» ءموبيلدى قوسىمشاسىنىڭ تانىستىرىلىمى ءوتتى. بۇگىنگى تاڭدا قوسىمشانى Play Market-تەن جۇكتەپ الۋعا بولادى.
سولتۇستىك قازاقستان وبلىسىندا 26 000-نان استام مۇگەدەكتىگى بار ادام تۇرادى. تەحنولوگيالاردىڭ قارىشتاپ دامۋىنا قاراماستان، وسى ادامدار ءۇشىن قاجەتتى اقپاراتتى قامتىعان ساپالى ءموبيلدى قوسىمشالار مەن سايتتار ءالى دە جوق. جوبا كومانداسى مۇگەدەكتىگى بار ادامداردىڭ بارلىق ساناتتارىنا ارنالعان قازاق جانە ورىس تىلدەرىندە «Ten Qogam» ءموبيلدى قوسىمشاسىن ازىرلەدى.
«اردوس-جۇرەك» مۇگەدەكتەر بىرلەستىگىنىڭ ديرەكتورى اقجان كارىم بىلاي دەپ اتاپ ءوتتى:
«بۇل قوسىمشا مۇگەدەكتىگى بار ادامدارعا، سونداي-اق ولاردىڭ وتباسى مۇشەلەرىنە زاڭدارداعى سوڭعى وزگەرىستەر مەن مادەنيەت وبەكتىلەرىنىڭ قولجەتىمدىلىگى تۋرالى حاباردار بولۋعا مۇمكىندىك بەرەدى. قوسىمشا ارقىلى ينۆاتاكسي قىزمەتتەرىن پايدالانۋ، ازىق-تۇلىك، ءدارى-دارمەك جەتكىزۋگە تاپسىرىس بەرۋ مۇمكىندىگى پايدا بولدى».
قوسىمشادا كەلەسى بلوكتار بويىنشا وزەكتى اقپارات بار: قۇقىقتار، جەڭىلدىكتەر، وقىتۋ، جۇمىسپەن قامتۋ، مەملەكەتتىك ورگاندارمەن ءوزارا ءىس-قيمىل جانە ت. ب. بارلىق اقپارات كەز-كەلگەن قۇرىلعىدان كىرۋگە ىڭعايلى بولۋ ءۇشىن https://tenqogam.kz/ سايتىندا قايتالانادى. سولتۇستىك قازاقستان وبلىسىنىڭ تۇرعىندارى ءۇشىن وزەكتى اقپاراتتى قامتيتىن «قىزمەتتەر جانە سەرۆيس» قوسىمشا بەتىن بارلىق وبلىستارعا كەڭەيتۋ جوسپارلانۋدا.
ءموبيلدى قوسىمشانى ازىرلەۋگە حالىقتى جۇمىسپەن قامتۋ ورتالىعى، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى، الەۋمەتتىك قىزمەت كورسەتۋ ورتالىعى، «نۇر وتان» پارتياسى جانە قوعامدىق ۇيىمدار وكىلدەرىنەن تۇراتىن فوكۋس-توپتار قاتىستى. فوكۋس-توپتاردىڭ قاتىسۋشىلارى قوسىمشانىڭ وزەكتىلىگىن اتاپ ءوتتى جانە ءوز تاراپتارىنان قوسىمشانىڭ مازمۇنى مەن فۋنكتسيونالى بويىنشا ۇسىنىستارىمەن ءبولىستى. مىسالى، ولار قولجەتىمدىلىك ەلەمەنتتەرىن كورسەتە وتىرىپ، پايدالانۋشىلاردى مادەني-دەمالىس ءىس-شارالارى تۋرالى حاباردار ەتۋ ءۇشىن قوسىمشانى پايدالانۋدى ۇسىندى. سونداي-اق، قوسىمشاعا «سپورت» قوسىمشا بەتىن قوسۋ ۇسىنىلدى. وتىرىس قورىتىندىسى بويىنشا بارلىق قاتىسۋشىلار «Ten Qogam» ءموبيلدى قوسىمشاسىن جەتىلدىرۋگە جانە ىلگەرىلەتۋگە كومەك كورسەتۋگە كەلىستى.
"ادىرنا" ۇلتتىق پورتالى
