الەۋمەتتىك جەلىدە تۇركىستان وبلىسى ءبىلىم باسقارماسى قىزمەتكەرلەرىنىڭ جاڭاجىلدىق كەشىنەن ۆيدەولار تاراپ جاتىر، دەپ حابارلايدى ”ادىرنا” ۇلتتىق پورتالى Otyrar.kz سايتىنا سىلتەمە جاساپ.
كادردا ءبىر توپ ادامنىڭ دامحاناعا جينالىپ، مەرەكەنى تويلاپ جاتقانى كورىنەدى. بىراق كەنەتتەن پوليتسيا قىزمەتكەرلەرى مەن بلوگەرلەر بولمەگە كىرىپ كەلەدى. ولاردى كورگەن قىزمەتكەرلەر بەتتەرىن جاۋىپ اسىعىس شىعا باستايدى.
ۆيدەو اۆتورى مەكتەپتەر مەن بالاباقشالاردا ەرتەڭگىلىككە تىيىم سالىنعانىمەن، شەنەۋنىكتەردىڭ كورپوراتيۆ وتكىزىپ جاتقانىنا نارازىلىعىن بىلدىرگەن.
سونداي-اق جازبانى جاريالاۋشى تۇركىستان وبلىسى ءبىلىم باسقارماسىنىڭ باسشىسى راحىمبەك جولاەۆ كورپوراتيۆتەن قاشىپ كەتكەنىن ءتۇسىرىپ العانىن ايتادى. ۆيدەودا ەر ادامنىڭ كوشەدەگى وپەراتوردان قاشىپ، شاعىن ارنادان وتكەنى كورسەتىلەدى. كەيىن كولىككە ءمىنىپ، قاشىپ كەتەدى.
الايدا وبلىستىق ءبىلىم باسقارماسى ۆيدەودا تۇركىستان وبلىسى ءبىلىم باسقارماسىنىڭ باسشىسىنىڭ جوق ەكەنىن مالىمدەدى.
"بۇل ۆيدەوداعى باسقارما باسشىسى ەمەس، بۇل قاتە اقپارات. كافەگە كەلسەك، ءيا وندا قىزمەتكەرلەر جينالعان، ولارعا جاي عانا سەرتيفيكاتتار بەرىلگەن. باسشى بارىپ قۇتتىقتاپ، كەتىپ قالعان. ەشكىم كارانتين شارالارىن بۇزعان جوق", - دەپ ءتۇسىندىردى ۆەدومستۆو ءباسپاسوز قىزمەتى باسشىسى.
كەيىن كورپوراتيۆتىڭ ۆيدەوسىن ءتۇسىرىپ، الەۋمەتتىك جەلىگە جاريالاعان قوعام بەلسەندىلەرى سوتقا تارتىلاتىنى بەلگىلى بولدى. بەلسەندىلەرگە قارسى ارىزدى تۇركىستان وبلىسى اكىمدىگىنىڭ قىزمەتكەرلەرى جازعان.
شەنەۋنىكتەر ۆيدەو مەملەكەتتىك قىزمەتكەرلەردىڭ بەدەلىنە نۇقسان كەلتىردى دەپ وتىر: سانيتارلىق تالاپتار بۇزىلماعان. ۆەدومستۆو وكىلدەرىنىڭ ايتۋىنشا، بانكەت زاڭدى تۇردە ۇيىمداستىرىلعان، مەيرامحاناعا نەبارى 50 ادام جينالعان.
ء"ۇش-ءتورت قىزمەتكەردىڭ اتىنان ولاردىڭ بەدەلىنە نۇقسان كەلتىرگەنى ءۇشىن سوتقا تالاپ-ارىزدار دايىندالىپ جاتىر. سانيتاريا دارىگەر 100 ادامعا دەيىن كورپوراتيۆتىك شارالار وتكىزۋگە رۇقسات بەردى. ال بۇل تالاپتار بۇزىلعان جوق", - دەدى تۇركىستان وبلىسىنىڭ ادامي دامۋ دەپارتامەنتى باسشىسى ءالجان ساپاربەكوۆ.
“ادىرنا” ۇلتتىق پورتالى
