رەسەي بايقوڭىر عارىش ايلاعىنىڭ 16 نىسانىن ارەندادان شىعارماقشى. ولار 2022 جىلدىڭ سوڭىنا دەيىن قازاقستانعا قايتارىلادى، دەپ حابارلادى ريا نوۆوستي-گە عارىش ايلاعىنداعى دەرەككوز.
"رەسەي تاراپى عارىش ايلاعىنداعى كەلەشەگى جوق، ودان ءارى پايدالانىلمايتىن نىسانداردىڭ ءتىزىمىن جاسادى. وعان رەسەي فەدەراتسياسى جالعا الىپ وتىرعان 16 نىسان كىردى", - دەدى دەرەككوز.
ول رەسەيگە كەرەكسىز نىساندار قازاقستاندىق تاراپقا كەلەسى جىلدىڭ سوڭىنا دەيىن تاپسىرىلۋعا ءتيىس ەكەنىن اتاپ ءوتتى.
دەرەككوزدىڭ ايتۋىنشا، تىزىمگە تەك جىلجىمايتىن مۇلىك قانا ەنگەن جوق، مۇلىكتىڭ ءبىر بولىگىنىڭ قالدىق قۇنى بار. قازىر ارنايى كوميسسيا قازاقستانعا تاپسىرار الدىندا ونى رەسەيلىك كاسىپورىنداردىڭ ەسەبىنەن شىعارۋ مۇمكىندىگىن پىسىقتاپ جاتىر.
بۇعان دەيىن "روسكوسموس" باس ديرەكتورى دميتري روگوزين رەسەي بايقوڭىر عارىش ايلاعىنداعى وزىنە قاجەتسىز نىسانداردى ارەندادان شىعارعىسى كەلەتىنىن مالىمدەدى.
رەسەي بۇل نىسانداردى پايدالانبايدى، سوندىقتان ول ءۇشىن جاۋاپكەرشىلىك الۋ اقىلعا قونىمسىز، دەيدى ول.
رەسەيدىڭ قازاقستاننان بايقوڭىر عارىش ايلاعىن 2050 جىلعا دەيىن جالعا الۋ تۋرالى شارتىنا ەنگىزىلگەن وزگەرىستەر 2021 جىلدىڭ جازىندا كۇشىنە ەندى. ەندى عارىش ايلاعى 2050 جىلعا دەيىن جالعا بەرىلەدى.
بۇعان دەيىن 1994 جىلى قول قويىلعان شارتتا بايقوڭىر رەسەيگە جيىرما جىلعا جالعا بەرىلەتىنى ايتىلعان بولاتىن. ارەندا مەرزىمىن 2020 جىلعا دەيىن ۇزارتۋ تۋرالى ۋاعدالاستىققا 2004 جىلى قول جەتكىزىلدى.
رەسەي بايقوڭىردى جالعا العانى ءۇشىن جىل سايىن 115 ميلليون دوللار تولەيدى.
“ادىرنا” ۇلتتىق پورتالى
