Jýyrda Ulttyq kitaphanada «Jeltoqsan. Dekabr. 1986. Dokýmentalnaıa hronıka» atty ǵylymı eńbektiń tanystyrylymy ótti. «Arys» baspasynan jaryq kórgen atalmysh kitap Jeltoqsan oqıǵasynyń 35 jyldyǵyna arnaldy. Jeltoqsan oqıǵasynyń qatparly syrlaryn pásh etetin eńbekti qurastyryp, oqyrman qaýymǵa usynǵan QR Parlamenti májilisiniń depýtaty, tarıh ǵylymdarynyń kandıdaty Berik Ábdiǵalıuly.
Atalmysh sharaǵa tarıhshy ǵalymdar, jeltoqsanshylar, zertteýshi jastar qatysty. Táýelsizdiktiń tuǵyry bolǵan Jeltoqsan oqıǵasyna baılanysty qujattyq jınaqty zııaly qaýym ókilderi jyly qabyldap, ult rýhynyń oıanýyna qosylǵan eseli eńbek dep baǵalady.
1986 jylǵy Jeltoqsan oqıǵasyna baılanysty qujattyq materıaldar toptastyrylǵan jınaq 3 bólimge bólinip, hronıkalyq retpen berilgen. Birinshi bólimde 1986 jylǵy jeltoqsan aıyndaǵy partııa, memleket jáne quqyq qorǵaý organdarynyń resmı qujattary toptastyrylsa, ekinshi bólimde 1986 jylǵy Jeltoqsan oqıǵasynyń sebepteri men jaǵdaıy jaıyndaǵy QazKSR Joǵarǵy Keńesi Prızıdıým Komıssııasynyń zertteý materıaldary berilgen. Al úshinshi bólimde QR Konstıtýııalyq Soty (1992-1994) qarastyrǵan qujattyq materıaldar tizbegi jınaqtalǵan.
Qalyńdyǵynyń ózi 3 eliden asatyn eńbektiń salmaǵy 1.710 kg. Biraq onyń ult rýhanııatyna qosar úles salmaǵy ushan-teńiz ekeni daýsyz. Mundaı qujattyq negizdegi eńbektiń jaryq kórýi – Jeltoqsan oqıǵasynyń zerttelýine tyń serpin bereri sózsiz.
