2022 جىل COVID-19 پاندەمياسى اياقتالاتىن جىل بولۋى كەرەك. بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋس مالىمدەدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
"مەنىڭ ويىمشا، ەكى جىلدان كەيىن ۆيرۋستى جاقسى بىلەمىز، بىزدە جاقسى قۇرال بار. ءۇمىت بار. سوندىقتان مالىمدەمەمدە پاندەميانى 2022 جىلى اياقتاۋىمىز كەرەك ەكەنىن ايتتىم", - دەدى ول سارسەنبىدە وتكەن بريفينگتە.
ددسۇ باسشىسىنىڭ ايتۋىنشا، قازىر ەڭ باستى ماسەلە - ۆاكتسينا مەن دەنساۋلىق ساقتاۋداعى باسقا شارالاردى قوسا العاندا، قولدا بار ءتيىمدى قۇرالداردى قولدانۋ، ۆاكتسينا تارالۋىنداعى تەڭسىزدىكتى جويۋ.
سونىمەن قاتار، ددسۇ دەنساۋلىق ساقتاۋ سالاسىنداعى توتەنشە جاعدايلار باعدارلاماسىنىڭ ديرەكتورى مايكل رايان الەم پاندەميانىڭ سوڭىنا ءالى كەلمەگەنىن، بىراق ونى جەڭۋگە مۇمكىندىك بار ەكەنىن ايتتى.
"مەنىڭ ويىمشا، پاندەميانىڭ سوڭىنا كەلمەدىك، ءتىپتى ونىڭ اياقتالاتىن ۋاقىتى دا جاقىن ەمەس. بىراق عىلىمنىڭ ارقاسىندا جاقسى قۇرالدار بار. ۆيرۋسقا قارسى قالاي ارەكەت ەتۋ كەرەك ەكەنىن جاقسى بىلەمىز. بىراق ەلدەر اراسىندا جان-جاقتى جانە تۇراقتى باعدارلامالاردى (ۆيرۋسپەن كۇرەسۋ) ەنگىزۋگە ءالى دە ۇجىمدىق جوسپار جوق", - دەدى ول.
ءدال وسى بريفينگتە ددسۇ توتەنشە جاعدايلار ءبولىمى تەحنيكالىق توبىنىڭ جەتەكشىسى ماريا ۆان كەركحوۆ ۆيرۋس بەلگىلى ءبىر ۋاقىتتا ماۋسىمدىق قۇبىلىس بولۋى ءۇشىن مۋتاتسيانى، جاعدايعا بەيىمدەلىپ، دامي بەرەتىنىن ايتتى.
"مەنىڭ ويىمشا، بۇل جەردە ۆيرۋس ەندەميكالىق سيپاتتا بولا ما دەگەن سۇراق تۋىندامايدى. ارينە، ول وسى جولدا. بىراق ەندەميكالىق سيپاتتا بولۋى قاۋىپسىز دەگەندى بىلدىرمەيدى. ەندەميالىق جاعدايدا ونىڭ تارالۋ دەڭگەيى تومەن، گەوگرافيالىق تۇرعىدان شەكتەۋلى بولاتىنىن كورەمىز، قورعالماعان تۇرعىندار اراسىندا دا ىندەتتى بايقايمىز. مەنىڭ ويىمشا، وسى باعىتتا كەلە جاتىرمىز. بىراق پاندەميانىڭ ورتاسىندامىز، الەمنىڭ جارتىسىندا پاندەميا بولسا، ەندەميالىق جاعدايعا وتە المايمىز. ءبىزدى ۇزاق جول كۇتىپ تۇرعان سەكىلدى", - دەدى ۆان كەركحوۆەن.
بۇعان دەيىن ددسۇ ەۋروپالىق ايماق بيۋروسىنىڭ باسشىسى حانس كلۋگە وميكرون شتامىنا بايلانىستى ەۋروپا ەلدەرىندەگى ەپيدەميالىق جاعداي ناشارلايتىنىن ەسكەرتكەن بولاتىن. سونىمەن قاتار، فرانتسيادا ۆيرۋس جۇقتىرعاندار سانى تاۋلىگىنە 100 مىڭ ادامعا دەيىن ارتادى دەپ بولجانىپ وتىر.
"تاعى ءبىر داۋىل جاقىنداپ كەلە جاتىر. الداعى اپتادا وميكرون ەۋروپا ەلدەرىنىڭ بىرقاتارىنا اسەر ەتەدى", - دەدى ول.
”ادىرنا” ۇلتتىق پورتالى
