Reseı Baıqońyr ǵarysh aılaǵynyń 16 nysanyn arendadan shyǵarmaqshy

2964
Adyrna.kz Telegram

Reseı Baıqońyr ǵarysh aılaǵynyń 16 nysanyn arendadan shyǵarmaqshy. Olar 2022 jyldyń sońyna deıin Qazaqstanǵa qaıtarylady, dep habarlady RIA Novostı-ge ǵarysh aılaǵyndaǵy derekkóz.

"Reseı tarapy ǵarysh aılaǵyndaǵy keleshegi joq, odan ári paıdalanylmaıtyn nysandardyń tizimin jasady. Oǵan Reseı Federaııasy jalǵa alyp otyrǵan 16 nysan kirdi", - dedi derekkóz.

Ol Reseıge kereksiz nysandar qazaqstandyq tarapqa kelesi jyldyń sońyna deıin tapsyrylýǵa tıis ekenin atap ótti.

Derekkózdiń aıtýynsha, tizimge tek jyljymaıtyn múlik qana engen joq, múliktiń bir bóliginiń qaldyq quny bar. Qazir arnaıy komıssııa Qazaqstanǵa tapsyrar aldynda ony reseılik kásiporyndardyń esebinen shyǵarý múmkindigin pysyqtap jatyr.

Buǵan deıin "Roskosmos" bas dırektory Dmıtrıı Rogozın Reseı Baıqońyr ǵarysh aılaǵyndaǵy ózine qajetsiz nysandardy arendadan shyǵarǵysy keletinin málimdedi.

Reseı bul nysandardy paıdalanbaıdy, sondyqtan ol úshin jaýapkershilik alý aqylǵa qonymsyz, deıdi ol.

Reseıdiń Qazaqstannan Baıqońyr ǵarysh aılaǵyn 2050 jylǵa deıin jalǵa alý týraly shartyna engizilgen ózgerister 2021 jyldyń jazynda kúshine endi. Endi ǵarysh aılaǵy 2050 jylǵa deıin jalǵa beriledi.

Buǵan deıin 1994 jyly qol qoıylǵan shartta Baıqońyr Reseıge jıyrma jylǵa jalǵa beriletini aıtylǵan bolatyn. Arenda merzimin 2020 jylǵa deıin uzartý týraly ýaǵdalastyqqa 2004 jyly qol jetkizildi.

Reseı Baıqońyrdy jalǵa alǵany úshin jyl saıyn 115 mıllıon dollar tóleıdi.

“Adyrna” ulttyq portaly

Pikirler