قىرعىزستاننىڭ ەكس-پرەزيدەنتى اسقار اقاەۆقا قاتىستى قىلمىستىق ءىستى تەرگەۋ جالعاسادى، وعان جاڭا ايىپ تاعىلدى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
جاقىندا اقاەۆتىڭ ارىپتەسى بەكبولوت تالعاربەكوۆ بۇرىنعى مەملەكەت باسشىسىنان بارلىق ايىپتاۋ الىپ تاستالعانىن جانە وعان قاتىستى قىلمىستىق ءىس قىلمىس قۇرامىنىڭ بولماۋىنا بايلانىستى توقتاتىلعانىن مالىمدەدى.
قر ۇلتتىق قاۋىپسىزدىك كوميتەتىنىڭ ءباسپاسوز قىزمەتى بۇگىن، 21 جەلتوقساندا تالعاربەكوۆتىڭ ءسوزىن جوققا شىعاردى.
"جەكەلەگەن تۇلعالاردىڭ بۇرىنعى پرەزيدەنت اسقار اقاەۆتىڭ "قۇمتور" ءىسى بويىنشا ايىپتاۋلارىن الىپ تاستاۋعا قاتىستى جالعان مالىمدەمەسىنە بايلانىستى ۇقك قوعامعا وسى قىلمىستىق ءىستى تەرگەۋدىڭ الدىن الا ناتيجەلەرى تۋرالى وبەكتيۆ اقپارات جەتكىزۋدى قاجەت دەپ سانايدى. تەرگەۋگە قاتىسى جوق جانە سايكەسىنشە ءىس بويىنشا سەنىمدى اقپاراتى جوق ادامداردىڭ مۇنداي مالىمدەمەسى قوعامدى ادەيى اداستىرادى", - دەپ ءتۇسىندىردى دەپارتامەنت وكىلى.
سونىمەن قاتار، اسقار اقاەۆقا 1992 جىلى "كامەكو" كومپانياسىمەن باس كەلىسىم جاساسۋ جانە 2003 جىلى "قۇمتور" جوباسىن قايتا قۇرىلىمداۋ ەپيزودتارى بويىنشا جاڭا ايىپ تاعىلعان.
"اسقار اقاەۆ قىلمىستاردى جاساعانى ءۇشىن ءوز كىناسىن تولىق مويىنداعانىن جانە تەرگەۋمەن بەلسەندى تۇردە ىنتىماقتاساتىنىن، ال ونىڭ ەلدەن تىس جەرگە كەتۋى تەرگەۋشىمەن، سونداي-اق ونىڭ بىشكەككە كەلۋىمەن الدىن الا كەلىسىلەتىنىن ەرەكشە اتاپ وتكەن ءجون. بۇل رەتتە قىلمىستىق ءىستى تەرگەۋ جالعاسىپ جاتىر جانە "قۇمتور" جوباسىن ىسكە اسىرۋعا بايلانىستى قىلمىستاردى جاساۋدىڭ باسقا دا دەرەكتەرى انىقتالادى، ال جۇرگىزىلگەن تەرگەۋ ارەكەتتەرىنىڭ ناتيجەلەرى بويىنشا ءىس فيگۋرانتتارىنا ءتيىستى زاڭدىق باعا بەرىلەدى", - دەپ تۇيىندەدى ۇقك وكىلى.
”ادىرنا” ۇلتتىق پورتالى
