قازاقتا ءتورت تۇلىكتىڭ تورەسى جىلقىعا جانى قۇمار نازىك جاندىلار از ەمەس. سولاردىڭ ءبىرى – عاليا تاراسوۆا. بۇگىندە 21 جاستاعى ارۋ ۇلتتىق سپورت ءتۇرىن دامىتىپ، ءتۇرلى بايقاۋعا قاتىسىپ ءجۇر.
– عاليا، جىگىتتەرمەن يىق تىرەسىپ، ات جالىن تارتىپ مىنگەن قىزسىز. بۇل ونەرمەن قالاي تانىستىڭىز؟
– اتقا ءمىنۋدى 18 جاسىمدا ۇيرەندىم. سودان بەرى جىلقىعا ۇيىرسەكپىن. كوللەدجدە وقىپ جۇرگەنىمدە «سارباز رۋحى» تاريحي-پاتريوتتىق كلۋبىنىڭ مۇشەلەرى كەلىپ، وزدەرىنىڭ قاتارلارىنا قوسىلۋعا شاقىرعان ەدى. كەيىن كاستينگتەن ءوتىپ، جاڭا قىرىمدى بايقاي باستادىم. قازىرگى ۋاقىتتا كوماندادا 3 قىز عانا قالدىق. ءبىزدىڭ جەتەكشىمىز – اسەل الىشەروۆا، ال اكروباتيكا بويىنشا جاتتىقتىرۋشىمىز – كۋۆان سوپۋبەكوۆ. تالىمگەرلەرىمىز باسىنان باستاپ اتقا قالاي دۇرىس وتىرۋدى، ونىڭ ۇستىندە ەركىن بولۋدى، سەكىرۋدى، تريۋكتەر جاساۋدى ۇيرەتتى. العاشقى كەزدە تالاي رەت قۇلاپ قالعانمىن. بارلىعىن تولىق مەڭگەرۋگە 1 جىلدان استام ۋاقىتىم كەتتى.
– جارىستارعا ءجيى قاتىساسىز با؟
– ءيا، سەبەبى ات دەسە ىشكەن اسىمدى جەرگە قويامىن. وسى ۋاقىتقا دەيىن رەسپۋبليكالىق، حالىقارالىق دودالاردا باق سىنادىم. سونىڭ ىشىندە 2018 جىلى قىرعىزستاندا وتكەن III دۇنيەجۇزىلىك كوشپەندىلەر ويىنىن، 2019 جىلى پولشادا وتكەن «Face of tradition» فەستيۆالىن ەرەكشە اتاپ وتە الامىن. ونىڭ بىرەۋىندە ەكىنشى ورىن الساق، ەكىنشىسىندە «كورەرمەندەر كوزايىمى» اتاندىق.
– كەرەمەت! ال جىلقىنى كىم باپتايدى؟
– جالپى ات باپتاۋدى اتادان قالعان اسىل ونەر دەپ سانايمىن. بوس ۋاقىتىمدا وعان ءوزىم قارايمىن. تۇلپارىمدى تازالاپ، ابزەلىن كيگىزەمىن. سونداي-اق بىرگە جاتتىعۋلار وتكىزىپ تۇرامىن. ال نەگىزىنەن ءبىزدىڭ اتتار اتقورادا بولادى. ارنايى قاراۋشىلارى بار.
– عاليا، اتقا ءمىنۋدى قالاي تەز ۇيرەنۋگە بولادى؟ بالكىم، لايفكاحتارىمەن بولىسەرسىز.
– ەڭ الدىمەن، ءسىز اتپەن تانىسىپ، ونىمەن بايلانىس ورناتۋىڭىز كەرەك. سويلەسىڭىز، تاماقتاندىرىڭىز، ۇستىندە وتىرعاندا سەنىمدى بولىڭىز. باستاپقى كەزدە بىرنەشە رەت قۇلاپ قالۋىڭىز مۇمكىن. ونى قالىپتى جاعداي رەتىندە قابىلداڭىز. بارلىعى تاجىريبە ارقىلى كەلەتىنىن ۇمىتپاۋ قاجەت. بۇل جانۋار بارلىعىن سەزەدى. ونى ۇرىپ-سوعۋعا بولمايدى. وسى ورايدا جىلقىنى دۇرىس باسقارۋدى ۇيرەنۋ دە ماڭىزدى. ەڭبەكتەنىڭىز، تىرىسىڭىز. سول كەزدە ناتيجەنى كورەسىز.
– اڭگىمەڭىزگە راقمەت! ساتتىلىك تىلەيمىز!
اڭگىمەلەسكەن ديانا اسان،
«ادىرنا» ۇلتتىق پورتالى
