جۋىردا ۇلتتىق كىتاپحانادا «جەلتوقسان. دەكابر. 1986. دوكۋمەنتالنايا حرونيكا» اتتى عىلىمي ەڭبەكتىڭ تانىستىرىلىمى ءوتتى. «ارىس» باسپاسىنان جارىق كورگەن اتالمىش كىتاپ جەلتوقسان وقيعاسىنىڭ 35 جىلدىعىنا ارنالدى. جەلتوقسان وقيعاسىنىڭ قاتپارلى سىرلارىن ءپاش ەتەتىن ەڭبەكتى قۇراستىرىپ، وقىرمان قاۋىمعا ۇسىنعان قر پارلامەنتى ءماجىلىسىنىڭ دەپۋتاتى، تاريح عىلىمدارىنىڭ كانديداتى بەرىك ابدىعاليۇلى.
اتالمىش شاراعا تاريحشى عالىمدار، جەلتوقسانشىلار، زەرتتەۋشى جاستار قاتىستى. تاۋەلسىزدىكتىڭ تۇعىرى بولعان جەلتوقسان وقيعاسىنا بايلانىستى قۇجاتتىق جيناقتى زيالى قاۋىم وكىلدەرى جىلى قابىلداپ، ۇلت رۋحىنىڭ ويانۋىنا قوسىلعان ەسەلى ەڭبەك دەپ باعالادى.
1986 جىلعى جەلتوقسان وقيعاسىنا بايلانىستى قۇجاتتىق ماتەريالدار توپتاستىرىلعان جيناق 3 بولىمگە ءبولىنىپ، حرونيكالىق رەتپەن بەرىلگەن. ءبىرىنشى بولىمدە 1986 جىلعى جەلتوقسان ايىنداعى پارتيا، مەملەكەت جانە قۇقىق قورعاۋ ورگاندارىنىڭ رەسمي قۇجاتتارى توپتاستىرىلسا، ەكىنشى بولىمدە 1986 جىلعى جەلتوقسان وقيعاسىنىڭ سەبەپتەرى مەن جاعدايى جايىنداعى قازكسر جوعارعى كەڭەسى پريزيديۋم كوميسسياسىنىڭ زەرتتەۋ ماتەريالدارى بەرىلگەن. ال ءۇشىنشى بولىمدە قر كونستيتۋتسيالىق سوتى (1992-1994) قاراستىرعان قۇجاتتىق ماتەريالدار تىزبەگى جيناقتالعان.
قالىڭدىعىنىڭ ءوزى 3 ەلىدەن اساتىن ەڭبەكتىڭ سالماعى 1.710 كگ. بىراق ونىڭ ۇلت رۋحانياتىنا قوسار ۇلەس سالماعى ۇشان-تەڭىز ەكەنى داۋسىز. مۇنداي قۇجاتتىق نەگىزدەگى ەڭبەكتىڭ جارىق كورۋى – جەلتوقسان وقيعاسىنىڭ زەرتتەلۋىنە تىڭ سەرپىن بەرەرى ءسوزسىز.
