Áleýmettik jelide Túrkistan oblysy bilim basqarmasy qyzmetkerleriniń jańajyldyq keshinen vıdeolar tarap jatyr, dep habarlaıdy ”Adyrna” ulttyq portaly Otyrar.kz saıtyna silteme jasap.
Kadrda bir top adamnyń dámhanaǵa jınalyp, merekeni toılap jatqany kórinedi. Biraq kenetten polıııa qyzmetkerleri men blogerler bólmege kirip keledi. Olardy kórgen qyzmetkerler betterin jaýyp asyǵys shyǵa bastaıdy.
Vıdeo avtory mektepter men balabaqshalarda erteńgilikke tyıym salynǵanymen, sheneýnikterdiń korporatıv ótkizip jatqanyna narazylyǵyn bildirgen.
Sondaı-aq jazbany jarııalaýshy Túrkistan oblysy bilim basqarmasynyń basshysy Rahymbek Jolaev korporatıvten qashyp ketkenin túsirip alǵanyn aıtady. Vıdeoda er adamnyń kóshedegi operatordan qashyp, shaǵyn arnadan ótkeni kórsetiledi. Keıin kólikke minip, qashyp ketedi.
Alaıda oblystyq bilim basqarmasy vıdeoda Túrkistan oblysy bilim basqarmasynyń basshysynyń joq ekenin málimdedi.
"Bul vıdeodaǵy basqarma basshysy emes, bul qate aqparat. Kafege kelsek, ıá onda qyzmetkerler jınalǵan, olarǵa jaı ǵana sertıfıkattar berilgen. Basshy baryp quttyqtap, ketip qalǵan. Eshkim karantın sharalaryn buzǵan joq", - dep túsindirdi vedomstvo baspasóz qyzmeti basshysy.
Keıin korporatıvtiń vıdeosyn túsirip, áleýmettik jelige jarııalaǵan qoǵam belsendileri sotqa tartylatyny belgili boldy. Belsendilerge qarsy aryzdy Túrkistan oblysy ákimdiginiń qyzmetkerleri jazǵan.
Sheneýnikter vıdeo memlekettik qyzmetkerlerdiń bedeline nuqsan keltirdi dep otyr: sanıtarlyq talaptar buzylmaǵan. Vedomstvo ókilderiniń aıtýynsha, banket zańdy túrde uıymdastyrylǵan, meıramhanaǵa nebári 50 adam jınalǵan.
"Úsh-tórt qyzmetkerdiń atynan olardyń bedeline nuqsan keltirgeni úshin sotqa talap-aryzdar daıyndalyp jatyr. Sanıtarııa dáriger 100 adamǵa deıin korporatıvtik sharalar ótkizýge ruqsat berdi. Al bul talaptar buzylǵan joq", - dedi Túrkistan oblysynyń Adamı damý departamenti basshysy Áljan Saparbekov.
“Adyrna” ulttyq portaly
